... «Lisboa» … Bundì Udin, mandi Friûl e buine zornade a dutis lis animis che cjaminin su cheste tiere! O vês za capît là che lis aventuris dai nestris amigos nus partaràn cheste setemane, nuie che mancul a Lisbone. Cun di fat: «Lisboa» al veve tornât a cjantâ Odillo tant che, sveantsi, al cirive di tirâsi come la cuarde di violin sul mani, cu la difarence che il violin al à il mani dret e al incuintri Odillo al scugnive ingropâsi tra une sinte e che atre da l’avion. «Oh! Ti sestu sveât si, cjastron. Cumò che o sin rivâts…» A Guerrino no i lave di lei la vuide che Wanda a i veve regalât par la lôr transferte in Portugal. Cussì al bramave che Odillo lu stes a scoltâ tant che lui ai spiegave za lis primis gnovis da la citât che lavin a cognossi. E al incuintri Odillo, come sô solit, al veve vût miôr inamorâsi da la hostess e si ere fate partâ une bire daur che altre, sbandonânt il mont dai sveâts pôc dopo la partence da l’aeropuart. Cussì Guerrino al veve scugnût leisi dute la vuide, cjalânt fûr de barconete da l’avion che al coreve a no si sa trops chilometros incuintri a l’Ocident. Si, parcè che Lisbone, là che la nestre cubie di operaris specializâts a jere direte, a è la capitâl plui ocidentâl dal continent european, un puint viers il mâr spalancât che al a nom Atlantic, ancje in onôr di chê popolazion tant mitiche cuant sparide che apont si ere dade il non di Atlantidi. Cussì Lisbone a è la citât che a cjale viers il passât, parcè che si sa che il soreli al nas a orient, Lisbone a cjale al îr, al mît, a chel che no l’è plui. Sarâ par chest che lis sôs formis, lis sôs stradis, i sei mûrs a son plens di ricuarts, di nostalgjie, di “saudade”. «Guerrino! Guerrino! Ma tu, sâstu che in Portugal a an almancul cincuante mûts difarents di fâ il bacalà?». Guerrino nol veve vude nancje voie di rispuindi a Odillo. Ancje parcè che chel al jere aromai cul cjâf drenti tal prin plat di bacalà tant che al smicjave une birute di litri. Cussì al si ere implenât i polmons da l’aiar di mâr, anzit aiâr di ocean Atlantic che al rivave da par dut, tacant a cjalajâsi ator, cul mût di fâ di un vecjo marinâr che al nase lis bugadis di vint par proviodi rogans o sglavinadis. «Eh, eh, Guerrino, ce dîstu, nol isal un popul evolût chest ca, che cunt un sôl pes al rive a fâ almancul, e torni a dî almancul, cincuante recipis difarentis? Bon o sin ca par lavorâ e no varin tant timp par lâ ator, ma a sere, impen di mangjâ in albierc lin a cirisi une biele tratorie e lì, jù: bacalà». Odillo a jere al setim cîl, come che a si dîs, parcè che al lave mat par il bacalà e il fat di jessi ta la patrie di chest pes a lu faseve lâ fûr cul cjâf. Ancje se, si scuen precisâ che, di sigûr i portughês no si la gjavin mâl cunt chest pes dal gjenar Gât che a pescjin tai mars dal nord, ma l’Italie e reste il pais che al consume il plui grant numar di toneladis di bacalà, che al ven impuartât in difarentis misuris propite par dai mot di jessi ai difarents marciâts talians. Ven a stai che a Napoli a mandin un bacalà di une cierte misure, a Vicenze une altre, a Turin une altre e ca di nô une altre ancjemò. Il famôs “gato” come che lis nonis lu clamavin ta lis buteghis di paîs une volte, sconfundiint il non latin (Gadus di fat) cun chel da la cualitât. Ma vignin alore a fevelâ di cheste citât, Lisbone, ven a stai la capitâl dal Portugal, la capitâl plui a ocident dal continent european, l’uniche che a poe i pîs diretamentri su di un ocean. Di spetacolâr bieleçe, a samèe che Lisbone a sedi stade fondade dai Fenici, il popul di marinars che prin dai romans al dominave, cun lis sôs barcis, l’intîr Mediterani. Intîr al pont che a jerin rivâts ancje a meti jù le prime piere di une citât che podopo lor a vevin clamât Alis Ubbo. Cuant che la penisule iberiche a jè stade concuistade dai romans cheste citât, che a stave crissînt a la fôs dal Tago, a vignì clamade Olisippo, dopo Olissipona e po’ Lissapona, par finî come che nun vuê la cognossin, ven a stai Lisbone. La capitâl dal Portugal, a rint il lunis mancul pesânt a cuasi 600.000 (sîscentmil) personis, che svenansi a si cjatin devânt il spetacul imperdibil da l’oceano, intant che altris 3 milions di portoghes a anc scrite su la cjarte d’identitât la residence lisbonese. Come che o disevin a Lisbone si respire un aiar di passat prisint che al a striât tancj artisç, locai o stranîrs. Al è clâr che no si po’ fevelâ di Lisbone cence recuardâ il grant poete, intelettuâl e scritôr Fernando Antonio Nogueira Pessoa, universalmentri cugnussût dome cul nom di Fernando Pessoa, muart a 47 agns dal 1935, e che al fo un vêr acrobate da la peraule, da la coniugaziôn verbal za di par sé complicade da la lenghe portoghese. Lassant inbande Pessoa, par cumò din une cjalade a ce che a cumbinin Guerrino e Odillo che, nancje spetassile, propite par la grande insistince di Odillo, dopo vê lassadis lis valis in albierc a si stevin gjoldind il prin di une lungje serie di plats di bacalà sintats tai taulins di une tratorie in rive al mâr. «Vè, Odillo, o savevistu che Sant’Antoni di Padue a no jere di Padue nol jere di Padue ma di Lisbone?» ai veve dite Guerrino prin di implenasi la bocje di un delizôs bocon di bacalà. Il so coleghe al steve fasint la stesse robe, ven a stai implenasi spudoratamentri la bocje di bacalà, par cui al veve dome rumiât alc tirant un pûc in su la cèe diestre. «Si, si. Al jere nât cà di famèe siore e podopo al vignî in Italie, dulà che al cugnossê sant Francesc e lì che, disin, al deventâ il sant che ducj o cognossin». A Odillo dai sants ai interessave pûc, ancje parce che, pur no jessint tant publicizzade da la vuide di Guerrino, la trattorie là che stevin cenânt ai sameave propite un paradîs. Duc câs, Sant’Antoni al jè un dai sants plui venerâts dal popul portoghês che si riten nevore religiôs. Religjosamentri e laicamentri. Pensait che il lôr “credo” plui fuart al jè costituît di tre “f”: ven a stai Fado, Fatima e Futbol, lì che il prin nom a si riferis a la musiche tradizionâl di Lisbone, il fado. La seconde, a nol jè difficil capile a si riferis a Nossa Senhora de Fatima, ven a stai la madone dal famôs santuari che al è a pus chilometros da la capitâl e, par ultime la ultime f a è che dal balon, futbol come che a disin, fobal come che si dis ta la basse, rapresentât dal plui grant zuiadôr dal cual il Portugal a si impensi: Eusebio. Lisbone a strie, come che o disevin cualchi minût indaûr parce che a à une lûs che nissune altre capitâl europeana a rive a vê. Forsite dome Marsiglie a à une lûs e un aiar cussì impressionânt e indimenticabil, ma sicome che o vin decidût di fevelâ dome di capitâls e Marsiglie no è une capitâl o podin ben dì che nissune da lis altris citâts europeanis che larin a cognossi, a à da la sô une lûs come chê di Lisbone. Une lûs e un biel viodi che la citât Lusitane a à simpri gust di meti in mostre. No l’è par nuje che Lisbone, jessint une citât che a sta su une schirie di culins in rive al mâr, a dâ il miôr di sé cui “miradouros”, ven a stai da lis teracis che si viargjin sui puescj plui biei da la citât. E se, come dutis lis plui grandis citâs, Lisbone a à une part moderne, lì che par esempli come tal cuartîr di Belèm a si podin viodi dai centros culturâi di interes internazionâl, la part plui biele da la citât a è, sicuramentri, chê dai cuartîrs plui vecjos. Lûcs lì che si nase la vere anime da la citât, lì che si sintisi tai cafès par mangjâ chel altri plat tradizionâl dal Portugal, il bife, nuje che mancul une bisteche normalissime, o lì che si cîr di cercjâ che altre specialitât lisbonese che a son i Pasteis di Belèm, da lis pastis cu la creme che par rivâ a mangjâ varès di sorbisi une buine mieçe ore di code devant dal local plui famôs che li vent, claramentri tal Barrio di Belèm. Lisbone, come che o vin dite a è une citât dividude in cuartîrs, di chescj cualchidun al è particolarmentri cugnussut come chel di Belèm che o vin bielzà nomenât. Altris mancul ancjemò plui cugnussuts al grant public par vie di un grôp musical che al à partât par il mont il sô nom, ven a stai i Madredeus, che a cjapin il nom dal cuartier lì che a son nassuts e lì che si cjate un dai museus plui impuartants da la cjtât, il museus dai azulejos. Parce isal impuartant chest museu? Alore: prin di dut parce che a lu an mitût drenti ta une da lis plui bielis costruzions da la citât, il convent baroc da la Mari di Diu, tirât sul principi dal 1.500. Une costruzion che, di bessole, a vâl la pene di jessi visitade in lunc e in larc. Lì drenti, dal 1971 a an mitût il museu nazionâl di art antighe, dal cual, une da lis plui bielis seziôs a è propite che dedeade ai azulejos. Ce sono? A son il vant di ogni cjase portoghese e lisbonese in particolâr: ven a stai da lis decoraziôns che vegnin fatis cun da lis piçulis piastrelis che, par la lor composiziôn, a an solitamentri un colôr turchin, dal cual al rive il lôr nom. I azuleios a furin impuartâts in Portugal dai arabos puc dopo il mil e di che volte a son deventâts part da la culture tradizionâl dal pais iberic. Viudût che no seis in direziôn, continuant a seguî il mâr viars la periferie da la citât o podeis rivâ al Oceanari di Lisbona, il prin acuari public che al sedi rivât a cjapâ la certificazion di cualitât. Ta l’Oceanari, che a si cjate drenti tal Parco da lis Naziôns, chel che la capitâl portoghese a a tirât su dal 1998 ta l’ocasion da l’ExpoUniversâl, o podarês cjalâ alc come vot mil animai e plantis di 500 species difarentis, lassansi partâ ator da la visite vuidade, tal mieç da lis ambientazions atlantichis che no escludin ancje l’ambientazion Antartiche. Ma no steit pensâ di cjatavi di bessoi ta cheste maravèe: di cuant che lu an viart lu an visitât za in plui di 10 milions di personis. O savìn che Guerrino e Odillo no an tant timp di pierdi a lâ ator. Ma viodût che a si son passuduts ben e no mal di bacalâ a podin ancje fa une altre cjaminade par la citât a viodi chel che al val la pene di jessi viodût. Come la Tor di Belèm, che cu la sô intense fuarce cuadrade a fâs capî trop coragjo che an vût i navigadôrs come Vasco De Gama che di chi a son partîs a la scuvierte di monts gnûfs. Se il timp al è biel no si pues dismenteâ di trai une voglade a la citât dal miradour di Sante Lussie o di chel da la Porta do Sol. Il dut prin di lâ su fin tal cjscjel di San Jorge, li che, come che a dîs la liende a scomençà la storie da la citât e di lì che dute Lisbone a da la miôr lûs che a si cognossi. Par cjatâ biele int a si a di rivâ tal cuartîr dal Chiado, là che o cjatarês cjetancj zovins, teatrots, scuelis di art, e locâi. Come il plui famôs di ducj che, come ducj i locâi famôs al larès lassat in bande. Ma al merete une visite (une vore turistiche ma par une volte podin concedisile) dome par la statue di Fernando Pessoa, sculpide in mût che al samei sintât ta un dai taulins dal locâl la che lui, par da bon, ai à lassât il fiât.

Bundì Udin, mandi Friûl e buine zornade a dutis lis animis che cjaminin su cheste tiare. Se o veîs scoltât la puntade da la setemane stade, si impensarês che Guerrino e Odillo, i nestris dôi operaris specializats, a son a Parigi che si preparin par lavorâ ta la fiere da la plui grande citât francese. Ma sicome che a son rivats di domenie di sere a si la stan gjoldînt cjalânt vitrinis e biele int sui Champs Elisèe, ven a stai la strade plui importante da la citât. Une sorte di vie dai Fori Imperiali a Rome. Sta di fat che propite su che vie a fasin dutis lis sfiladis uficiâi, su che strade il president da la Republiche al salude la int e l’esercit cuant che a si mostre in public. Lì a si erin cjatâs almancul un milion di frances la sere dal nûf di lui par fa la fieste a une cope dal mont che invesite a jè lade in altris mans. Insome: se Parigi al è il cor da la France, i Cjamps da l’Eliseo a son il cûr dal cûr da la capitâl dai nestris cusins di là da lis Alpis. Ma sino sino propite sigûrs che chêl plui uficiâl al sedi ancje il lûc veramentri plui rapresentatîf dal cûr da la France? Al è clâr che come dutis lis citâts che si ripietin Parigi e à une muse viarte, che a mostre a ducj, biei e bruts che a vegnin a viodile. Ma and’à ancje une muse platade, claramentri. O, podaressin dì, recuardant chel che o vin dite ta la prime puntade dedicade a cheste citât, se a jè vere che dentri une grande capitâl no sta dome une citât ma tantis, cussì come che and’è citât sot, disore e imbande di dutis lis grandis citâts, o puedaressin dì alore che Parigi a mostre a ognidun la muse che chest al ûl fasi mostrâ. Si vae a Parigi par viodi la Tor dal sior Eiffel? Alore la plui biele muse a sarâ chê: e a è une muse tirade su in doi agns (tra il 1887 e il 1889) su progjet dal ingenîr Gustave Eiffel che a veve di deventâ la puarte di ingrès a la Esposizion Universal dal 1889 (an tal cual a colevin ancje i prins 100 agns da la Rivoluzion Francese: migo monadis!). La tôr a è state tirade su di 300 carpentîrs metalmeccanics, che an zontât un cun chêl atri alc come 18.000 tocs di fiêr, doprant mie milion di bulons. «Ohu!» Al veve zigât Guerrino ta lis orelis di Odillo che siarânt il so spolvarin a l’ajâr friscjut di Parigi lu cjaleve un fâ impressionât ma ancje plen di fan «Odillo, sint ca. Chestis a son robis che ti fasin capî trop che une nazion a è indenânt: par tirâ su la Tôr Eiffel, ancje se a jerin a la fin dal ‘Votcent e no vevin dutis lis normis di sigureçe che o vin cumò, al è muart dome un operari, colât jù tant che a metevin adun i ascensôrs». E cun che Guerrino al veve tornât a inneâ il nâs ta la guide di Parigi che Wanda, la sô femine, ai veve comprât par l’ocasion, parceche Guerrino al sarà ancje un operari, ma al è pur simpri un laureât in filosofie. E al lui ai plâs tignisi agjornât. Tornânt a cjapâ il discôrs da la Tôr Eiffel, podin recuardâ che il simbul da la France, che sul principi no l’jere plasût a nissun e che, adiriture, a veve di jessi disfade une volte finude l’Esposiziôn Universâl, al rive a plui di 300 metros di tiare, se no si contin chei atris 20 metros di antenis che ai fan di ponte e a pese in dut 10.000 toneladis. Su di jè, ogni an a montin cinc milions di personis par cjalâ Parigi da l’alt e, crodemi, al fâs simpri un biel efiet. A part lis vicendis personals par piturâ chest mostro di aciâr a coventin ogni 7 agns, 50 toneladis di vernis. E cumò une piçule particolaritât: lis misuris che o vin dât a restin simpri vaghis par ce che, tant par dinsint une, cul cjâlt la tôr a si slungje ancje di 15 centrimetros! Par il rest la domande che cuant che si cjale di sot a cheste bestie di robonone jè: ma a ce conventiâl? E la rispueste plui precise a jè: a nuje. La Tôr no covente a nuje: a la fin dal ‘Votcent ta l’ultin plan da la tôr a vevin fate une pissule ciamare lì che a fevin esperiments di radiotelegrafie cence fii. Cumò che cjamare a è restade come un piçul museo che si pues cjalâ dome stant di fûr e smiciant drenti da lis barconetis dai pipinots in cere che fasin finte di fâ esperiments. Podopo i militars a vevin capît che la Tôr a podeve jessi doprade, viudût che a jere cussì alte, par mandâ messaç a lis nafs e ai dirigibii. Par il rest nuje altri. Se no il fat che tal 1925, Victor Lustig, un artist plui che un lari, al è rivât par dos voltis a vendi la tôr. E ca no si disi mâl dai româns cuant che a vendin Fontana di Trevi. Guerrino e Odillo a continuevin a cjaminâ par Parigj, smicjânt vitrinis, biele int sintade tai bistrò sui Cjamps da l’Eliseo, e lant viars l’arc di Trionf, che i franceis a an tirât su par dai la juste glorie a lis armadis di Napoleon. Difati se o laìs sot da l’arc o pedeis viodi dutis li targhis che recuardin lis grandis batais e concuistis dal piçul cors, e no tal sens di vie ma tal sens dal piçul gjeneral che si nominò imperadôr e che al jere nât in Corsiche, ta chel di Ajaccio. «Cà a scrivin che Napoleon a lu vevin soterât propite ca sot» al diseve Guerrino a Odillo stringjnt ta lis mans la so inseparabile vuide. «Ma dopo lu an partât a l’Hotel des Invalides, che no l’è par nuje un albergo, se croditu» e cun chês peraulis Guerrino al cjaleve cun fa di sfide il so compain: ancje parce che chel al veve di sigûr fat frances a lis medis e alc a si impensave come che al diseve lui, ma Guerrino al jere fì di emigrants e par une sorte di proprietât transitive al crodeve di cognossi dutis lis lenghis dai pais lì che so pari al jere stât a vore. «Ah, no? Mi pareve strani che metessin un imperadôr… ben si insome un ex imperadôr in mostre ta une casse mitude tal mieç da l’ingres di un albergo». A Guerrino ai vignive di ridi: une laurèe no faseve di sigûr il cjâf di une persone. E pur jessint laureat ancje Odillo, ogni tant al colave par tiare come un piruç. «Odillo! L’hotel des Invalides al jè une glesie laiche che li che i franceis a meti a polsâ par l’eternitât i lor plui granç omis». «Ah!» al veve riuspuindût pûc convînt chel atri. Tornât a l’arc di trionf: la tombe di Napoleon a jè state cambiade cun che dal soldât scugnussût, e chest al jè deventât un dai lûcs plui impuartânts da la patrie. Su di lui a bruse une flame eterne a recuart da la storie di France. La sacralitât dal lûc dut câs no è ricugnussude di duç: famose a jè stade che volte che un siôr plui par ridi che par malizie a si è presentât sot da l’arc di trionf cun une farsore, le spongje e i ûfs e al à fate une buine fartâe fasinle cuei sul fûc da la flame dal soldât scugnussût. Ancjemò plui famose a jè l’imprese di Cherles Godeffroy che tal 1919 cul so avion al jè passât par sot da l’arc a dute velocitât: al voleve protestâ par la pucje atenziôn che l’esercit dal timp al dave a la aviaziôn. Juste par jessi precîs al veve dome tre metros di ajâr tra la ale e il mûr. Ce podino di? Bulo! Prin di passâ a altri podin recuardâ che tal puest lì che cumò al jè l’arc di trionf i cualchidun al veve progjetât di tirâ su un grant elefant in muradure. Ma grant eh! Almancul 50 metros di altece. Drenti a varessin cjatât puest salis di riunion e di concert e lis orelis da l’elefant a varessin vût di fâ di altoparlante par fâ scoltâ la musiche a dute la citât. Plui tart invesite, cuant che par un periodo i lavôrs di costruzion da l’arc a jerin restâs suspindûts, un architet al veve pensât di trasformâ il dut ta une grande fontane che a podeve dai aghe a un flun che al varès vût di cori di lun su duç i Cjamps da l’Eliseo. Insome la fantasie no je mai mancjade ai nestris cusins de France. O vin dite che un dai nestris doi protagonisç al jè famôs par la fan e par la sêt. Nomo? Difati, pur vint bivût in avion prin di dismontâ a Parigi e pur no vint dismintiâde la sô sêt epocâl dilun su la strade, Odillo cumò al tacave a sintî il stomi e il fiât che a devin segnâi di maravèe. «Guerrino! Ce si mangjal di bon a Parigi?» «Tu m’al as za domandât Odillo. Tu m’al as za domandât. Fan e nini?» «Dome fan? Ancje sêt! Ce croditu che no fasi lis robis par ben» al veve rispuindût Odillo. E alore Guerrino orientansi cul jutori de sô meraveose vuide lu veve partât ta un dai plui biei puesç di Parigi: il Marais. Chest ca al è il cuartier da la capitâl francese lì che si cjatin i zovins, i artisc, i sdrondenâts e chei che ai plâs, di une citât, no viodi lis stradis segnadis par i turisç ma lis stradutis mancul cugnussudis e plui platadis. A dì il ver il Marais no l’è propite tant scundt ancje parce che al jè tal cûr da la citât, tacât da Louvre, di Notre Dame, ven a stai il domo di Parigi che al jè biel di gjavâ il flât, e dongje a tantis robis bielis. Ma se o ves chê di lâ ta la capitâl francese, il puest lì che rivares a scoltâ l’anime plui fonde da la citât, ben, chest rivarês a falu propite al Marais, cjaminant par lis stradis che ancjemò a san di medievâl, tal mieç dal cuartier ebraic che cumò al jè vivût da la plui discrete comunitât cinese di Parigi, cjaminant fra locai di tendence lì che, però, nissun al tire su il nâs se no tu sês vistût di tendence. E, se propite voles savè une robe, cence nancje cori tant ator, rivares a bevi un bon tai di neri, pajantlu come se fossis ta une ostarie di vie Marsala a Udin. Rinfrancjât il stomi cun lis specialitâts ebraichis dal Marais, Guerrino e Odillo che sere a deciderin di concedisi ancjemò cualchi pas par cognossi miôr la citât. Cun il dì dopo a varessin viudût dome avitatôrs, moquettes, vits, e tante robe di cjariâ e scjariâ tal mieç di un davoi di int e rumor. Il dut ta la fiere di Parigi, s’intint. Alore: viudût che a jere sere e che no vevin che di lâ a viodi cualchi museu, ancje par ce che par viodi il Louvre a ti vol une zornade interie dome par cjalalu curint, e il Beaubourg ti vol avonde e no stin fevelâ dal Museu d’Orsai, alore disevin a Guerrino e Odillo no i vanzeve che fasi une cjaminade su l’isule da la Citât passant par il Puint Gnûf claramentri. «Deh! Guerrino. – ai veve dite Odillo cun malizie – scolte o ai capit che ancje se si clame Puint Gnûf chest cà al jè il puint plui vecjo da la citât. Ma cjale che o ai viudût ancje jò il film di Carax lì che une zovine e impressionante Juliette Binoche a fâs la strassone e vîf sul puint e dopo si inamore». «Eh! Nini. No ao migo che di bussati jo. Sastu. Cjavitâl dal cjâf. Plui tost vioditu la jù a la fin dal puint: ta che ostarie là a si bevin i miôr vins franceis e l’ostêr al à une passion par i vins furlans». Podevie no finî cussì. Sigûr. A podeve finì in maniere difarente e al fo cussì: dopo une fevelade cu l’oster su l’anade vinicule Guerrino e Odillo, che no jerin propite di glesie, a finirin la lôr serade in cidin, cjalânt cun rispiet la fassade di Notre Dame de Paris, lì che secui di storie a si ingrumin cjalanti drets tai voi cu la severitât di un pari.

«… Odillo… Odillo, sveiti. Ve ca che o sin daur a rivâ. Odillo!» Bundì Udin, mandi Friûl e buine zornade a dutis lis animis che cjaminin su cheste tiare. Tornin a cjatâsi par il nestri apuntament cunt il Lunari Metropolitan. Ma cheste volte no varin a ce fa cun la famèe Martarut che tant nus a tignude companie l’an passat. Cheste volte o varin altris compains di viaç a tigninûs companie. Doi par la precision e, in cualchi maniere i jù vin bielzâ cugnussuts: Odillo e Guerrino. O, miôr, Guerrino e Odillo, parce che ta lis cubis a son simpri chei chê comandin e chei che disin di si. Tal nestri câs Guerrino al comande e Odillo a i va daur. Ma migo par cuestions di leadership, come che a disaressin i merecans dal nord. No Odillo no l’a che di dasi une mote: ai plâs fa come il cjâr, fasi tirà. E cussì Guerrino a lu tire: ator par l’Europe. E a ce fâ? A lavorâ, s’intint, parce che ai furlans, si sa, a i plâs lavorâ. E Guerrino e Odillo a son doi operaris specializats che a van ator par l’Europe a montâ fieris. Di capitâl in capitâl i nestris operaris a cognossin l’Europe intere: citâts, int, monuments, stradis. E nun cun lor. «Sveiti Odillo!» Come dutis lis voltis che cjapavin il treno o l’aparechio o la curriere par rivâ ta une da lis grandis citâts d’Europe lì che a vevin di lavorâ par meti adun une fiere, Odillo puc prin di rivâ al cjâf linie, sarâ stât par il sdrandanâ dal treno, par il niçasi da la curiere, par il sbatocjâ dal avion, o al sarâ par la birute che simpri a si parteve daur, parce che guai patî la sêt, Odillo disevin a si indurmidive di clap. E Guerrino, il caposcuadre di che scuadre che a ere fate dome di doi, al scugnive scjassalu bel e no mal par rivâ a svealu prime che a rivassin su i omps da lis pulizîs. E po dopo al scugnive tirassal daur par scjalis ca si movin in su e in jù, uscidis, jentradis, filis e filis di int che a cjaminave simpri di corse. «Odillo ten dûr la valis dai atrès». Ai mancjave dome che Guerrino cun fâ plui di pari che di caposcuadre al tignîs par man Odillo che al sdrandaneve tal mieç da la int cui voi plens di sgarbilins. Ator di lôr tante biele int, come chê che si cjate di solit ta lis grandis citâts d’Europe. «Ciò, Guerrino, ce vino di montâ cheste volte?» «Scugnitu dismintiati dutis lis voltis i lavôrs che o vin di fâ, eh Odillo. Tropis voltis ao di diti lâ che o lin, ce che o vin di fâ? Eh Odillo?». Ma chel nol sintive: cumò ai tacheve la fan e, pies ancjemò la sêt. «Guerrino: ce si mangjâl di bon a Parigj?». Parigi a è la capitâl da la France che, sot il nom di Lutetia a ere bielzâ stade cjatade di Julio Cesar tal 53 dopo Crist, tant chê che al jere daur a fâ lis batais plui tart contâdis tal De Bello Gallico, ven a stai la vuere ai Gjai. Come dutis lis grandis citâs Parigi no è une citât: o miôr no è dome une citât. Come spiegasi: di citâts che si clamin Parigi a ‘nde plui di une, une drenti chê atre, une disore chê atre, une sot di chê atre. I numârs a fevelin clâr: Parigi, chê vere, il centro dal centro dal centro da la capitâl franceise a conteve, tal 2004, alc come 2.144.700 personis. Migo mâl. Ma vin dite che cheste al è il centro dal centro de citât, chê che ven clamade dai francês île de France. Lì che vivin i vêrs parigjins. Ator di lôr a vivin, lavorin, duarmin, si svein alc come altris 12.milions di personis. Se il centro di Parigi al à plui o mancul 104 chilometros cuadrats, par dai un tet a altris 12 milions di personis i parigjins à an cuviart alc come 15.000 chilometros cuadrats di tiare, une aree che a è grande tant di jessi paragonade a chê di Londre o di Moscje. La Grande Parigj, come che i franceis a la clamin, a prodûs un redit che al è plui grant di chel da l’intere Australie e al è a la pari cun chel di Londre. Plui dal 40% da lis impresis francesis a an sede a Parigi, citât ta la cual al è il plui grant distret finanziari d’Europe e la seconde borse d’Europe dopo che di Londre. Di chel che si sa Parigi a è une da lis primis metis turistichis al mont. E ce fasie dute cheste int di dî e di gnot? Ben a vâ ancje ta la fiere lì che Guerrino e Odillo a prepararan la plui grande manifestazion commerciâl da la capitâl francese: la fiere di Parigi! Guerrino e Odillo a jerin rivâts a Parigi sot sere cul treno, di domenie. Cussì no vevin tante primure di cjapâ contâts cui organizadôrs e cu la dite par la cual a vevin di montâ la barache in fiere. Rason par cui a vevin decidt di lâ a fasi une zirade par la citât. La capitâl francese a stave ancjemò cjapant flât dal grant davoi da la gnot prime, ven a stai la grande, prime e inimitabile Gnot blancje che propite a Parigi, dal 2002, a viudût par la prime volte la lûs. Dal 2002 a nissun a i ere vignût tal cjâf di fa stâ in pîs dute la gnot la citât interie par fale vivi come se fos matine plene. Ma no par dai di vuadagnâ ai buteghîrs, come che tai paisuts da lis nestris bandis a crodin che si vedi di fâ. La Gnot Blancje di Parigi (e sul sô model a si son trats dopo Rome, Madrid, Bruxelles, e ultimamentri Riga, cence dismintiâ Montreal in Canada, Tel Aviv, Toronto, Lisbone, Tokyo e New York), la gnot blancjue disevin, come che al declare il sô manifest e a di jessi une manifestazion culturâl libare e gratuide, che a dâ spazi a la creativitât moderne in dutis lis sôs formis, che a dopre i spazis da la citât par faiu deventâ lûcs artistics. La Gnot Blancje a permêt, tal pensêr dai organizatôrs di chê di Parigj, une riflession su l’evoluzion da la vite citadine di gnot, tornant a disegnâ il mût di spostâsi dant plui spazi a un moviment dolç, che al fedi in mût che dute la citât, dal centro a lis periferîs, a podedi fevelasi in maniere costrutive. Insome, la Gnot Blancje parigine a è dute altre robe di une fieste a buteghis viartis. Al contrari a ûl slontanâ il comercjio plui agguerît par lassâ spazi a la culture, ai scambios umans, al dialogo. «Guerrino! Sastu ben il franceis tu?» ai vede domandât Odillo tant che a si tirave dongje il spolvarin sbatocjât di un romantic ajâr autunâl. «Ben! O soi fî di migrants. Soi nât in Svuizzare ma me pari al à lavorât ancje in miniere in France prime che li siarassin. Insome, alc o mastîi». Odillo nol spietave altri che une rispueste dal gjenar: «Guerrino! Scolte. Il franceis jo lu ai fat a lis medis. Però alc mi impensi. E alc o lei. E ce che o lei no mi garbe. Tu ce ditu?» E cun ches peraulis Odillo al veve mitût sot dal nâs a Guerrino l’ultin numar di un di chei gjiornâi che ti dan a gratis sul metrò da lis grandis citâts lì che il comun al publicizeve une sô gnove iniziative. Ven a stai la trasformazion dal vecjo palaç da lis pompis funebris di Parigj intun grant laboratori par lis arts. «Ce disiâl? Chei ca e an l’obitori a disposizion e lu trasformin intune farie par pitôrs, scultôrs e cuissà ce int? Ma ce sens da la muart ano chescj ca?» A Odillo no i lave jù la notizie. Epur, 104 Aubervilliers, cussì si clame il lôc che al cjaparâ il nom dal sô indiriç, secont i plans dal comun di Parigi a si transformarâ ta un grant pais di artisc, viart a ducj, gnot e dì, che al darâ une gnove lûs al cuartier a nord est di Parigj che lu ospite. Par chest progjet il comun di Parigj al spindarâ cuasi 8 milions di euro. «Jôt tu bêçs par la culture» Odillo, che plui in lâ dai investiments par lis birreris nol rivave a lâ, a no si deve pâs. «Scolte benedet ma ce croditu che ca i bêçs a ju traedin vie jù par lis cunetis! Ca a fasin dut second regule. Pense che il sindic, cjale al è scrit ca, ogni an al va cuartier par cuartier, devant da la int, par rindi cont di ce che al à fat e di ce che al è daur a fâ». Une notizie che a veve lassât Odillo cui voi fûr dal cjâf: ma a jere propite vere. Il sindic di Parigj, ancje chest an, come ducj i ains, a si fâs i 20 granç cuartiers da la citât par rindi cont a la int di ce che al è daûr a fa. Lis riunions a si tegnin di setembre a dicembre a siet mancul un cuart sot sere tai centros circoscrizionâi e ducj a podin fevelâ diretramentri cul sindic. Intânt che par câs i doi nestris amigos a cjaminevin cun fâ vivût su la lungje e fondamentâl strade di Parigi che dai Cjamps da l’Eliseo, ce podino contâ par favi cognossi cheste grande capitâl europeane? Cualchi numar prin di lassâ spazi, e chest lu farin la setemane ca ven cuant che Guerrino e Odillo a laran ator par la cjtât cun che di cognossile. Alore da la gjeografie superficiâl di Parigi o vin dite. Ce che no vin dite al è che sot di Parigi a corin 169 chilometros di metropolitanis e nuje che mancul 2000 chilometros di fognis cence contâ duç chei altris fossai e canai lì che drenti a corin i tubos da l’aghe, i fii dal telefon, la curint eletriche. A proposit. O varin mût di capî che lis grandis citâts a son accoglientis, inluminadis, evoludis, ma ancje un pel particolâr. Par esempli saveiso che a Parigi al esit un Museo da lis fognis? Propite cussi: e al fa part dal sisteme museâl de citât. Par cui se o cjolêis la cjarte dai museos cu la cual jentrâ ta il grant museo dal Louvre, cun chê o podeis ancje jentrâ tal museo da lis fognis lì che vignarês compagnâts a cjalâ la citât a cinc metros sot tiare, rivânt a capî come che di une palût e an gjavade fûr une da lis plui grandis e bielis citâts dal mont. E par faus capî ce che an fat ûs fasaran viodi ancje un film e nasâ dut ce che al è di nasâ ta une fogne. Ma cunt l’aghe Parigi a à un rapuart dut particolâr: o vin dite che a nade disore di une palût e no dome: a dîs metros sot di jè a cor une falde di aghe che a dâ no pucjs preocupazions a siarts palaç: tant par divint une l’Opera di Paris, il plui cugnussut teatro da la citât, al à lis fondis propite drenti te falde: cun da lis pompis ogni ore a gjavin fûr di lâ plui di 100 metros cubos di aghe. Pensait che tal 1975 sot la stazion dai trenos Nord i geologos e an scuviart un lago grant come dute la place da l’arc di Trionf che al sta a la fin dai Cjamps d’Eliseo: no propite il lât di Cjavaç ma insome…

Da giovedì 12 ottobre, sempre alle 11.03, andrà in onda la nuova serie di Lunari Metropolitan. Nuovi personaggi, nuove storie, nuove avventure. Sempre sulle frequenze di Radio Rai Friuli Venezia Giulia