Buindì Udin, mandi Friûl e bune zornade a dutis lis animis che a cjaminin su cheste tiare. Come di abitudine tachin le puntade cul nestri lunari: Vuei joibe ai 23 di fevrâr o sin finalmentri ientrâs tal sen dai pes. I dis cussì par ce che o sei dai pes, claramentri. Il soreli al è jevât a 7 e doi minuts, e al larâ a pognesi as cinc e vincesiet dopumisdì. Il sant di vuei al è sant Policarpo, nat tal 69 dopo Crist. Ta la so vite al a cognussut Ignazio, vescul di Antiochie al cual al a scrite une famose letare. Durant une persecusion ta la so citât, ancje se cualchidun al a cirût di salvalu, lui nol a vulût e al è montât di bessol su la cumiere di lens par iessi brusât. Ma i romans il gest no i ere plasût e cussì lu coparin cu al spade a dos dopumisdì dal 23 fevrâr 155. Tal cjamp: in lune calante si podin sarpî i miluçars, i piruçars, lis zespis, i piarsolârs, i mandolârs e la vît. Un consei: mangjâ ben al fâs ben ai cjavêi, a la lôr salût e al lôr colôr. Mangjâ mal, il stress, l’incuinament, l’alcool e il fun a rindin mancul fuarts, o mancul biei, i cjavêi. Se i volie mangjât par tignî cont la vostre chiome? Alore: par no faiu colâ ai vol la vitamine E, ca si la cjate tal butul di forment o tal vuelin di butul di forment, ta la samense e tal vuelin di zirasôl, ta la mandule e tal vuelin di mandulis, tal ros dal ouf, ta la scusse di noranze e tal fiat di bacalà. Par dâ colôr, lustrâ e volump ai cjavêi mangjâit: levan di bire, oufs, lat, cjar, pes, pomis e verduris. Insome mangjait san e ben e un puc di dut. Se o veis furtune no restareis coçons. Conte che ti conte, jè rivade le ore si scoltâ ce che an passât, cheste setemane, i gagliofôs da la famèe Martarut. Eco le nestre storie! Di cualchi an in ca i osters an cjapade la mode di metisi intôt chei grumalôns che, in teorie, a varessin di sedi che da la tradiziôn. E, simpri in teorie, se jentrânt ta une ostarie si cjatisi devânt un oster cun tant di grumâl, za al volares dì che ta chel puest si bêf ben. Come che saveis l’Everest no ere une ostarie, ma un bar. Si podarès ancje disi un barat, ma no stin fai masse cumpliments. Ca si beves un bon tai a ere propite una maravèe: ancje parce che dut al dipendeve da la miscele che Ermes, il barist, al riveve a fa cu la spine. Eco, parce che, dongje a l’aredament, al grumal e a cualchi cuintâl di len, une altre robe a segne il cunfin net fra un bar e une ostarie. Ta la seconde che o vin clamât no cjatarais mai che invenzion funanboliche e maraveose che a è la spine par il vin. Un oster ch’al rivas a vendi vin a la spine al sarès come minimo di copâ! Ma sin chi par altri. Cjacarevin di grumai. Insome, che matine, tor dîs e mieçe, minut plui minut mancul, ven a stai la sante ore dal cafè di mieçe matine di Fedele, un trio di omps, dal marcepît a cjalevin cun fa tra il scientific e il gjornalistic chel che al resteve di un calomp masanat da la rode di un bus propite devanti di lôr. «Ma, secont te alore – al veve tacât Artemio il pustin – nol è pericul. E jè dute une invenzion da la television par tignini boins». Chestis a erin li domandis che plui di dutis ai plasevin a Fedele. Cence tirà su i voi dal pastros di cjar e plumis che al veve devant «Posì po’» al veve rispundût al pustin. E disînt chest al veve tirat su il cuel come un dindi crudînt cun chest di dà plui valôr a la so preparazion scientifiche e ideologiche. Intant Ermes, cu lis mans in ta scarsele al cjaleve mò il colomp, mò la strade, continuant a saludâ bune part di chei che in machine ai passavin devant. Il novante par cent dai cuai e jerin o e jerin stâs soi clients. «Ma in base a ce ditu chest tu, Fedele?» al veve tirat fûr dopo ve lassat passâ il bus da la linie tre che si ere fermât puc plui devânt par fâ dismontâ Rose, la sartore che viveve tal apartament disore dal bar Everest e che dutis li seris, viars nûf, e tacheve a sbati il mani de scove sul paviment par fai capî a Ermes che jere ore di sierâ. «In base ai studis che o ai fat, in base a ce co lei e in base ai rasonaments che o fâs» al veve ripundut Fedele apene che il “tre” al veve finût di sgasâ siarânt lis puartis lassânt partî la vusute regjstrade che a vertive: “Attenzione! Porte in chiusura! Linea tre da…”. «Bon Fedele, scolte» al veve tacât Ermes continuant a cjalâ le strade cu lis mans in sachete, il spagnolet in bocje e i voi ingrinpâs a dutis lis machinis che passevin par smicjâ se drenti al jere cualchidun che al cognosseve «Scolte. No l’è che tu tu sedis propite un miedi. Tu as fat siet mes di infermîr professionâl cuant che tu vevis sedis agns. Che tu sedis un che al lei, dinissun ti lu nèe. Ma che tu sedis ancje bon di resonâ, cheste propite no». Peraulis come pieris, chês ditis di Ermes, che Fedele al veve cjapât come un scapelòt da la cadope. «Ma no, cjastron, no sta cjapatile» al veve subite corèt Ermes che al ere un mestri a menâ par il boro «Volevi diti che no mi cunvinsin i tiei rasonaments, a son di part». Cjapânt al volo la false ritirade da l’ostêr, Fedele, che a fasi menâ par il boro al ere un mestri, ai veve rispundût: «Ciò, scolte. Ma a ti, ti parie che a stedi in pîs une epidemie che a cope, tal mont inter, si e no cent di lor? Sastu trops co sin su cheste tiare: sîs miliarts. Si, fa i conts. Par me e jè une grande bale mondial: ai covente un alc che al scaturissi la int, ai covente une pore simpri pronte daûr dal cjanton». E a chestis peraulis, come doi cretins, Ermes e Artemio il puestin e si erin girâts a smicjâ daûr dal cjanton dal bar, guaimai che il virus da le aviarie, travestit di crovat, di lipare o di agane al fos propite lì a spetaiu. «Eh! Si! Son robis che nun no podin savê!» al veve dite Artemio. «Ciò ai vol let, capît, studîat. No si pol simpri crodigi a dut chel che nus contin. Al a reson Fedele». Ermes lu veve cjalât cun doi voi pietôs come disint «Valà, valà, pandolo» ma Artemio, altri bon biât, al veve cjapât che smicjade par altri. «Insome, però, Fedele, - al veve continuât Artemio - tu nus contis che se chest ca – e al veve segnât cul det il colomp sfracheât su l’asfalt che come par incjant, dutis lis voltis che a passave une machine, par fuarce di svint, al svintuleve une alute – ancje se al fos infetât nol vares di iessi periculôs». «Baste che no ti lu bussis in bocje» ai veve rispiundut Ermes cence nencje voltâ il cjâf tant che al cjaleve chel toc di Rumene che e feve la badante al vecjo Elmo tal condominio di fornt. Il cual, di cuant che e jere rivade jè, al veve savoltât i plans dai miedis e dai parinc: parce che i prins ai vevin dat pus mês di vite e lui nol voleve saventin di lâ in via dei Cipressi e chei dai seconds che, ancje se cun dolôr di cûr, e vevin za mitût l’anuncio sul gjornâl: “Ampio e luminoso bilocale in Via Monte Bracco e Baldo, libero subito, con cantina e garage. Prezzo realizzo”. Il trio dal colomp sfracheât a si ere disfât di lì a puc, cui par tornâ a montâ in bici, cui a montâ lis scjalis da l’ufici, cui a montâ la gnove machine che propite in chel moment il canai da “L’Orzo Espresso” ai veve consegnât. Disfansi, dut câs, il trio al veve lassât suspindudis une valanghe di cuestions: Fedele al ere simpri plui convint che daûr da le aviarie al fos un complot mondiâl da lis grandis multinazionâl che, traviars di une studiade fughe di notizis, al intindeve meti in agitaziôn la popolaziôn mondial par rivâ a vendi prime la maladie e podopo la cure a la stesse. Ancje par Artemio, contagjât da la predicaziôn catastrofo-ecologjste di Fedele al steve sussidînt alc di grues tal mont, al punt che, forsite, e jere rivade le ore di molâ dut e di lâ a vivi in Gjamaiche come che al varèss simpri vulût. E come che so mari no voleve e par chêst lui al vares continuat a fâ il puestin. Par Ermes la domande restate suspindude ere une: ce ae vuè Sara? E la rispueste e sarès rivade subite: “O rivi fin te Coop par fâ la spese par nun: ce astu che di mangjâ vuè?» Al ere impressionânt come che piçule e gustose brasiliane e veve imparât il furlan e lu dopreve miôr da la so marilenghe. Ermes, che za al veve i sios problemas a stai daûr a lis spiegaziôns par la gnove machine dal canai di “L’Orzo espresso” ai veve rispundut un «Fas tu» puc cunvint o, magari, dome un pêl ostacolât dal menevîts che al veve in bocje. Cussì Sara e jere rivade a la Coop, e veve mitût tal zei chês cuatri robis che i coventevin e lant fûr e veve cjatade Marta, la femine di Fedele juste su le puarte. Cicare e ciacare Marta si ere inecuarte che Sara e veve il magon sul stomi. E di bune psicologhe che jere, tiranle in bande, ai lu veve tirât fûr. «Tu varâs scoltât – e veve tacât Sara - che storie di che i che an arestât le setemane stade. Che i dal multilevel». «No sta dimi» ai veve rispuindut Marta partansi une man devant de bocje: «Ancje tu?». «Tâs!» ai veve rispuindût che atre cjalansi atôr cun la pore che Ermes, par un câs insostenibil da la trasmission dal sunôr al vignis a savê alc «Tâs! Se lu sa Ermes mi cope! Mil euro i ai dât! E par furtune che no ai cirût int atôr par continuâ la cjadene di Sant Antoni. Se no sastu pachis che o cjapevi. E il pies al è che al varès vude reson plene!» Di che altre bande da la cjtât, tal centro universitari, Vita e steve cjalant une situaziôn che, se nol fos stât che si cjateve ta une cjatât che no riveve ai cent mil abitants e che atôr di se e veve chilometros e chilometros di campagne, a podeve definisi come ridicule. Un canai di pus agns al zireve piardût ta la so scune a rodelis cu une biele maschere su la muse. Si, d’acordo, al ere ancje vistût in mascare e a che etâts lì e je la mari che decît: par cui su li mosselis in sorepês di canai tirat su a pastelis, pastros e ormons, incurnisadis da l’astigo che ai tignive la cjapiele di Arlechin, a sflandoreve une maraveose mascare di chirurgo. Ven a stai che la mari, premorose tal dai ormôns, fai cjalâ vinc oris al dî di cartons animati e dai di bevi porcaries gasadis di duc i colôrs, sintînt che l’ajâr da la cjtât no l’ere par la cual, e veve ben pensât di fassi prestâ da l’omp, che chirurgo a lu ere par da bon, la mascare di sale operatorie. E cun che, che biade, e penseve che il sio canai al fos parât di dute che sorte di cancars invisibî che clamin minusae polvarose. Vita e iere incocalide a cjalâ cheste scene: «Ma Signôr - e pensave – si rindinu cont. Sin in cuatri di nun, o vin cinc machinis paromp e cumò sin tant cjapâts mâl che scugnin lâ atôr per citât.. citât! Pôc plui che un pais! Cu le mascarine par no cjapasi subite un tumôr!». E chi no jere cuestion di iessi o mancul ecologiscj: ta chei dîs l’assesôr a l’ecologje dal Cumun al veve dite ai gjornâi che ta un an an ‘n derin stâs dîs muarts in plui par cause di maladis leadis a la minusae polvarose. «Ades, va ben dut – e veve continuat tal pensîr Vita – va ben dut: il progrès, la publicitât, l’avignî, il bon stâ. Ma, Signôr! Dîs muarts di plui ta un an. E son stimis. E la minusae polvarose e continue a jessi simpri di plui. Come lis machinis. E par fermâ dut chest ce fino? “Targhe alterne”! Ma un plan par il trafic, no? Un plan integrât par il traspuart public? Une educaziôn permanente te scuelis, te fameis, par dut sul valôr da la salut, che a vol di ancje la a pît di Chiavris a San Jacu, che a son dîs minuts apeit, ven a stai mancul di che che si stâ a cirî parchegjo.». La tirade che Vita si steve fasint tal cjâf no finive plui. E man man che leve indenant e deventave simpri plui estremiste. Reste il fat che, sa è vere, e mi sa che no pol iessi difarente, che ta un an o vin vût dîs muart in plui par cause da l’incuinament a Udin… ben alore o sin propite dal gjat!

Buindì Udin, mandi Friûl e bune zornade a dutis lis animis che a cjaminin su cheste tiare. Come di abituidine tachin le puntade cul nestri lunari: Vuei joibe ai 16 (sedis) di fevrâr, o sin ancjemò tal sen da l’acuari, il soreli al è ievat a 7.02 e al va a pognesi as 5 e vincjedoi dopumisdì. Come che viodeis lis zornadis si stan slungjant: ta une setemane o vin un biel puçje di lûs in plui. Vuei a è la fieste di San Marciano che, di bon te vite, al à fat dome che di iessi un bon omp. Tal sens che al veve sposât une imperatrice, lant cuc a cjase so, la cual dopo jè state nomenade ancje sante cun plui autoritât di lui. Considerât dut chêst podaressin nomenâ d’ufici San Marciano protetôr dai cucs. Tal curtil: viodût che no vin tant ce fa, provin a pensâ a come che podaressin fa deventâ plui biel il nostri curtîl. Fin a cualchi an fa al ere tant di mode, de nestris bandis La Glicine, une plante puc esigente che e sopuarte ben l’ajâr sporc de citât. Si lu plante fra Otobre e Març, ta cualsisedi tiare baste che al vedi tant soreli. No ‘l covente stai tant daur e no l’a pore da le glace. Stait nome atents che lis radîs a corin tant e che al a bisugne di tant spazi. Une curiositât: lis species ocidentâls di glicine a van su te plante in sens orari, chês gjaponesis e van su al contrari, in sens anti orari. Cuant che si dîs la nature, vè! E cumò lassin viarte le puarte a lis aventuris che cheste setimane e an macolât le vite da la famèe Martarut: eco le nestre storie! Fedele e Duilio a erin chei che si dîs amîs pa le piel. A “stevin insieme” se cussì pudin disi, di cuant che a vevin provat a fa la scuele par deventâ infermîrs professionai. Un al veve sedis agns e chel atri pucs di plui. Si erin cjalas di stuart il prin dì di scuele che, a chei timps, juste par fati capî dulâ che tu eris rivât, al scuminseve propite tal ambulatori dal ospedâl: invesite di saludâ la diretore, che chê volte e jere une munie, Suor Adelaide, si scugnive cjatasi a 7 di matine par fasi fâ lis analisis. Magari a leve ancje ben cussî ma a Fedele, che lis guselis no i erin mai plasudis e che acje cumò che no l’ere plui un frut, ai vignivin i sudôrs frêts ogni volte che il miedi ai diseve di fa lis analisi dal sanc, chel metodo no i ere plasût par nuje. Cussì al steve bon incjantonât in somp a une panchine da la sale di atese, fasint finte di lei L’Unità, intant che il çurviel al coreve a manete fra guselis, fialis, odôr di etere e gole di trai fûr dul chêl che so mari ai veve preparât di cene tai ultins cuindis dîs. Duilio no. Chel nol veve pore. Ancje se il setembre di chel an no l’ere dai plui biei, lui al veve ancjemò intor la cjamese hawaiane che, al steve contant a Patrizia une atre aspirante infermiere, a Lignan ai veve partât tant ben cu lis tedescjutis. «O ai fat il fisco in splase. Johi! Se tu savessis! Austriachis, todescjs, Ongjaresis. Par fin une inglese che no si sa par cual motiv che a ere vignude in splase a Lignan». Ta chei ains, difati, la splase dal savalon d’aur a sameave che e fos proprietât privade di chei omenons bionts e cunt tante panse che rivavin fûr dal casel di Tisane cun chês Mercedes di color zalut e davôr une roulotte lungje come un treno. Chei de basse e passevin lis sabide matine a cjalâ lis mercedes che vignin fûr da l’autostrade, sintâs su la murae tacade dal casel. E saludevin cu la manute chescj siors todesc che magari, cualchi an prime e jerin tornas a viodi chel Litoral Adriatic che tai plans di cualchi gjeneral nazist al vares vut di sedi un baluardo contre la sclavitât e cuntre un eventual sbarco dai merecans. Cumò lis robis e jerin gambiadis però: i todescus cu la cadope rasade e jerin deventâs grancj, e po paris di famèe, e po operaios o impiegats o imprenditors di che Gjermanie ancjemò spacade in doi ma che e steve, dut cas, deventant un dai plui potents motôrs d’Europe. E si erin comprade le Mercedes, zalute, e la roulotte e di boins ex concuistadôrs tornâts a un ruolo di prin plan, no cun lis armis ma cu l’economie, e vigniv a fâ i grancj, ancje se cun tante educazion, là di chei piçui talians che e venin tant soreli ma puçie voe di decidi cuale strade che ere le lôr. Però i talians a venin il mâr, ancje se puc di plui che une poçe. E e venin il soreli. E alore avanti! Ju chilometros viars sud partint di Munchen, Hannover, Amburg, Frankfurt. Ducj noms che i fatasinats de Basse e congnossevin ben: «Di dulâ erie Henge? Di Monaco. Johi ce tetis!» al ere il coment plui frecuent di bande di chei zovins par i cual Lignan e jere plui il lûc di une vuere che une gjostre. Parce che al ere clar che i todescj e stevin miôr dai lor paris che, al limit di zâl e podevin mostrâ dome une 128 dute taconade di busis di rusin. O al massimo une sflandorante Alfasud, une di chês mostruositâs nadis tal cjâf di une imprenditorie industriâl fantasiose ma propite sleade da la realtât. Su la splase si zuieve l’eterne vuere tra i fatassins todescj, biei, petenats, alts, atletics, cu i mudantins firmâts Adidas, e i nostris canais, sgjavelâts, cun i jeans taiats a livel de cuesse e la maiute lavade in varechine par fale deventâ psichedeliche. E i ciamps di batae e jerin doi: il fobal, (neologisim furlanissim, tipicamentri de base gjavât dal britannis futball) o lis fatassinis. E sicome che no simpri Italie Gjermanie e finive cuatri a tre, plui spes si zuieve di sponde. Piardi di dì in splase a balon par vendicasi di gnot cun li altissimis e biondissimis todescjs. Cussì lis sabide matine passadis a inneasi tal fun dai disel todescj su la murae dal casel no l’ere un benvignût ai paris, ma un “ta tente che ti la peti” a dutis li stressis biondis cui voi stracs di autostrade che e cjalevin fûr dal finestrin daûr des Mercedes zalutis. E par Duilio l’estât e tacheve a Le Pentecose, la prime grande butade di todescj che rivevin te splase furlane. Une estât che dureve fin in setembre cui ultins pensionas di Hannover che magari si partevin davor la nevudute za in avanzât stât prepuberâl. Di cut chêst Duilio al fevelave che matine cun Patrizia, smicjant cui voi svelts di fi di sicilian traplantât in Friûl e deventât plui furlan dai furlans, Fedele che al stave in scundon davôr dal siò gjornâl. Lassin piardi chel che chê matine e tai mes dopo l’ere sucidût. Contin dome che Fedele e Duilio e vevin cuntinuât a cjatasi ancje cuant che un dai doi al veve decidût che l’unic sanc che si podeve soportâ al ere chel de fiorentine. Si cjatevin spes, e jerin amîs par la piel. A levin a mangja insieme, e il vinars di sere al ere plui sant da la briscule. Il vinars, nonostant la colite di Fedele, al jere “Bacalà”. Par chest Fedele che al ameve (di amic) Duilio, tal stes moment a lu odieve. Parce che Duilio al podeve mangjâ ancje un seglot di clauts, un moment dipo trai un ruton e dedicasi anime e cor al pasticcjo di melanzanis. Par cui dutis lis voltis che al podeve al strissinave Fedele a mangjâ il bacalà ta l’uniche tratorie che a ti metes devant dai voi un bacalà che al tireve su i muarts de tombe. Cul risultât che, di solit, tor cuatri di matine Fedele al jere ancjemò chal balucheve par cjase cun le taçe di bicarbonato in man a cirî di parà jù chel ben di diu pesant come un camion di glere. O, senò, a si rondoleve cence requie tal iet, cirînt la pas eterne che a lu solevas di che torture psico-chimiche che al ere il bacalà che no i leve ne su ne jù. Che gnot Fedele al ere ta la seconde fase: che dal siump cence requie. Un siump plen di suns però. E il piês al ere chel che ai feve viodi un flun cu la montane, di un maron agressif e trist, dal cual come salmons a saltevin fûr dal pêl da le aghe milions di bacalà. Cence cjafs e za pronts di meti in padiele. E, po dopo chei milions di bacalà, par la proprietât transitive classiche dai suns, e diventavin ucei, strans ucei di un colôr zalut gastric che e fevin un piçul svual su le aghe torgule par colâ muarts su la rive dal flun in plene. Fedele jù cjaleve, sintât su la balconade di une strane tratorie galegjante e ondegjante ancorade propite in rive al flun. In bande di lui Duilio che al pareve jù plats e plats di capis lungjs, caparossui, canoce, sardinis impanadis e, no si sa par ce ma tai suns dut al è lecit, wurstel di Morgante. Al mangjeve come un purcit e al comenteve: «E jè la maladie dai ucei di flun. Ma no sta ve pore: cuets a no fan nuje. Son boins. Mangje, mangje». Ma Fedele lu cjaleve stranit e preocupat fin che il camerier ai veve mitut tal plat, cence mai velu ordenât, un ucel-pes di chei muarts te rive. Splumat, cuet in gardele al mandave fûr un savôr delizios e chimic, perfet ta la so concezion e tal equilibri di spezis. Fedele lul veve impironât e tirat su, cussì, par cjalalu miôr. Voltanlu, sot di une al veve viodût une robe plui che particolar: une targhete. Tacade ta le piel. Ce che al ere scrit nol ere rivât a capî. Chel che a i interessave al ere che su la targhete, sflandorôs, al lusive il nom di une famose multinazionâl farmaceutiche. «Ciò, Artemio, aghe e mente?» ma che dì Artemio il pustin al ere piardût dentri di sé a masanâ pensîrs. Cu li mans inneadis ta la sporte di piel (i ala veve regalade un siò vecjo colega, praticamentri il siò mestri spirituâl) al cirive se iere poste par il Bar Everest. I ere parût di vè mitude drenti une fature e cumò no la cjateve plui. «Aghe e mente?» al veve tornât a sberlâ Ermes, il barist dall’Everest, che za a si figureve un biel faturon in arif da la societât che i fornive lis bibitis. Artemio ancjemò nol rispundeve ancje se al sameave che, dai lavris, al vignis fûr alc: cussì al lassave intindi, almancul, il rusinisi dall’ajâr che apene apene a si feve plui penz propite pôc plui in lâ da la bocje dal pustin. «Deh! La veiso ducj con me stematine! Artemio!» e cheste volte le sberlade dal barist e veve partat il so efièt parce che il pustin, pur vint fat l’obietôr di cussience, si ere mitût su l’atenti «E alore, la volistu cheste aghe e mente, si o no!?!». Il zovin… zovin: cumò si dîs cussì ancje a chei che an cuarante ains su la schene, lu veve cjalât cun muse interogative: «Ce sberlitu? No bevial simpri che, ogni matine che a son dîs agns che ven achi. Met le aghe e mente e no sta fa tant il pretôr». E Ermes, inmusunît tant che une murose lassade a sec, ai veve mitude une dose talmentri pengje di mente che il gucjarin al podeve sta dret di bessol ta che tace «Zovins no! A mi pretôr: sint chel ca! Al è bon di partami la fature da lis bibitis e dami ancje dal pretôr!» a veve cuncludût Ermes tornânt a pogni il butilion da la Menta Alpina tal frigo sot il bancon. «No, no le ai» ai veve dite Artemio. «Ce?» si ere voltât disint Ermes cunt une foghe di pugile «La pueste par te. No le ai» al veve dite il pustin cirint di tirâ fûr il gucjarin ca si ere incolât ta le aghe e mente. «Ben, miôr no? Tant tu tornis doman, nomo?» par Ermes, cun chestis peralulis, la zornade e steve tornant a indrezzasi. No par Artemio paraltri. Parce che une atre tessare dal siò sconclusionât mosaic e siere piardude che matine. «Ciò, scolte piçul – ei veve dite dal alt dal siò metro e novante cinc par cent e dîs chilos Ermes – astu l’ingôs ste matine». «Di plui» al veve rispundut il pustin che al steve pensânt di domandâ a Ermes un curtis par tajâ a fetis le aghe e mente che a sameave plui a une pancete di cueste che a une bibite. «Di plui. Sastu ce che mi è capitât vuei in Pueste? A nuf mancul un cuart e ni è entrât un zovin. Puc plui che un canai. Al varâ vût vinc aigns. Insome al ven dongje al bancon – jo o eri lì par cioli su lis casetis de puste di partâ fûr – e ai dîs a l’impiegade: “dovrei fare una letera”. Ciò, insome che atre ai domande là che al à di spedile. E lui “no devo farla”. Insome al ven fûr un tire e mole fra i doi che no si capissin plui. Ancje jo no rivevi a stai daûr. Alore o vai dongje dai doi e cîr di capî. “Ce astu di fâ, Nini?”. E chel – una letera -. Lu ai cjalât. Al feve l’operaio in cantîr crôt. Al ere de Basse. Voi di sun e spalis di un che a cincuante aigns il côr ai varès dite “mandi” par i masse sfuarc e lis tantis umiliatsions.» «Si bon, mi contintu une fiabe di Liala cumò Artemio?» ai veve oponût Ermes. «Ti la fâs curte, insome, se no ti ad che di scoltâ: chêl cà nol saveve né lei né scrivi. Capissitu? Un zovin di passe vinc aign che nol saveve ne lei ne scrivi. Ce vite podaraial vê chel ca? Ma il problema al è che a ‘n dè simpri di plui. Zovins che no san di ce bande che si fronte no dome un gjornâl, ma nancje un stât di famèe, un document de bancje. Di une bande nus menin sot dal nâs la fiabe di chescj zovins tecnolgjics, modernos, a la mode. Di che atre la realtât e jè che, simpri di plui, in tancj e molin le scule cence nancje cognossi i fondaments dal vivi: la peralule, la gramatiche da la socialitât». E cheste tirade Ermes nol varès savut ce rispuindi. Par fortune che Fedele cun da lis borsis sot dai voi che ai rivevin fin ta li bavilis al ere jentrât propite in chel moment: «Afè. E viodin se rivi a tornâ in ca almancul cun chel» al veve dite cjapant su il gjornal. Lassin lis vicencendis da la famèe Martarut e dai lor amis par fâ un piçul viaç ta lis gnovis da la setemane: di un par di aigns ta une cugnussude aziende di formazion furlane di ispirazion catoliche, a clamin a tignì une cunvigne un famôs guru da la comunicazion. E disin che chêst ca al vei dat lezions di vite ancje a Clinton: no stin domandasi ta se materis. Insome, il profesionist in cuestion, la setemane stade al à tirat dongje sis cent personis a scoltalu. E come ducj i guru che si rispietin, par dai la sbrunte ai siò fedei, a la fin da la zornade a jù a fas cjaminâ su li boris: come poleç sul spêt in rosticcerie. Mode par mode, viudût che da l’orient vissin no si rive plui a fa notizie, e vuidût che nancje chei che a varessin di dâ da lis gnovis sui souvenir partâts in cà no an chê di viargi il bec, il Stât al a pensât ben di pandi un puc di panic par la gnove influence di mode chêst unviar. E disin che tal mont e sedi une malatie esclusive: si rive a cjapale dome se propite si è sfigâts fûr di ogni. Ai vol vivût ta un pulinar a stret contât cun animai in plume e mangjâ in continuaziôn Vitasol. A le fin, se dut al va ben, podasi che cjalansi ta un spieli si rivedi a viodi il profil just. Chel di un polaç. Misuraisi di spes le fiere. Mandi.

Buindì Udin, mandi Friûl e bune zornade a dutis lis animis che a cjaminin su cheste tiare. Come di abituidine tachin le puntade cul nestri lunari: Vuei joibe ai 9 (nûf) di fevrâr, o sin ancjemò tal sen da l’acuari, il soreli al è ievat a 7.13 e al va a pognesi as 5 e un cuart dopumisdì. Finidis lis fiestis fevrâr al varês di sedi il mês da la meditaziôn, ma cul carnevâl di mieç al reste pôc ce meditâ. Ancje se lis zornadis a si slungjin fevrâr al è considerât il mês plui frêt da l’an. Vuei a è la fieste di Sante Apolonie, che e a vivût tal tierc secul: cuant che i romans a le an cjapade e i an imprumitût di brusale parce che iere cristiane. Cussì jè an’d a cjapade tante di che pore che si è trate di bessole tal fûc. A sarâ un sclip particolâr ma viudût che e jè la patrone dai dentiscj no steit a pensâ mâl. Ta l’ort: viodût che ta l’ort chel che si pos fa lu vin za dite, provin a scoltâ chest consei. Ca di un pûc, se lais in montagne, cjalait ben i prâts. Se viodeis che son tantis cumieris di farc faseit atenzion: il farc al vîf ta tiaris sioris di sostancis organichis. La tiere de cumiere dal farc a è ben ariegjade, ben masanade e fertile. E alore par une buine miscele, adàte a lis plantis anuâl, messedâit dos parts di terèn di farc, une part di blate (par cui che no l’e de Basse e nol sta dongje dal Tiliment la blate a è il savalon di flun), une part di torbe e une sedon di concime par ogni 20 litros di tiare. Provait! E cumò no nus reste che scoltâ cualchidune des aventuris setimanals da la famèe Martarut: eco le nestre storie! «Stevi lant a cjoli il pan. In buteghe, come dutis lis matinis. Di corse, parce che ta cheste tiare no l’è mai il timp di podè lâ cun calme. O eri sore pensîr. Le spese, le cjase, i frûts… Eh! Come ca no nus sameave vere cuant che e nus disevin, a mi e a Fedele: “cjalait che e restaran par simpri piçui, no stait a crodi, ancje cuant che a varan trente, cuarante o cinquante agns a vi samearan simpri doi canais”. Oh! Se e vevin reson. Ancje cumò che an d’an une cuindis e chel atri sasin an’d a fàs disevot che atre dì, ben, a mi mi parin dos canaiutis. Parcè chest discors? Parcè mi impensevio dal pan, da cjaminâ, dal miò iessi sore pensîr? Parcè che devant dal gjornalâr, cjalânt che locandinis arancion che metin fûr dutis lis matinis, mi ere vignût un colp». Cussì a feveleve fra se e se Marta, intant che a veve il siò moment di plui intense di concentrazion: ven a stai tant che a stirave cu la taule di stir devant dal barcon. Cjalant lis machinis ca corevin cence sens, a si torneve a viodi, tant che a cjamineve, sot un soreli che al sameave di avril e invesite nol ere atri che un mat fevrâr. Un clip che al tacheve a suiâ i vues. E, invesite, su la piel, di un lamp, brombulis come se ator a fòs colade l’Antardide intere glaçant il mont ta une imobilitât cence vibrazions. Piciadis pal mur o ta la vitrine cul scotch o drenti dal cavalet cul nom dal giornal ben in grant, a si ‘n lesin ogni dì e di ogni su chês locandinis arancion o zalis: robaris ai pensionâts apene cjapade la pensiôn, incidents, region cuntre provincie, provincie cuntri comuns. Però che dì lis peraulis a erin atris: e fevelevin di une robe che no ere plui di mode. L’amor. Chel tragic. Chel trement e biel ancje tal siò iessi trement. Un omp, restât di bessol, mat d’amor o dome disperât, a si ere copât parce che vivi cence la so femine no i sarès stat pussibil. Une crôs masse grande di partasi davor: no podeve sta sul tet da la pissule familiâr, no si podeve lassale fûr dal barcon a la matine e nancje sul cumudin prin di lâ a durmî. Une crôs cussi no da requie. Inflamât di dolôr al veve scelgjût la piês muart, la plui eroiche e impussibile par dî al mont che l’amôr no si tradîs. E Marta che a ere sensibile come la gusele di un sismografo a no veve resistût a l’emozion di un gest cussì: devant dal gjornâlar a veve vaiût. No si ere tignude: e veve cjolt il gjornal di che zorande e dai diis dopo, e si ere lete dut ce che e vevin scrit su chel omp che, con sincere umiltât, al veve vût miôr murî che vivi di bessôl. Po’ i gjornaliscj si sa come che e son: an vevin tirade fûr di ogni par podè scrivi di che storie. E vevin scrit che mancul mal che il cuarp dal puar omp no ‘l ere lât subit in font te cjalderie dal acjâr licuit, parce che se no e sares scopiade pies che une bombe. E no vevin nencje mancjât di comentâ trop timp che ai sares vulût a la pulizie par rivâ a tornâ a cjatâ chel che al restave di lui une volte che l’acjâr, dopo une setemane a si sares disfredât. Par ogni rie che lejeve Marta a sintive il grop tal stomi strensisi come s’al fos tirât di cuatri marinars par bande che ta chest mot a volevin fisâ la lor nâf cuntre chêl grant rogan che al steve rivânt dongje. Cul côr pesânt come chê cjalderie Marta e pensave che la vite a larês vivude cun l’anime plene di sentiment, e che chêst mont l’è deventât masse disonest par cjalâ tai voi il rispiet. E lis sos lagrimis a no i vevin permitût di cjalâ l’incident che su la place devant dai siò voi al ere sucidût: un cjastron di fatasinàt cun n’tune machinone di câ a lavie, claramentri di so pari, al iere vignût fûr dal stop cence cjalâ. O mior: lui al veve cjalât… lis cuessis zovinis e pastosis da la murose che al veve apene concuistât. E cussì nol veve jodût chêl che, cu le moto, ai steve passant propite devant dal cofano de machine. PAF! Per furtune nissun al lave a fuart. Chêl de moto, cui brombets che ai giravin tant che lis elichis di un Zeppelin a si ere tirât su da l’asfâlt e come une copasse Ninja al veve tirât fûr par il finestrin chêl puar biât di zovin ancjemò insusît da l’event. Cuatri scufiots e via andare! Aromai la strade e jere deventade une giungle e la int a si feve il codice di circolaziôn di bessole, cumprindudis ancje lis multis e lis puniziôns corporâl par i guidatôrs cence discipline. Intant che Marta a si piardeve tal so sun d’amôr siarânt i vôi su chel che il mont al cumbineve propite devant da la so muse riade di lagrimis, Fedele al si ere cjapât la pause cafè: chêl moment istituzionâl che ogni bon lavorâdor al spiete tant che une pasche tal mieç de matine. L’Everest al ere un locâl di chei che no si podin clamâ ostaries. Par ce che lis ostariês e an da li carateristichîs evidentis, inneabilis. Siartis robis te ostarie no si cjatin: come une butilie di kambusa vecje di almancul cuindis agns, o il 18 isolabella o, se si a la furtune di rivâ ta un puest come che a si devi, une butilie slusinte di polvar di Punt e Mes. Il bar al a l’aredament di modernariât, ains Setante, il banc cul disore in acjâr e la vitrinute insomp, lì che drenti o no l’è nuje o si cjatin i vâs di veri cun drenti lis sardinis rodoladis atôr di une aciughe o chês patetichis caramelis di cualchi manifestazion spurtive che a van di mode par doi dis e po e restin li a inransidisi par ains, deventant part da l’identitât stesse dal bar. Eco, Fedele al ere ientrât al Everest cussient di chêstis cualitâts dal so bar. Fra lis cual a jere ancje la femine dal barist, claramentri no taliane e sinceramentri di no piardisi, che e jere il sun proibît di duç chei che lì a levin a zujâ le schedine. «Afè!» al veve dite Fedele russansi lis mans une ta che atre e cjalânt atôr par viodi la che al ere il gjornâl, sperânt che nol fos te mans dal solit disocupât che al steve oris a lei e tornâ a lei i anuncios cirînt un puest di vore. «Lìs?». Ai veve rispuindut Ermes, il barist e legjtim e orgolios omp da la siore straniere che ere la so femine e che al saveve iessi il sun proibît di dute la gjinie che ai zorzoleve ogni dì tal bar. «No cun sgnape e stravecchio: deh! Ermes sin lunis a buinore satu?». Ai veve rispuindût Fedele. «Lat, alore?» al insistê chel atri che al ere un’ostie. «Vutu viodimi murî di colite? Ti sestu jevât mâl vuei? Sara ti ae tignût sveât fin tart usgnôt? Molimi! Fas il cafè e dimi dulà che tu as il gjornâl?». Ermes, che efetivamentri al jere un’ostie «Velu ca il tiò cafè, ufindarin! E tegniti ancje il gjornâl: lu stevi leint jo ma, sicome che o sai che tu as primure, t’al doi. Lei, lei a pagine undis. Tu viodarâs ce nervôs che ti ven». Sicome che Ermes al cognoseve di ce bande che al leve zuet Fedele, ai veve viarte la pagine propite su l’articul che al fevelave di Porzûs: «Ancjemò! - Al veve dite come s’al ves trat une ostie Fedele – ma no isal ore di finile: ta chist pais nol covente savê ta ce mês che o sin: baste lei lis polemichis sul gjornâl. Un paîs di int prevedibile e cence profonditât!». Ermes al riduzzave tant che al meteve a suiâ lis cjicarîs su la machine dal cafè. «Velu! Velu la che ai monte la rascje! Lasse sta la politiche e lei il sport che se no ti torne la colite! E cence che ti meti jo il lat tal cafè!». Ma Fedele che matine no l’ere dal umôr just par sintisi dâ dal mone. Cussì al veve sbassât il cjâf e si ere inneât ta la leture dal gjornâl. Saltânt a piè pari la politiche che nol ere periodo, claramentri comentânt a vos altre dut ce che al leeve: «Chei ca viodistu a le an capide: prime a si fasin dâ de Region i bêz par comprâ i trenos gnoufs e po dopo jù fasin cori ta lis lineis lì che an plui int o plui visibilitât. Ma e an fat ben a Triest a gjiavai vie dut. A varessin di gjavâi la patente di machiniscj, di proprietaris di trenos. Ma la vevitu sintude chê che e vevin tornât a partâ in Friûl i trenos che ai veve comprât la region e al prin viaç za no levin i cabôts, si, i cessos. Ma ti parie?». Ermes che al ere abituât a lis lagnis no dome di Fedele ma di almancul atris trisinte di lôr, lu smicjave cu la code dal voli tant che al suiave cjicaris e intant al pensave a come ritardâ il pajament da l’ultime partide di cafè e come saltâ l’apuntament cul dentist. «No disitu nuje Ermes? Nancje dal fat che no ti an aumentade la balute dal gjelato? Un euro come l’an passat? Ben no?» Fedele al proveve a provocâ, ma a ere une art lì che, si pos dî cun sigurece, no’l fos par nuje mestri. Il contrari di chêl che al ere bon di fâ Ermes: «Deh! Compagno! E chei canais dal Centro Sociâl? Alore jù madino tal campegjo? Ce furtune, eh?». «No si sa – ai veve rispuindût Fedele – il sindic ancjemò no ‘l a dite nuje. Pues ancje iessi che ju mandedin ta une caserme dismitude». «Joi! Ce vitorie, eh! Compagno! I no-global che e van a stâ tal lôc da la repression armade dal podê capitalist» ai veve simiât Ermes, notoriamentri eletôr di centro destre, che al veve dute la coleziôn da lis butilis di chêl cu la Mossele Grande in biele mostre: «Taseit vuatris! Che vi sta vignînt su ben la blave chest an!». Touchè. Fedele je la veve petade. E Ermes nol veve plui dite nuje limitansi a meti par ben la canevase su lis cicaris. Prime lis armis cjatadis ta une des casermis da citât cun tant di coredo di reperts archeologjics partâs vie di scundon da l’Iraan. E cumô segladis di kalashikov e palotulis e tritolo (stesse cuantitât di che coventade a fâ slatâ par ajâr Borsellino tal 92) trâs ta une roe in provincie di Pordenon e sugjerivin al barist che chescj erin argoments di no tocjâ: mior lassâ piardi e par une volte tasi e partâ a cjase. Fedele al veve cjapat cuasi cun borie il marcepît che lu torneve a partâ a la so scrivanie, cjalânt cui voi slusints il svual di un crovat che in pichiade al cirive di partasi vie chel che al restave su l’asfalt di un gjat masanat da lis rodis da lis machinis. L’ucelat neri al becuceve alc su la strade e po al si lanceve di gnûf par ajâr, zuiant a no fa la stese fin dal gjiat: ven a stai schivant machinis e bus cunt une maestrie che e sbleleave il trafic e le vite. Al ere il stes ucelat neri che al veve judut Josh cjalant fûr dal barcon da la so classe, tant che il profesôr al gjrave par viodi cemût che al steve lant la prove di metematiche. «Ti mancjavis nome tu, bastart» al veve pensât Josh cjalânt l’ucelat che come che ducj e san nol parte tant ben. «Nol bastavie il nono Berto, usgnot». Josh a si ere sumiat so nono, muart di tancj agns. Di chel parint il fatasin al veve une biele impression, ancje se s’al impensave pûc. Dome che il nono muart a si feve viodi in siump dal nevôt nome par partâ sfighe. Sabide di gnot, Josh a siere sumiat che al steve cjalant la partide in Curve Nord cun so nono dongje. A un siart moment il vecjo ai veve dite: «Rigore è quanto arbitro fischia» e savin come che e jere lade. La gnot passade Josh lu veve tornat a cjatâ tal siump: «’Ta tent nono: lasse piardi la Coppa Italia, vae ben???». Lassin in bande lis aventuris da la famèe Martarut e vignin a cualchi gnove de setemane: Intant che i sindics a cirin di rivâ a une dicision su la cuestion da lis domenis viartis par lis buteghis dal Ambit teritorial di udin che, impensinsi al è considerât comun turistich e par chest i gestors e podaressin fa ce che ulin, a son sipri di plui lis buteghis che la domenie e restin viartis: sie par il bon timp, sie parce che e jere il mercjat da l’antigae come ogni seconde domenie dal mes in place san jacum, sie parce che ai vol vindut, cjaminant pal centro a si podeve lâ a comprâ di tantis bandis. E a cheste richezze e fas di contrâltar, e l’è propite il câs di dilu, la situaziôn tragiche da la glesie che no a plui omps (e feminis) di dedicâ a la cure da lis animis: a son restâs in 1000 i religios ta la diocesi di Udin, (predis, munis e fraris) ma simpri plui glesis a son cence plevan al pont che simpri di plui la Glesie e cjape su ben volentêr la man che la int no consacrade e i dâ. Se calin i predis a cressin i stranîrs che vivin a Udin: in 5 agns i sin passats di 3.800 residents a cuasi vot mil di lor: par prins a son i albanes, dopo e vegnin i romens e i ghanes e ducj chei atris par un totâl di une trentine di etniis difarentis. Int che ven e int che va: a son cuasi 300 i profesôrs che stan scelgjint il prepensionamênt al lavôr te scuele: pluitost che la indenânt cussì e an miôr fa il timp a mieç e vivi cun plui serenitât.

Vuei joibe ai 2 di fevrâr, o sin ancjemò tal sen da l’acuari, il soreli al è ievat a 7.22 e al va a pognesi as 5 e 1 minut dopumisdì. O sin in cressi di Lune e, alore, se o vês di taiasi i cjavei par tornâ a faju vignî su plui fuarts cheste e jè l’ore di lâ in barberie. Vuei a è la fieste di Sante Sabide, che a è sante dome a Roncjs, e là atôr te basse. Gilberto Pressac al diseve che a ere la trasformaziôn in sante da lis ritualiltâts giudaico-cristianis da la glesie aquileiese che ta che zone erin nevore praticadis. Che atre sante dal dî a è Sante Adeloghe da la cual no si sa nue e cussî cunt i sants o vin finût. Ta l’ort: come par zenâr ancje in fevrâr l’è miôr che al sedi frêt e magari cun tante nêf. Par cui i dîs di cjalt che o vin vût a no son stâs boins par nue: cuestions di ponts di viste. Un consei par lis plantis in cjase: netait ben bel lis fueis des plantes cun un puc di coton bagnât te aghe o, miôr, tal lat. Ancje se l’è bon timp no stait a partâ fûr i vâs e, se voleis podeis tacâ a dai un pôc di concime. L’ultin consei: ai ficus benjamina no i plasin lis curints di ajâr e gambiâ spês di puest: no son pendolars che cjapin il treno e po dopo e restin tal frêt tal mieç dai cjamps. E cumò le nestre storie: «Ven ca, ven ca po’ Marta – al veve sberghelât Fedele scrufuiât sul sofà denant de “so” television a schermo piatto – ven a viodi!». E Marta, poc convinte ma curiose des maraveis che le gnove television e podeve mostrâ, e veve molât chêl che steve fasint in cusine par cjalâ ce che il so omp al voleve fai viodi. Fedele, in tute di ginastiche e imberdeât ta un pleit a cuadretons arançon e vers, al veve i voi lusints incolats sui pixel dal “grande schermo piatto”. Par un secont Marta lu veve cjalât vergonantsi di vê par cjase chêl biât e po’ dopo e veve poiât i voi su chêl cuadri dispicjât che al ere il gnûf caselot: «Oh, Signôr! E mi fasitu cori par viodi chês porcaries cà, cumò?». «Porcaries? – al veve rispuindût Fedele – Porcaries? Chês cà a son la massime espressiôn de “cultura delle nostre montagne”! Son tradiziôns milenaries! A jè le storie che nus cjale! E, cumò, le nestre storie e vignarâ cjalade in “mondovisione” di dut il pianeta!». «Tu ti zavarieis!». A Marta i voi i erin lâs fûr dal cjâf. E saveve che a Fedele i plasevin chês robis di tradiziôns popolârs e prucissiôns e su par lis montagnis la gnot di Nadâl cul ferâl e “avanti”! Ma ce vevino a ce fâ cun jè ches mascaratis! «Marta: sono i Krampus di Tarvis! E jù an vulus a Turin par lis olimpiadi, capisitu!». «Di cuant in ca ti interessie l’olimpiade cumò… – al veve dite Josh ientrant tal tinel – Nol erial muart a lis Termopili il spirt olimpic, papà?». «Setu tornât, si falulele. – ai rispundè Fedele simpri legri come un funerâl cuant che al scugnive confrontâ la soò braure di pari cun’t chêl scjavelon rasta di siò fi – va là clame to sur che o mangjin». Ma la picjule di famèe, picjule par mut di dì parce che e veve dibielzà sedis ains, a ere za imbande di siò pari: «Oh, stele, sestu già chì?». «O ai di fevelati». Le ultime volte che so fie ai veve dite chêstis peraulis, dopo una gite scolastiche a Firenze di tre dîs, a Fedele i erin vignuts i cjavei blancs: «Jot che se l’è stât chel de Somalie che tu as in classe, cheste volte ti copi» Al veve dite il pari di famèe gjielos pies di un trapanes cjalant tai voi la fie. «No, scolte, a no è cuestion di murôs, a è cuestion di bês». A Fedele i ere vignude une miege paralisi: «Bêz?» Al veve tornât a dî catatonic, ancje se un poc solevât di no vê di scugnî fa, par la fie, un dopli matrimoni: un a Madone des Gracies e un a Mogadiscio. «Astu di comprati il motorin gnûf? Astu di fati un lilfting? Scugnitu là a lis termis cu li amichis? Astu tacât a fumâ? A ce ti coventino bêz cumò?». Virginie, che al contrari di so fradi a ere une persone cul cjâf su lis spalis, e veve cjalât so pari cun’t un pocje di rabie e un poc di compatimênt: «No, papà. I bêz mi coventin par là a scuele». Fedele cu la bocje viarte a metât e la muse dal cjondâr: «Ma no vatu ta une scuele publiche. No partitu gia a scuele la cjarte, chês par lis fotocopis e chê par disegnâ. Ce veiso di fâ dai bês?». Nol voleve capî chêl ominut grant e gruess, soredut gruess ma sportif che al voleve a ducj i coscj vê un bon rapuart cu la fie che al adorave. «Di Rome no rivin plui bêz, no cognossitu tant ben la finanziarie? E cussì lis scuelis e scugnin domandâ bêz a llis fameis par podê dai un minimo di cualitât a lis ativitâts di laboratori». E veve rason Virginie: ta chei dis, a confuart des sos peraulis, l’asociazion dai dirigjents de scuele e veve mandât fin une letare a Ciampi disint: “i dirigenti scolastici non vogliono rassegnarsi a diventare i commissari liquidatori del fallimento economico e formativo delle scuole loro affidate”. Come che a si dîs di chestis bandis: une vere Caporetto par la scuele. Fedele, convint sostenidôr de funziôn dal servizi public al veve imediatamentri mitude man al tacuin. Ma intant che lu faseve al veve ancje tirade une ostie: «Eco la che o sin rivats! Il Comun da la tiarce citât italiane par numar e cualitât da lis aziendis che fasin publicitât al va a clamâ un publicitari di Modene par fa il “rilancio” dal turisim e chel ca ce i racomandial? “Ci facciamo dare dalla gente l’idea per lo slogan che sosterrà il rilancio della città”». Josh si ere voltât cuasi cjapant pore da la furie di siò pari: al ere stat lui a voltâ canâl e a meti sul tre par scoltà il telegiornâl. E alore, cun’t tipiche manovre di un che al fâs arts marziâl, al veve cjapade la nule nere che rivave di siò pari par tornâ a mandaiale indaûr: «No dome – al disè Josh – e spindin beçonos pe promozion turistiche e intant no si pol lâ pes stradis cence i stivai di cuesse». «Tu puedis ben dilu» e veve sberlât Marta da la cusine «Par lâ al supermerciat dongje de staziôn mi an lavade tre voltis ieir! Dome da la fermade dal bus a le puarte. E astu mai provât a fale in machine che strade? Su la Parigj Dakar, di sigûr, tu cjapis mancul crocs tâl cjaf». Ma cun’t un gest Fedele al veve fermât dutis lis vos de so famèe. La siorute triestine che jù cjalave dal caselot e steve leint une gnove che no si podeve piardi: «Sono almeno sette mila le famiglie friulane nel club dei ricchi» e disè la gjornaliste. A steve contant a la famèe Martarut, che propite siore no ere, che ta siet mil altris fameis i cont in bancje dopo il prin numar a vevin almancul altris sîs zeros. Migono monadis! L’associazion des bancis, e continueve a lei la gjornaliste, e a calcolât che a son almancul siet miliarts e mieç di euro il patrimoni che i plui siors de citât e vevin in bancje. Ma il particolâr plui interesânt al ere che chiscj siors (si podeve propite clamaiu cussì) e vevin une etât tra i 60 e i setante cinc agns. «Ben, insome – al disè Fedele tant che Marta lu cjalave cul voli di cui a ti sta disint tâs, cjondar – o pues ancjemò rivâ a faiale, no femine?». Ma la so femine e veve za zirât i voi par poiaiu sul caselot: «Viôt ca – e disè la Marta, minghirligne e gnarvusute – ce ospedâl che nus stan tirant su te nestre citât, viôt ca». Marta e ere orgoliose di che struture che, ca di cualchi an e dopo ve spindût, se dut va ben, 370 milions di euro e restarâ tra i prins ospedâi in Italie. «Viôt ce – al veve rispuindût Fedele, ancje se no l’ere lui il sogjêt di che esclamazion – no astu sintût che no san dulà cjatâ fur 170 milions par lâ indenânt?». Fedele al ere un bon omp ma al veve un vizi: se al podeve sputanâ… ben no l’ere nuje che al podês tignilu: lui al sputanave. «Che ca e sta deventânt une cjtât simpri plui strane: ti impensitu lis fotos di chel siôr che l’a scrite la letare sul Menzognero che atre di? Che cun dutis chês fotografîs di buteghis dal centro siaradis? Un dì prin nus vevin fatis viodis lis fotos de fieste dai albanês, e ancjemò prime, chês dal ricuart di Nicolajevka. E come se no’l bastas, une pagine intiaere su via del Gelso che sta murint, intant che l’Universitât de Liberetât a sta cressint. Jo no rivî plui a capile cheste citât» al veve concludût Fedele, nissant il cjâf. «Tu as dismintiât alc – ai veve fate eco Josh – no astu sintût ce che an dite i carbugners: “continua instancabile lo smercio nelle scuole di Udine”. Ta dutîs: e plui an cjapin e plui an nassin». PAF! Fedele ai veve dat un scapelot tal cjâf a siò fi. «Ma se fasitu?» «Tas! Al è preventîf». Al veve concludût il pari di famèe che in chel moment si ere sintût tant che un patriarcje. «Finisile» e veve vosât Virginie che cheste nus interese». «Rincarano gli affitti delle case popolari» e veve dite la solite gjornaliste che, se nol fos stât par il veri dal caselot e podeve sentasi in taule cun la famèe Martarut. «Vele la che la cjapin la che nus sta ben ancje cheste volte» al veve comentât Fedele. «Dal cuatri al sîs par cent. Ah! Però nus piturin lis casetis da la pueste par vignini incuintri». «Fedele!» ai veve sberlât Marta cuasi cun la pore che il president da lis cjasis lu sintis e ai gjavas che fortune «Fedele, tas che a è colpe da l’inflazion». A chist pont, dopo ve tirât fur bêz par la scuele publiche de fie, ve scoltât i progjets dal comun che nol comedave lis stradis ma a si faseve fa un marchio gnuf di une aziende foreste, ve scoltât che par deventâ siôr no i bastavin cuindis vitis dal siò salari, che l’ospedâl al sares deventât biel ma no erin i bêz e che par finî ai aumentevin l’afit, dopo dut chest Fedele al veve un siart zirament di scjatulis. «Si, bon vonde, no? Ce ‘mancjal ancjemò par vue». «Al nevèe». E veve rispundût in rime la piçule Virginie. Chestis lis vicendis de nestre famèe par la setemane in cors. Ma te nestre citât di robis an son passadis no pocis: Une gnove frescje frescje nus rive dai gjornâi e nus met tante malincunie: la Provincie di Udin a mandât fûr disenûf concors par deventâ impiegât. Fin ca nuje di mal. Sa nol fos che a chescj concôrs e an rispuindut in cincmil e dusinte di lôr. Une vere sconfite par il Nord Est che di cualche an no si sint nancje plui nomenâ: altro che deventâ ducj imprenditôrs, e altro che “popui da la partide iva”! Ca apene ca si pol si cîr un puest fis (magari statâl o jù di lì) e che a fa i imprenditôrs ai pensedin chei atris! Insome la int e a pore: no son plui bêz atôr e ca di un pûc tornarin a comprâ ancje il pan cunt un finanziament. Par furtune che jè le Universitât di Udin che nus ten su il côr: Tal periodo 2001-2003 (i risultâts e son vigûs fûr di pôs dîs, e jè risultade fra lis primis in Italie par i nievei de ricercje ta lis facoltâts di veterinarie, medisine e matematiche Fra lis altris robis pasadis in citât ricuardin il Premi Nonino che, rivât a la trenteunesime ediziôn, ancje se lu fasin a Percût, la domenie di matine al fâs vignî i premiâts in cjscjel par un salût a la citât. No c’entre nuje cun Udin ma e fas un pel ridî (e par furtune che jè lade ben) l’aventure di tre pordenones: si son mitûts a infumeâ i salamps te cjanive di un dai tre. Sicome che al faseve frêt an pensât ben di no viargj il barcon par fa lâ fûr il fum. Cussì il monossido di carbonio cuasi cuasi jù copave: tâs che son rivâts a lâ fûr in timp! Par punizion e restaran cualchi dì te cjamare iperbariche par netâ il sanc e i polmôns. In tema di scjafoiament ancje une gnove che rive di Triest: a son 251 i presonîrs dal “Coroneo”, la preson da la citât gjuliane che iere stade progjetade par tignintin 155. D’acuardi che no son farine di fâ ostis, ma tignijù come wusterl tal sachet no nus pâr biel. A no n’ dè di gnovis par chel che rivuarde il trafic di armis da la caserme udinese di vie San Roc: e cheste a è une gnove che, come la richieste di traferiment da la procure di competenze, no è une biele notizie. Tal sport, dut chêl che l’Udinese no fâs a lu cumbine la Snaidero.