Bune zornade Udin, bundì Friul e mandi a dutis lis animis che a cjaminin su chiste tiare. Lein prime di dut il nostri lunari: Vuei joibe 26 di zenar dal 2006 il soreli al è ievat a lis 7.22 e al va a pognesi a lis 5 e 1 dopumisdì. La lune e jè calante. I sants dal dì a son Tito e Timoteo, ducj e doi amis e compains di San Pauli. Ta l’ort: al è ben che il mes di genâr al sedi frêt e cun pucje ploe. Miôr la nêf pluitost. Cualchidun, dut câs al dis che la ploe di zenar e fas ben a la ùe: meteisi d’acuardi. Un consei: se o vês i cais ta l’ort, provait a fa un tramai cussì: sot sere soterait in tiare une tàce cun ‘t un puce di bire drenti. La matine dopo lu cjatarês plen di cais. E cumò la nestre storie: La setemane stade e vin presentât il nestri lunari, un piçul barcon su la vite de nestre citât. Ma come che a si sa, ogni citât a è fate di omps, di feminis, di canais, cjans, gjats, canarins, papagai, colomps (di chei a n’d è simpri masse) e, ultimamentri bestis raris di ogni sorte. Ta il timp da la fin ogni forme di agregazion umane e iè permetude. Par chest, se si ûl contâ ce che a sucêt in’t une citât, ai ûl cjatât la forme di agregazion umane plui dongje a descrivi l’univiars intîr che si ûl cognossi. E alore, a svual di colomp, ientrarin, setemane par setemane, drenti lis vicendis e lis peraulis di une classiche famee udinese par contà il mût di viodi che, chel pari, che mari e chei fatassins, e an de nestre citât. Fedele Martarut al è il pari di famèe: come ducj i paris di famèe al è un pêl sore pês ma sportîf e par chest nol rinuncje a tacâ ogni domenie dopumisdì, devant dal caselot, la mae da l’Udinese. Ancjemò chê cun la zeta rosse par denant. E cunt’une firme sul brac che lui al conte che a sei di Zico, ma che a samèe tant ai scarabòs che Fedele al fâs il vinars su la cjarte par provâ la pene prime di tacâ lis peraulis incrosadis. Cheste setemane Fedele no l’è tant content: «ma ti parie – i a dite a Marta, la so femine – che cuatri canais cence voe di cressi, e podedin meti in crôs i tifos furlans? Puar Pozzo, se va indenant cussì l’an che al ven al scuegn regalâ ducj i abonaments a fuarce di fa brutis figuris». Ai brusave, a Fedele, di vê piardût in cjase cuintri la Rome, e par chest domenie di sere la mignistrine di brût propite no i leve jù. Par lui, orgoliôs e di simpri tifôs da le “zebrette”, viodi chei fatasins cussì zovins e plens di borie che, cence un minim di educaziôn a son stats boins di disfati une partide nome par egoisim, a ere une pene. «Il sport no’l esist plui: masse bêz e masse television». «No sta tacâ - ai rispundè Josh, sò fi. – Che sei fuori con i tempi. La television e iude il sport, cjale la flame olimpiche. No isal stât biel che a sedi passade par i nestris pais? No atu viudude trope int?» Ma cun sò fi, come al solit, Fedele, vecjo rivolutsionari e bastiancontrari, nol’ere d’acuardi: «Scuse? – al ere saltat su Fedele tant che si sbitareve la maute di Zico cun’t il kechup che nol voleve saventin di pognesi su le ale dal polèç che al veve tal plat – Scuse? Ma ce ditu! Ti parie une robe sportive dute che pulizie e carbugners atôr da la fiacule! E dutis chês bandierinis cun’t il nom di chê porcarie maron che beveis vuatris! Il spirit sportif a l’è muart a lis Termopili, cun Leonida! Erial lui, almancul?» al fini disint Fedele, metint i voi su la medae mai cjapade che il kechup al veve disegnat su la so insostituibile maute. Chisc discors a vevin finît di un toc di interesâ Marta, la femine di Fedele, mari di Josh e uniche responsabile di vê dat al fi un nom cussì stramp («Lu ai fat jò, disè che di che Josh al veve trat la prime uicade tal Ospedal di Udin – e alore lu clami come che o vuei jò». A veve dite Marta che in chei dis e iere claramentri piardude vie par il vecjo di Una casa nella prateria). A Marta, anime sensibile, i passavin par il cjâf altris robis. «Ma tu pense chei ca che si fasin clamâ animalisc – e diseve fra se e se Marta – pense se par un cas di chei disgracias a si fossin cjatâs a tu par tu cui purcitars di Feagne. Chei che son cussì orgolios dal lor mistîr che si son fats une liste special par fasi ricognossi. Pense ce bordel che al sarès vignut fur se, tal ienfri che i animalisc i devin fûc ai salams de aziende di Ruvigne e fossin rivâts i purcitârs. Joi! Tâs che jù an cjapâs subit, se nò sanc par lis cumierîs tant che ta i duei fra samurai in Japon, eco chel che al sares saltat fûr». Chiscj a son i pensîrs de int de nestre citât. Chestis lis peraulis che i vengnin tal ciâf scoltant ce che al sucêt. Peraulis che a leîn il reâl miôr dai gjornai. Come lis peraulis che a corevin dentri il cjâf di Vita, la morusute di Josh, che come ogni domenie di sere e scugnive mangjâ il brût di Marta. Mangjâ e tasê par ce che ta che cjase e ierin pôs dîs che iere rivade e no podeve burî fore dute la so cussiense ecologiste. «Targhe alterne doman. A Udin! Nancje centmil animis e scugnin imparâ l’algebra par savê se lâ fûr cun ‘t une machine o cun che atre. E se dutis dos lis machinis e an la targhe dispari ce fasino, clamino il taxi?». A Vita la int i pareve mate: dome machinis tal cjâf. E simpri plui grandis. Mancul mal che Freud no ‘l è plui di mode par ce che se no al varès savut ce nom dâ a cheste manie. «Jo no dis – a veve però sberlât Vita – che al vedi reson Dario Fo che a Milan, se al devente sindic, al ûl vietâ l’ingres a la citât dai “fuoristrada”. Ma, insome, a mi dute cheste int che a compre machinons e dopo, come che a disin lis bancis e lis finanziaris, simpri di pui no rive a paià lis ratis, a mi par propite fûr cul cjâf». Marta la veve cjalade di bon voli: «utu viodi che chel ciondar di fatassin che i ai parturît al a cjatât une strie che lu comede?» e veve pensât cui voi lusints. Josh nol veve dite nuje: devant dai soi voi, un daûr chel atri, e stevin fasint viodi i cuatri goi che e veve cjapât l’Udinese. Fedele la veve cjalade, cul piron in man, un toc di les di manzette impirât e ineât in’t un cuintâl di kechup. Nol veve nissune voe di intirvignì. Iuste vinars a si ere inecuart che la rate da la machine a coincideve cun che de television a “schermo piatto” che al veve apene comprât. «Une vere ocasion – al veve dite a Marta tant che al firmave lis cjartis devant dal comès dal centro comercjal – une vere ocasion. E po, no vino di fâ biele figure cui amîs: cjale che le an ducj, satu?». Marta no si ere cunvinte ma e veve tasût. E crodeve ancjemò a lis peraulis di chel omp un pel in sorepês ma sportîf. E, salacôr, a no faseve propite ben a crodigj. Lassant fûr lis vicendis da la famèè Martarut, viodin ce che al è susidût te nestre citât e atôr di jè in chiste setemane: biele aventure par i pendolars che doprin, cun’t spirt sparagnadôr e respondabil, i trenos: une vere murie di trenos pies di chê che rive da la Cine a jù a lassats a pits plui voltis, tal frêt e te glaçe come un puâr signurut te scune. Pecjât che i mus e i bo che, par contrat ducj i Signôrs che vegnin su cheste tiare e sugnin ve par scjaldasi, a jù an mandats di cualchi atre bande. Forsite a Rome no si sa. Tai ospedâi par da fûr e bisugne de int di guarisi a si tacarâ a fa ancje il turno di gnot. La sabide de sere, se l’è masse frêt par lâ atôr, savarin ce fa. A continuin lis indaginis sul marcjât di armis da la famose caserme furlane: ducj a disin che i kalashnikov a coventevin par fa plui biêl il museu da la Caserme, ma la procure militâr di Padue no è tant d’acuardi sul fasi cojonà. Intant il vescul di Udin al a dite in glesie: bausiars e disonescj stait a cjase, riferintsi a chêi che intindin metisi in liste pe prosimis eletsions. Insome il frêt al inglace il Friûl ma no lu fa rindi. A oibe che vên.

I lunaris, di solit, a ju fasin i fraris. O almancul int che a sta siarade davor i penz murs di un convent a cjalâ e studiâ lis stelis e a cjatâ reson da i fonts dal cafè. E cheste a è la tradizion. Ma al dì di vuei a pol iessi che si vedi la voe di platasi davor di un mur o di un microfono, cjalà fore e viodi e contà chel che al suset o al sta par susedi, no? Dolà? Ma chi claramentri, chi ator, chi in citat… bune zornade udin, bundì friul e mandi a dutis li animis che a cjaminin su chiste tiare.
Sbruntin il canocjal fore dal barcon, tachin a cjalasi ator e provin a contà ze che ni par di viodi.

Ator e ator cjasis e cjasis, condominios, palacj, stradis, viai, viados. No chei no son, no par strade almancul. Un prefet che ai tignive particolarmenti a la viabilitat a l’à partat vie de strade dut se che a nol veve almancul une rode. Che atre di ai viudut un zuet multat parce che al veve dome lis crossulis e nol rispeteve il limit minimo di velocitat.
Ma, insome. Chieste a è une citat. Cun pucis fabrichis. Difati no è mai stade une citat industrial. Pluitost une citat comercial. Sul model venezian. Se i modei an un valor cuant che a son aplicats fore dal lor ambient natural…

Disevin che la nostre a è une citat che vores fa dal comercio la so prime ativitat. Vivi di chel insome. Al comercio an dedicat ancje il stradon che al va viars la culine. Chel dut plen di buteghis che vendin machinis e vistis e dut ce che al convente. Su che strade an’d è cussì tantis di buteghis che tal centro a non n’d è plui. Ta un telefilm di Colombo domenie passade (il comisari, chel merecan fat di Peter Falck), un sasin (che come al solit si lu sa subite che al’è lui, ma Colombo ti lu dis dome a la fin) ai a dite al comisari: «Ognuno di noi ha una sua parola, una parola che lo differenzia dal resto del mondo». Eco. In chiscj dis la peraule da la nostre citat a è: “affittasi”.

Come par ducj i lunaris ancje tal nostri i vin cjatat spazi par un par di notizis che al dì di vuei a son di fondamentâl importanze: il sant dal dì, lune e samencis.
Vuei joibe ai 19 di zenar dal 2006 il soreli al è ievât a lis 7.27 e al larà a mont a lis 6,50 dopumisdì.
La lune a tramonte 10:24 e a ieve a lis vot e 45 di sere.
LA LUNE: In chiscj dis a è lune calante fin al 22 cuant che al tacarà l’ultin cuart par chis mes.

Il sant dal dì al è: San Ponziano di Spoleto Martire
E mi par ben tacà a fa la conte dai sants propite cun San Ponziano, ancje parcè che al è il patrono dai taremots. Martirizat tra il 156 e il 165, tal 968 il vescul Baldrigo, che al vignive dal Belgjo, a si è cjolt un brac dal sant e l’a partat a Utrecht fasinlu deventà patrono di che citat. Il brac. A l’an fat deventà patrono dai teremots parce che cuant che ai an taiat il cjaf a disin che a sedi vignude une grande scosse di taramot.

Ta l’ort
Ai vol tacat a lavorà la tiare, zapant e mitint ledan di chel bon. Podes raplantà la salate e i capus. Samenait i ravanei e lis carotis.

Disevin di comercio: ta chiscj dis te nostre citat, che vol vivi dome di comercio ma a siare dutis lis buteghis dal centro, a è in cors une biele lote fra chei che ta li buteghis a lavorin, chei che li an crompadis e chei che governin. Ognidun di lor al propon di fa un orari di viargidure difarent. Su lis domenis viartis a l’è nât il fisco: cui al dis di si, cui al dis di no. Cui al dis ogni domenie, cui vincequatri (une si e une no, no l’esie plui fassil di dì?), cui vinc (dodis plui vot come che an sugerit). Il sens dal dut al è che cu lis buteghis viartis la int la domenie a varess di vignì in centro a cjalà buteghis viartis e a crompà. Viudut che te vite la int no a altri ce fa. E che soredut, par fa cresi il spirt di citadinance ai vol vut li barghessis cu la plete.

No stin cjapassile però. Di int che a pense in maniere difarente e che sa vignì adun da lis contradizions ta chiste citat, la nostre citat, a ‘n d’è. An sa alc il procurator militar di Padue che l’è davor a fa indaginis su li armis cjatadis ta une caserme di chenti: no monadis: cuintai di palotulis mitras, fusii. E ducj cu la matricole limade, come ches che a doprin ta lis mafis. A son rivadis dretis dretis dall’Iraq: nissun al sa tropis ca erin e, pies, dinissun al sa tropis che a son za stadis consegnadis. Par la lez classiche da la diferenziazion comercial, ta la stesse caserme e an cjatat ancje reperts archeologics contrabandâts simpri da l’Iraq. Insome: i soldats partis di chi par là in Iraq a zavevin ben cuale pas che a levin a fa tal pais da la miece lune: che eterne, e no par lor…
Intant, tal pais dai sioperos, i funzionaris da li tassis a protestin parce che no podin fa il lor mister, i operaios a blochin li autostradis par fasi rinovà il contrat e i braconiers a ridin par ce che cualchidun al mande a cjase li guardis forestal che no volin fasi cjalà lis tonsilis di un miedi.