Bundì Udin, mandi Friûl e buine zornade a dutis lis animis che cjaminin su cheste tiare. Cheste setemane rivarin ta un puest che no dome al è tal cûr da l’Europe ma al è, soredut, il cûr da l’Europe, par tancj motifs che si san e par tancj altris che no si san o no si volin savê. Ma prin di dì altri lassin fevelâ la nestre cubie di amîs che in chest moment, su la vecje familiar svedese di Guerrino, cul riscjaldamênt a manete, a è piardude (si fâs par mût di dî) tal mieç da lis vals di no si sa cuale cjadene di monts. E propite chest al meteve un pôc in ansie Odillo «No, nuje ce dî. Biel al è biel. Ve cà al samèe un presepi. Cuant che a è primevere al à di iessi un splendôr di vert ca jù. Bon. Ancje cumò cun dute cheste nêf no l’è mal, eh?». Ma Guerrino, dut intent ta la vuide, nol moleve i voi da le strade. No ca fossin ta un safari artic, ma insome vuidâ cu la nêf che a cole e la strade un tic glaçade, se propite no ti sôs nât cui schi tai pîs, al dâ un tic di preocupaziôn a ogni dun. «No ma l’impuartânt al è che tu tu sedis sigûr che co sin rivâts o cjatedin chel che o vin di cjatâ. Par il rest tu sâs che par me, blancje o nere o grise o maron, jo fâs il me, o lavori e no doi fastidi. No? Ben, si, baste che al sedi alc di bon di mangjâ. Se si mangje, jo o stoi come un cuti. No, Guerrino? Eco: e ce si mangjâl di bon a Sarajevo?» La svedese rosse di Guerrino si moveve come un bisat su la lungje strade a plui corsiis che di ILIDZA a parte viars il centri plui vecjo da la citât. Odillo al cjalave fûr dal finestrin e al ere come instupidît: «Ben, si, o voi dî. No è une architeture che mi plâs. A fâs nevore citât dal futûr. Ma ancje se son cuissà cetancj condominis mi pâr che a sedi une biele citât». Guerrino nol molave i voi da la strade: il trafic a Sarajevo al è chel di a une grande metropoli ancje se ai vivin plui o mancul 500.000 mîl personis. «Cheste che tu viodis a è la Novi Grad, la citât gnove, tirade su tai ultins timps da la Jugoslavie di Tito. Mi contave un amî di ca, che ogni condominio al ere come un piçul pais: biblioteche, buteghis, ostarie. E come che tu disis tu, ancje se son condominis no fasin une brute impression, no». Nissun al veve rispuindût si erin cjalâts tai voi par un lamp e dopo cunt une muse serene ma ancje un pôc stupidute come che a voltis a sucêt cuant che si disin banalitâs, a vevin tornâ a cjalâ la strade. Dilunc su la strade si viodeve une grande ativitât, un ferment costrutîf: gru par dut, gnufs palaç che stavin tirant su cunt une velocitât impresionante, veris a spieli tai palaç da lis bancjs di ogni bande d’Europe che a Sarajevo a àn bielzà partade la lôr sede. Cualchi gnove moschê in costruzion ufiarte a la capitâl da la Bosnie Erzegovine dai pais arabos. Insome une citât dute vivarose. «Prin che tu vignidis fûr con storis di fan – al veve dite Guerrino – ti fâs fâ il zîr da la citât. Ma no parcè che o ai voe di fati patî e di imponiti la me competenze gjeografiche. Dome parcè che, rispiet a di dulà che o sin rivâts il nestri albierc al è propite di chê altre bande. Chest ti permetarâ di dai une prime smicjade a Sarajevo e di implenati i polmons di polvar dai scarics». Afermazion che a Odillo no i veve provocât cui sa ce sconvolgimênt: la citât bielzà ai plaseve, par cui al veve plantât il sô biel nâs a patate cuintri il finestrin e al continuave a cjalâ la bande diestre da la citât: HRASNO, GRBAVICA che a segnavin il pas fra la Novi Grad realsocialiste e la citât austroungariche e nûfcentesche. E po SKENDERIJA e BISTRIK, dulâ che si puedin viodi i esemplis plui biei e cuotidians da l’architeture sarajevese: ven a stai lis cjasis da la int normal, pituradis cun colôrs pastel nevore clars, che dan une lûs dute particolâr a chescj cuartîrs da la capital da la Bosnie. «Da la bande lì che tu cjalis tu al è il vecjo cimiteri ebraic. No sai se rivarin a là a viodilu parcè che no vin tant timp. Ma di chêl che mi disin al è nevore biel». Odillo nol veve rispuindût. I sei voi a erin piardûts a amirâ lis formis da la CAREVA DZAMIJIA, la moschèe dal Zar come che a ere stade clamade, che a stâ sul puest dulâ che a ere stade costruide une da lis primis moscheis di Sarajevo dal 1462. «La Careva – al veve precisât Guerrino - la à fate su il sultan Soliman il Grant tal 1566. E sicome che imperadôr a si lu traduseve cun Zar, di che volte la clamin la moschèe dal Zar» «Une cjase sui pai dute in len, ma viôt ce biel!» Odillo al ere maraveât da la BENTBASA «Ma cjale che chê lì a è praticamentri une discoteche» ai veve rispuindût Guerrino «Ancje se – al continuave l’acculturât operari laureat in filosofie, ma specializât in storie da l’art – chest puest une volte al ere un dai doi, tre paisuts che a fevin il nucleo origjnari di Sarajevo». Nol veve nancje finût di fevelâ che, voltant a diestre su la strade par Pale, al veve cjapade la salide che a parte al Cjscjel di Sarajevo e, ancjemò prin, al lôr albierc. «Tu vuelis dimi che dutis li matinis, vierzint i vôi o varin il spetacul di chel cimiteri là denant?» Odillo al ere un tic maraveât. «Scolte nini – ai veve rispuindût Guerrino – pais che tu vâs costums che ti cjatis. Cà i cimiteris no son come là di nun siarâts daur di murs. Il concjet dal rispiet par la muart al è dal dut difarent dal nestri. Di tombis tu ‘n’cjatarâs in ogni cjanton. Parcè che par la religjon islamiche al va ben cussì. E tai cimiteris si pues lâ a cjaminâ ancje par straviasi. E se d’imprin ti par une robe fûr dal normâl dopo tu viodarâs che, cuasi cuasi, no tu puedis fa cence». Tirant jù la valis dai trapanos dal baul da la familiar rosse Odillo al veve vude dome une peraule: «sarà…». «Ma ca o sin in plene morescherie!» al veve burît fûr Odillo tant che al pasave sot da la biblioteche di Sarajevo, un palaç tirât su a la fin dal Votcent in stil gnûf-moresco cu di fat, che dal principi nol ere tant plasût ai saraj, come che si clame la int da la capitâl bosniache, ma che cul lâ dal timp al è deventât un dai simbui da la gnove Sarajevo. «A è di une bielece impresionante – al veve dite Guerrino – ancje se fa part di un dai stîi architetonics plui recents da la citât, chel di ispirazion asburgiche, che tu lu cjatis da dute une fete di Sarajevo. Cumò però ti meni drenti tal puest plui carateristic: liln daur cjatis da dute une fete di Sarajevo. Cumò però ti meni drenti tal puest plui carateristic: lin daur lis sinis dal tram e tu viodarâs ce maravèe». Dopo pôs metros e lassansi su la diestre la glesie ortodosse di San Michêl e Gabril, Guerrino e Odillo a si erin cjatâts su la place da la Bascarsija, dulà che la fontane di Sebilj a emple il voli cun la sô plenece elegante e sute. Pôc plui in là si cjate la moschee di Cekreckjia la plui vecje da la citât, dopo che di Skender pasha, che però a è sdrumade, a vê la cupole. «Une volte cheste moschee – al contave Guerrino leint la sô vuide – a veve un harem, ven a stai un curtîl, che però i cambiaments da l’urbanistiche ai an fat pierdi». Guerrino al vole lei a Odillo che, però, pôc plui in là, la moschee da la Bascarsija Dzamila il curtil lu veve ancjemò, ma juste ta chê il mujesim al stave clamant la sô int parcè che a ere ore di preâ. E a Odillo ai ere vignût un inzirli. «Piartûts tra lis mil buteghis (che no son mil ma plui di milecinc) da la Bascarsijia, Guerrino e Odillo a si sintivin tal plen diun mont inciantât. «Mi è capitade une robe strane prin» al veve dite Odillo tant che al tignive in man un citul par fâ il cafè a la Turche «Si, scoltà che siôr là che al cjantave, cu la vôs che si piardeve di une androne a chê altre, si insome a è stade une esperienze disorientante». Guerrino al riduçave sodisfât. «A sucet a ducj la prime volte. Ma ancje la seconde e la tierce» a veve zontât. E cun chê al veve cjapât Odillo sot il braç par partalu viers il BEGOVO IMARET SA MUSAFIRHANOM «Che nol l d une brute robe, intindinsi – al veve zontât Guerrino -. Chestis a son lis cusinis da la citât par i puars. Une tradiziôn che si piart ta la gnot dai timps. Tu pues vignî ca a cualsisedi ore dal dì o da la gnot e tu cjatis un toc di pan, bonon, a un presin di no crodi. E ca disore tu viodis la tôr da l’orloi: sicome che i musulmans a prein cinc voltis in dì e no ducj a vevin l’orloi, a an fate costruî cheste tôr che a ûl sfidâm, par mût di disi, il minarêt da la BEGOVA DZAMIJA, la plui biele moschee di Sarajevo. Pense che l’orloi origjnâl al ere dal Cinccent ma lu àn sostituît tal 1875 cul zimul dal Big Ben londinês». Il dut, for par i puars, tôr da l’orloi, albierc par i puars e i viandants e bagns publics a son stâts regalâts a la citât di GAZI HUSREV BEG al principi dal Mil e Cincent. Ma no si à di pensâ che Sarajevo al sedi dome moscheis. O vin za nomenât la glesie ortodosse di San Michel e Gabriel e no si puedin dismenteâ li bielissimis sinagoghis seferditis e askenazitis che fasin someâ Sarajevo un pôc a Praghe, intant che lis glesie catolichis la fasin samèâ a Vienne. E lant fûr da la Bascarsijia a si plombe in plene citât asburgiche, cun viai larcs e luminôs, i palaç colôr pastel dai larcs barcons dispes decorâts in stîl neoclassic viennes. Palaç di grande fuarce architetoniche come la fuartece di Jaice che dominèe da l’alt la citât, o come il Palaç da l’esercit o chel da lis puestis. Sarajevo a è une citât simpri stade a la avanguardie: par disint une il tram eletric al è entrât in funzion prime ta la capital bosniache e dopo a Vienne. Ma ta une robe Sarajevo a è simpri restade compagne e sperin che cussì si conservi: ta la sô elegante discreziôn che a è ancje une carateristiche da la sô int. E ancjemò ta une altre robe: tai cevapci plui boins che si podein mangjâ. E di chest Odillo al jere nevore content.

Bundì Udin, mandi Friûl e buine zornade a dutis lis animis che cjaminin su cheste tiare ma dulà sino rivâts restant tacats a la code dai nestris doi operaris torzeôns? Zire e messede, viudût il timp e la magje dal Nadâl, no l’erie il câs di rivâ ta une da lis citâs plui magjchis dal continent? Magjche, esoteriche, nereose pûr luminose, splendente, e inteligjente. Di cui fevelino? Ma di Praghe, claramentri. Dulà che, a seconde da lis oris che la si cjale, la citât a mude muse, diventânt altri sot dai nestris voi. E a proposit di oris, viudude la nestre ore, dulà podevino cjatâ Guerrino e Odillo, i nestris doi operaris torzeôns se no sot dal belancer che dal 1991 al à definitivamentti sostituide la granitiche statue di Stalin che a faseve mostre si sé su la coline? «Come che ti disevi – al continuave a contai Guerrino a Odillo – al puest di chest belancer che al va su e jù di e gnot cence fermasi, e ere une statue di chel personagjo rus. Ma i cecos la àn fate saltâ cu la dinamite. Spindînt plui beçs di chei che ere costade». Odillo, cirînt di fermâ il tocâ dai dincj che sbatevin altro che un metronomo par il frêt, nol veve chê di rispuindi, par cui si ere limitât a pensâ: «ma un belancer, ros, ca disore. Ce coventiâl?». Lassansi daur il centri da la citât che al stave juste di chê altre bande da la Moldave, Guerrino e Odillo, scarpinadôrs come pucs, a si erin inviats viars il Cjscjel di Praghe, che al stâ propite in ponte da la culine dal LETENSKÉ SADY, cunt un colp di voli che al fâs impression. «Ciert – al veve provât a disi Odillo – che Vaclav Havel, il to amî scritor e prin president da la Cechie libare, al à di vê vût un bon ce fa a indurmidisi la prime gnot tal mieç di dut chest popò di afâr serio. Si, insome di scritor puar a President, di un apartament ta une cjase popolâr al palaç che al jere stât dal re, johi. Sastu ce gnot che al à passât». Guerrino al ere cuasi orgoliôs che il so soci al scomençâs a rindisi cont da la bieleçe da lis citâts che lavin a cognossi. «Cumò ti meni a viodi la Catedrâl di San Vit che a sta propite tal curtil dal vieri palaç real. E se tu vuelis savelu, ancje se no ti as chê di lâ drenti ta la catedrâl che a è di une bieleçe gotiche che ti gjave il flât, al baste fâ cuatri pas tal curtil par fati viodi lis lusignis. «Ve ca di fat ce arcs, ce guglis, ce sculturis» al veve sberlât Odillo prin di cjapâ un scjas par il sbati dai stivai da lis guardis su la piere dal curtîl. «No sta preocupati – lu veve sigurât Guerrino – al è il cambio da la vuardie. Ma cjale lis divîs dai soldats: pense che Havel, il prin president, al à domandât al costumist dal film Amadeus di tornâ a disegnalis. Bulo, no?». «Orpo ce piçui che a erin i praghês une volte» al veve dat fûr Odillo cialant lis cjasutis da Le Androne d’aur. «Ma no – ai rispuindeve Guerrino – no erin i praghes a iessi piçui. Chês ca praticamentri a erin, in origjne, lis cjamaris dai soldats dal re. Ma se ancje ai soldats no i covente tant dopo un pôc si eris stufâts di stâ tal strent e alore a vevin vulût lis casermis. Cussì ta chestis cjasis a erin vignuts mâcs e scienziâts e alchimisç. Par chest si clame Androne d’Aur: parce che tu sâs che i alchimisç a volevin cjatâ il mût di trasfromâ il plomp in aur. Ma cuant che i Asburgo a tornarin a Vienne, ta chestis cjasutis a rivain i puars da la citât. Pense che al principi dal Nûfcent ancje Kafka al ere vignût a stâ cà». «Kafka cui?» ai veve rispuindût Odillo dut cjapât a cjalâ che maravèe in miniature da l’Androne d’Aur. «Mole ca. Venmi daur che cumò ti fâs viodi la tour Eiffel». Afermazion che a Odillo ai pareve incredibile: «Eh! Si cumò voltin il cjanton e rivin a Parigi». Ma Guerrino al saveve ce che al diseve: a Praghe, tal Zardin Valdstejn a è une tôr Eiffel in miniadure. Che no val la pene di iessi viudude, s’intînt: «Al è miôr – difati al veve continuât Guerrino – che cumò ti meni a viodi l’abazie di STRAHOV, di dulà che si pues viodi dute Praghe. E se ti tasis ti meni ancje a viodi il mur da la fan». «Insome – al indagheve Odillo – tu vuelis dimi che chest re ca, par vê une scuse par dai di mangjâ a la so int che veve caristie, si ere inventât la necesitât di fâ su chest mûr, che nol coventave a nuje, dome par dai di mangjâ a la sô int? Bulo». Guerrino e Odillo a vignivin jù par li stradis di Mala Strana, un dai cuartîrs plui biei, soredut sot sere, di Praghe. Dulà che, se si cjalisi ator in maniere corete, si puedin cjatâ ancjemò lis veris bireris praghesis, chês no invadudis da la marèe di turiscj che a emplin come un bocal il centri da la citât. «Eco – a si ere declarât Guerrino – par combati il frêt cumò ti parti a bevi une bire. Ma no ta une ostarie di chês justis». Odillo a si sintive menât par il nâs. «Eh, no. Sino a Praghe? E alore viudût che o sin in Mala Strana ti meni a bevi ta un dai puesç plui turistics». Odillo al veve i voi fûr dal cjâf: «Ma, scugnino?». «Si benedèt – al veve rispuindût Guerrino – parcè che ti meni a bevi li di U SVEJKU, la birerie dedicade a un dai personaç plui cugnussuts da la leterature ceche: il soldât Sveik, apont». A Odillo no l’è che di chest Sveik ai interesàs plui che tant. Ma la peraule bire, cun magari ancje dongje un talpin di purcit, ai parteve che sensazion di clip da la cual al veve propite bisugne. Ancje parcè che di cheste stagjon Praghe a jè magjche (ancje se aromai si cjate masse int par dut e par stâ cuiets si scugne spietâ gnot fonde), ma la so magje dispes a si la magje chel sassin di un frêt che al fâs. «E cumò – al veve domandât Guerrino a Odillo – che tu as ben mangjât e ancjemò ben bivût sestu pront a une esperienze di chês fantastichis?». A Odillo Praghe ai plaseve. Ancje cumò che stavin cjaminant ti zardins dilunc la rive sinistre da la Moldave. «Ben si. Si magjâl ancjemò alc?» al veve rispuindût il vicecapo operari al so orgoliôs capo. «No. Cumò ti fâs passâ par la plaçute di NA KAMPE li che di cheste stagjon a è simpri une orchestrine tradizionâl che a sune e dopo traviarsin il flun, passant sul Puint di Carli». Esperienze che a Odillo ai veve viartis lis puartis da la magje: «Chest al è il punt sul cual al passave il Rabbi Löw cuant che al lave a fevelâ cul re. Ciert che chestis statuis no son propite il massimo da la ligrie, ma ce biel, ohu, ce magje, eh?». La terapie Guerrino a stave funzionânt su Odillo. No dome a si inamorave da lis citâts ma, cumò al scuminçave a impensasi i nomps dai personaç dai cuai Guerrino ai contave la vite e lis storis. «Eh, tu viodarâs cumò – al veve difati dite Guerrino – ti meni ta la citât vecje, dulà che viodarin il miôr dal miôr di cheste citât dulà che si misturin storis e liendis di secui e di plui culturis. Par prime che dai ebreos, ma no dome chê: parcè che di Praga si pues di dut, ma no che a sedi dome di cualchidun. Praghe a è Praghe, e buine gnot». Par prime robe Guerrino al veve menât Odillo a smicjâ pa la palade dal vieli cimiteri ebraic «Ve ca mo – ai veve dite ta une orele cun fa misteriôs – chês che tu viodis a son plui o mancul 12.000 lapidis. Ma pense che ta chest cimiteri al samèe che sedin soteradis 100.000 di lôr». Odillo nol rivave a gjavà i voi di chel gherdei di lapidis «Ta chest blic di tiare?». «Sigûr - al veve rispuindût Guerrino – parcè che i ebreos no puedin spostâ i muarts une volte soterats. E alore, sicome che la citât no i deve un altri puescj a partevin tiare gnove e a soterevin i gnûfs muarts disore di chei altris, rivant cussì a fâ une vere culine artificiâl tal mieç da la citât». Odillo al ere estasiât. «Ma ten cont un pucje da la to maravèe benedet – ai veve dite Guerrino – che cumò lin drenti ta la Sinagoghe Vecje-Gnove dulà che, si dîs il Golem al sedi ancjemò che al ripose». E cjaminats pôs metros Guerrino e Odillo si erin cjatâts devant da la imponente delicateze di cheste sinagoghe che a è la plui famose di Praghe, ancje se no la plui biele. A rango di bieleçe l’edifici plui carateristic da la capitâl ceche al è sicuramentri la glesie di San Michêl, piardute tal bosc di PETRIN pôc distante dal Mûr da la fan, che a è dute fate in len e a è stade costruide in Russie e dopo tornade a fâ su a Praghe. Ma dopo glesiis e sinagoghis, finalmentri Guerrino e Odillo a rivarin ta la palce dal municipi, la plui centrâl di Praghe vecje, a cualchi pas di chel altri monumênt simbul da la capitâl ceche, ven a stai la Tôr dal Polvar, che si cjate ta cualsisedi cartuline che a rive di là. Dopoune smicjade a la glesie di Nestre Siore di Tyn, da la cual a si viodin di dute Praghe lis tôrs dai cjampaniî altis plui di Otante metros, e dopo vê cjalât in lunc e in larc il monument a Jan Hus, prin riformadôr religjos ceco, un monument che a si piart, ta chest periodo tal mieç dal mercjât di Nadâl, Guerrino e Odillo, si erin mitûts in code, tal mieç di un grum di int, a spietà il meracul dal famôs oroli astronomic che al stâ sul cjanton dal Vecjo Municipi da la capitâl ceche. Li vuidis a disin che, cuant che a bat le ore, al ven fûr un gjal che al cjante l’ore di lâ, ven a stai chê che a recuarde al omp che la sô vite a è curte e stâ pôc a finî, e ta chel un scheletri al bale a recuardâ il destin di ognidun. Finût il spetacul Odillo al veve cjalât cun voi interogatîfs Guerrino «Dut chi?» al veve dite. «Eh, satu se che no si scrîf par tirâ dongje la int» al veve rispuindût Guerrino tant che lu strissineve, par consolalu, a bevi une bire su li taulis sacris da la Tigre d’aur, lis stessis lì che ogni dì Bohmil Hrabal si incjocave.

Che dì la benzinare a veve une muse di ridi dute particolâr tant che a deve fûr litros e litros di verde. «Ce âstu tant di ridi vuê, Rutte?». «Foi taliani mi fate ridere». «Orpo!» Al veve rispuindût Guerrino a la biele todescje sosade cunt un furlan che cumò a viveve cà di tant timp lavorânt cun il sô omp tal distributôr: «E se sino daur fâ par rindisi tant ridicui?». «Non zapete avere freddo». «Ven a stai?» al veve domandât Guerrino. «Basta un poco di fredo e foi subito protestare, fare muso lungo. Nella mia città, invece in questi zorni già c’è cincuanta schei di nefe e tuta gente è felice». «Mago, di dolâ ventu tu po’?». «Ich bin eine berliner!». Bundì Udin, mandi Friûl e buine zornade a dutis li animis che a cjaminin su cheste tiare come che o vês capît cheste setemane la nestre cubie di amîs nus partarâ ta la capitâl da la Gjermanie, loc mitic, mete che no si podeve rivâ par agns e che ancje cumò a manten un incjant dut particolâr. Cui che al rive di Berlin, cui che al va a Berlin, cui che al sa di Berlin, a si parte daûr une aure dute sô, cuasi che lis imagjnis dal famôs film di Wenders a fossin ancjemò vivis e da la pelicule a si fossin trasferidis ta al vite real. E alore? Ma alore cui nol podie dî: Ich bin ein berliner? «Tu as di spiegami parcè – al diseve sustât Odillo cjalânt la lungje autostrade a tre corsiis devant di sé – parcè che par dut o sin lâs cul treno, l’avion o la curiere. E invesite a Berlin o vin di là in machine. Ouh. A è lungje sastu?». Cuissà par ce, o disin nô, ta dutis lis storis di zingaraments autostradâi Berlin a è simpri stade la citât in prime file. Ducj o vin un parint, un cusin, un ami che une volte nus à contât: «Ciò! Che sere o ai cjatât Guerrino che al ere rivât in place cu la sô vecje Ford Capri (plui che une machine un monument) che apene viodût mi fas: monte su che o lin a bevi un cafè. Jo o monti e chel di bot e sclop al cjape l’autostrade: dipo – i dîs jo – vevino par fuarce di bevi un cafè ta l’autogrill? E chel atri: no ti meni in autogrill. Ah, si? E dulâ lino alore?». E la rispueste a ere simpre chê: Berlin. Par noatris che ta chê zornade che lis televisiôns nus fasevin viodi il mûr che al colave o vevin l’etât par capî che tal mont alc di grues al stave rivânt, par nô disevin, Berlin al à simpri rapresentât il sens dal proibit. Ma no di un proibt scjavelôn e a bon presit: par chel si lave a Amsterdam, ta i Coffèe shop a fâ lis stessis robis che si podeve fâ daur di cualsisedi roste. No Berlin al jere un altri proibît. Al ere une puarte da la cussiense. «Varessin di iessi rivâts» al veve dite Guerrino cun fa simbolic, continuânt a tighì dret il mustic da la so vecje Volvo familiâr viars i segnâi autostradai che a fevin la conte al contrari dal numar dai chilometros che mancjavin a la capital todescje. «Ce ti lu fasie pensâ?» al veve rispuindût Odillo, che al cirive in ducj i mûts di tignî viarts i voi che, dopo cuasi nûfcent chilometros di autostrade a vevin propite bisugne di un pocje di polse. «Viodistu là, che tôr? Ben, che là a je la tôr da la television. Un dai elements da l’architeture di Berlin plui cugnussûts. E plui visibîi: a è alte 368 metros e di là disore tu viodis la sterminade grandece da la grande capital». Odillo al fissave che stangje che voleve fai ghiti al cîl cu la muse di un che al veve fan, set e sun dut ta une. «Aaaah» al jere stât bon di rispuindi il puar vicecapo cubie. Guerrino, un pôc parcè che al ere un sadic che al necessitave di cualchidun che al scoltâs simpri lis sôs spiegazions, un pôc parcè che al ere strac, ancje se nol voleve dalu a intindi, un pôc parcè che al ere un cun manîs di protagonisim, al veve sborfât in maniere subdole ta la orele di Odillo: «Secont me, apene che o rivin, prin ancjemò di là in albierc, podaressin fermasi a mangjâ un alc. Ce sao, ta une brasserie: une biele e lungje striche di cuestis di purcit, compagnadis di crauts e bire. O, se no, si fermin par strade lì di un ambulant e comprin un bon Curry Wurst, il wurstel cuinçat cul ketcup e il Curry». No lu vès mai dite! Odillo a si ere sveât e inmpiât come une svearine eletroniche a sîs di buinore. «Wurstel! Cueste! Bire! Benedete cheste citât!». Jôt tu ce câs, un pôc parcè che a vevin sbaliade strade, un pôc parcè che là jù di venditors di curry wurstel a ‘nd’è simpri, Guerrino e Odillo a si erin cjatâs sot un dai plui impuartânts monuments di Berlin: la GEDACHTNISKIRCHE, ven a stai la Glesie dal Recuart, che a è restade come che lis bombis da la seconde vuere mondiâl a la àn lassade. «Orpo!» al veve dite Odillo tant che al sbitareve di ketchup dut il sô famôs plumin dant muardons al so panin cul wurstel «no vevino plui i beçs par meti a puest cheste glesie? Ciò se impression che fâs, eh! Dute nere e brustulade cun chel cjampanili roseât che al samèe un cuesset di dindi lassât par masse timp su la gridele». Guerrino lu veve cjalât di brut voli: «Ah! Al è rivât il sapient cumò. Si ridûs dut a une cuistion di beçs, no? E invesite chest al è un momument al recuart e al restarâ cussì par simpri: brustulât e dindi par dâi a la umanitât il sens da al tragedie che cheste citât a scugnût vivi. Prove pense che dut chi ator al ere cussì». «Un pulinâr rustît» al veve rispuindût Odillo inneant i dinç ta che dilizie dal sô wurstel che, al veve scuviart, cunt il Curry al jere une vere maravèe. «Ce mût fasie a menati ator. Tu mi às definît la citât plui martoriade d’Europe un pulinâr rustît. Tu no ti às cussiense, ma dome intestins». Risolte la cuestion dai wurstel e da la Glesie brusade cul sô cjampanili che al ricuarde, par Odillo, un cuesset di dindi lassât par masse timp su la gridele, la nestre cubie a veve cjapade la machine par là a cirî l’albierc dulà che varessin passade che setemane a Berlin. «Ma o sino bilezà fûr de citât chi? O sin tal mieç di un bosc, no tu viodis». Guerrino al veve strentis lis mans fin a fasi mal intor dal volant da la so vecje 240 polar rosse: «Berlin a è une citât verde, bestie! Cussì verde di iessi plene di boscs, di lâts, di vert. E chest ca al è il polmon vert da la citât, il Tiergarten, il parc plui grant di Berlin. Pense che ca i berlines pratichementri a vegnin la domenie a fasi la gjite in campagne. Si fasin i wurstel e la cueste su la gridele, beviint etolitrots di bire. Ma simpri cun une ligrie dignitose e educade: o sin in Gjermanie cà, migo ta un suk!». Odillo al veve capît di vê dite alc, prin o dopo ta la sô vite, che al veve infastidît il nestri Guerrino. Cussì al veve pensât ben di concentrâsi sul panorame. No si sa mai di rivâ a cjatâ alc di domandâi al sô capocubie inteletuâl. E chel alc di bot e sclop a i ere rivât denant: grant, lunc e luminôs come la Colone da la Vitorie. «Oh! Cjale Guerrino: la publicitât dal paradîs!». Guerrino nol rivave a cjatâ l’ironie ta chê afermazion dal sô ami. Saran stadis lis tantis oris di machine, i cuatri plens di benzine che al veve scugnût fâ par rivâ a Berlin cun la sô vecje 2000 svedese a benzine, sarà parcè che il Curry a lui ai plaseve ma a i faseve partî un taramot ta la panze che al ere piês dal tsunami in Indie, sarà ce che si vorà ma a Guerrino lis esclamazions di Odillo no i lavin propite jù. «Scolte – al veve in fin dite – cheste che tu âs denant no è une publicitât dal paradîs. E di cuant in cà il paradîs al âe bisugne di fasi publicitât? Cheste a è la colone da la Vitorie, in dut il sô splendôr e la sô bielece». «Eeeh! Tantis storiis – al veve rispuindût Odillo – ce saio jo: o ai viodût chel mostro di agnul la disore, inluminât e dorât, che mi è vignude di dile cussì, cuietiti». Ma Guerrino nol rivave a cuietâsi. Il Curry a si ere trasformât ta une scuadre speciâl di incursors che al cirive di distanâ cuissà ce fuarce di ocupazion che si platave tra l’intestin, il pancreas e il stomi. Nol capive plui di ce che al veve bisugne: di aghe, di bire, di un fernet, di une chine o di un moment di polse. E come che si fâs ta chescj moments, si ere lassât cjapâ dal panic sielzint la robe piês: «Alore viudût che tu sês in vene cumò, da la Colone da la Vitorie, o lin in ponte». «Ah, par me – al veve rispuindût Odillo – no son problemis. O ai energjie di vendi. Tu pluitost, sestu sigûr? Tu as une muse…». «No saran 258 scjalins a fermâmi» al veve sierade la cuistion Guerrino tant che al parchegjiave la machine. Di là disore, Berlin a ere biele, bielonone. Pratichementri un bombon. Guerrino al taseve, scoltânt ce che al sucedeve drenti di se. Odillo, al incuintri, al ere maraveât: cui voi lustris, e no dome par il buerin che a 48 metros di altece disore dal Tiergarten al segnave la muse. No a Odillo, sot l’agnul che al è in ponte a la Colone da la Vitorie, un agnul che di bessôl al pese 35 toneladis e che al è stât fondut tal bronç dai canons che i todescji ai vevin partat vie ai francês, a Odillo disevin, chê citât ai plaseve. Parcè che a ere verde, plene di nature, a ere, par chel che al ere rivât a viodi, la citât mancul citât fra chês che a vevin cognussût. Epûr, a ere la citât plui metropoli, plui futuristiche che al pensave di rivâ a viodi. Ciert che dut al ere ancjemò di scuvierzi. Dute la setemane a varessin, une volte finît di lavorâ, passât il timp a cognossi cheste bilisie che a è un dai simbui plui impuartants di Europe. Par la sô storie di divisions e di riunificazions, parcè che di là la storie a si faseve, plui che storie di Gjermanie, storie di Europe e di europeans. Citadins dal nestri continent che, di sigûr al cjale al mediterani di une bande. Ma di che altre al cjale soredut a se, sbruntânt la sô int a cjalâsi drenti. E, cjalantsi drenti, Odillo al veve scuviert di vê fan. PUNTADE NUMAR DÎS A contin che chê gnot Mstislav Rostropovich al vedi molât dut ce che al steve fasint dula che al ere, no s’impensisi plui in cuale citât europeane, al vedi cjapât l’avion e rivât dulâ che al veve di rivâ, a si sedi sintât cun il sô violoncel a sunâ chest preludi di Bach, iuste sot il mûr, par ducj chei che lu stevin passant, par ducj chei che vevin provât a passalu, par ducj chei che ca di un pôc, no si saressin plui impensâs che a Berlin une volte al ere un mur. Bundì Udin, mandi Friûl e buine zornade a dutis lis animis che cjaminin su cheste tiare. O sin ancjemò a Berlin cun i nestris doi amîs operaris che in cheste setemane a an lavorât a montâ la fiere dal mobil ta la capitâl todescje. Ma come che o savin la nestre cubie di amîs no è fate dome di torzeons, ma, ognidun a mût sô, di inteletuai dal turisim, di pensadôrs da la cjaminade, di matematics da la smicjade. Dongje a jessi ancje doi boins pirôns come che si dîs. E alore, dulà podevino cjataiû chescj doi operaris furlâns se no devant di ce che al reste dal mur di Berlin? E se podevino fâ chescj doi stomis cence fondis se no slapagnâsi mangjânt wurstel al curry, la plui cugnussude specialitât da la cusine berlinese di strade? «Insome – al diseve Odillo parânt jù dai bocons di pan e wurstel plui grancj da la sô bocje – tu vuelis dimi che chest al è il famôs mur di Berlin. Ah-ha». Ancje Guerrino si steve slapagnânt cul sô brat wurst cjalânt il mûr. O, miôr, ce che al reste di chei 43 chilometros di mûr che al traviarsave la citât. «Eh, si – al veve rispuindût Guerrino cun la bocje plene – ta la gnot tra il 12 e il 13 avost dal 1961 i rus a àn tacât a tirâ su cheste robe cun fil spinât ma bielzà doi dîs dopo a vevin scomençât a doprâ madons e malte». Tal cjâf di Odillo alc nol cuadreve: «Ma si – al pensave parcè che cun dut chel che al veve in bocje di fevelâ no l’ere il câs – di solit si tirîn su murs par fâ sta adun la int, par fâle sintî in cjase. Chei cà no la vevin propite capide». Guerrino intant al continuave la sô spiegazion: «Dal ’65, dopo che Kennedy al ere stât a Berlin a disi che al ere berlines ancje lui, a tirarin su la tierce costruzion dal mur, doprânt lastris di ciment armât sormontadis di un larc tubo simpri di ciment che al coventave a fati sbrissâ jù. Dal ’75 a tirarin su la quarte generazion dal mur, alte 3 metros e sessante, fate di 45.000 sezions di ciment armât, larc ancje un metro e mieç». Di omp pratic Odillo nol veve pudût tignisi di domandâ: «E trop vevino spindût par fâ cheste opare?». «16 milions di marcs. Pense che un panin al costave un marc. Par cui: sedis milion di panins». Cjaminânt e cjalânt chel che al ere restât dal mûr, Guerrino e Odillo a erin rivâts ta la centralissime e impuartante Potsdamer Plats, pratichementri un puest che nol fâ propite impensâ a la grande Berlin dai agns passâts. «Ve ca – al veve dite Odillo – ma di vecjo a no ‘nd’è propite plui nuje». Guerrino a lu veve cjalât cun fa sapient: «La Potsdamer Plats a è stade tornade a fa no sai tropis voltis. Cuasi une condane par cheste plaçe cussì impuartante da la citât. Pense che ca une volte a iere la tiare di nissun: ven a stai sterps e smiciadis di mitragliatricis». Odillo si cjalave ator cuasi spaesât: ce modernitât, ce lusso, ce voe di traisi a pes tal doman. Ancjemò di plui chel spirt di novitât che lu veve cjapât in ponte a la Colone da la Vitorie al tornave a fas sintî. Alc, e alc di grues al stave cambiânt drenti dal vicecapo operari da la nestre cubie di amîs. «Ben – ai veve dite a Guerrino – no vevistu di fâmi viodi une maravèe ultramoderne, alc di simbolic e di profondamentri civil che al varès vût di fami capì la difarence fra nô e lôr? Si insome fra il lôr mût di viodi la democrazie e il stât e il nestri?». Guerrino no si ere di sigûr dismintiât di compagnâ il so soci ta un puest che efetivamentri al è un dai lûcs plui simbolics di Berlin: ven a stai il Reichstag, il palaç dal guvier federal, chel stes brusât dal ’33 e sul cual, il 30 di Avrîl dal 1945 a ere stade fate svintulâ la bandiere sovietiche, par tornâ a deventâ dal 1990 il Parlament Federal Todesc. Il viaç a Berlin, citât che a è stade fondade tal 1.200 ma che dome tal 1307, dopo la riunificazôn cun Cölln a è deventade la fonde di chel che cognossin vuê, chest viaç o disevin par Odillo a stave deventânt catartic: prin la Colone da la Vitorie, cumò il Reichstag: daur lis orelis l’operari furlan al scolteve il niçulasi dal vint da storie. Une storie impuartante, imperiâl, prussiane. Une storie che a Odillo ai plaseve parcè a ere plene di contradizions, di regulis e di indicazions fatis apueste par iessi smentidis. Ma soredut a ere sune storie clare, nete, cence sbavaduris: lì che il mal al ere mal e il ben al ere ben. «Ciò, Guerrino – al veve dite tant che al cjalâve imbacuchît la bieleçe da la cupole in veri che dal 1999 a rint trasparent il Parlament federâl todesc – tantis robis che a si capissin da la architeture, eh? Ve ca: i todescj a ûlin fa viodi che la lôr politiche e la lôr gjestion a è trasparente e par fanûslu capî ce fasino? A ti tirin su chest splendor di cupole in veri: parcè che a la politiche tu as di cjalâi i polmons, il côr e il fiât, nomo?». Guerrino al ere restât un tic rimbambit di tante sapienze rivade drete drete dal çurviel dal sô amî. Ma, nol podeve dì nuje: erial stât lui o no a volê che Odillo al deventâs un operari istruît e aculturât? «Ti prei di viodi – al veve alore dite Guerrino tirant fûr l’arie professorâl che ai vignive cussì ben cuant che al ere in dificoltât – che la cupole progjetade di Norman Foster a è dute fate in fiêr, veri e splielis, e che propite al centri da la convergenze da la lûs che rive dal alt a sta la sale circolâr dal Parlament todesc». «Oh, bè, cheste la cognôs: cheste si viôt simpri ta lis cartulinis che rivin di Berlin e ancje cuant che a fasin i colegaments televisif chest puartin si viôt simpri». Odillo al ere orgoliôs dal sô deventâ sapient. No propite un mestri ma alc si podeve ancje domandâi e lui al varès savût a rispuindi. «E come si clamie cheste puarte, Odillo?». Il probleme al ere vê un compain di viaç come Guerrino che al passave la vite su lis sôs vuidis maladetis: «Jo o sai che la fasin viodi simpri. Come che si clami e parcè che a è ca propite no sai». Furzûc. Anzi, fal di man in aree e rigôr. «Cheste – al veve tacât Guerrino rispuindînt a la domande che il sô soci nol veve savût rispuindi – cheste a è la Puarte di Brandeburg, che a è stadee fate sui modei da lis puartis dai templis da la Acropoli di Atene e che a siare l’Unter den Linden, il vial dai Teis». Odillo al stave cidin a cialânt che robe imponente che al veve devant, une sorte di templi grec in plen Berlin cun disore un cjar tirat di cjavai. «Eco – ai veve dite Guerrino cuasi rispuindint a une domande - la quadrighe di cjavai che tu viodis là disore a parte la dee da la vitorie che, ta lis intenzions origjnaris a vares vût di sedi la dee da la pâs». Odillo lu cjalave stranît: «Ma leitu tal pensîr?» ai veve dite. «Ve ca, ancjemò mur» al veve dite Odilo cjalânt chel chilometro e passe di mur che al è stat lassat in pîs ta la East Side Gallery, su la rive diestre da la Sprea, il flun che al passe tal mieç da la citât. Plene di disens, une volte ancje di artiscj famôs, cumò chest fruçon di mur che al è retsât in pîs al è mieç sculurit e tingût nancje tant ben. «Sarà par chest – al veve pensât Odillo – che chest lûc al fâs capî ancjemò di plui, cun chescj disens ormai cussì nereôs il clime che par 28 agns la int di cheste citât a à vivût». «Pense – al veve rispuindût Guerrino, ancjemò rispuindînt cuasi a une sô afermaziôn – che ta chest lûc a vevin tiradis su da lis pedanis da lis cual tu podevis smicjâ chel che al capiteve tal Est, di là dal mur». Odillo lu veve cjalât ancjemò plui instupidit da la capacitât dal sô soci di rispuindi a domandis che nol veve fat e a afermazions che al veve dome pensât. «E alore – si ere dite fra se e se – viodin se tu sâs partami tal museu dal mur». «Sigûr» al veve rispuindût Guerrino «e sopo il museu dal Mur o lin ancje a viodi il Denkmal il gnûf mausoleo a cîl aviert che i todescj a àn dedicât a i muarts ebreos». Ma cheste volte Odillo al tacheve veramentri a preocupasi: ce mût fasevial Guerrino a lei tal sô pensîr? Cheste a steve par deventâ une esperienze dramatiche, ipnotiche, pratichementri un vencul. Il Denkmal al è un cjamp di lapidis cence nom, fat di 2700 blocs di marmul alts plui doi metros e luncs ancje di plui, mituts un dongje chel altri a simbûl da la asurditât di un pensîr uman blocât drenti da la violence. Ma par furtune la gite di Guerrino e Odillo no si ere fermade lì: podevino i nestris doi amîs no piadrisi ta la maestât cence plui storie di Alexanderplatz, tant ben contade di Döblin e di Brecht? La place che tal dopo vuere a è stade slargjade fin a cuatri voltis ce che a ere e che dal 1960 a è zone pedonâl? Su la Alexanderplatz Odillo si ere fermât juste sot dal Orloi Universal: un monument alt plui di dîs metros che al è propite un orloi che al segne l’ore di dut il mont. Ce robis Berlin eh, Odillo? E chest dome par la culture e i monuments, cence fevelâ da la vite di cheste citât vive di dì e di gnot, dulà che la mode no rive ma di dulâ che la mode a partis, plene di museus, di culture, cence mai iessi disore da lis riis.

«Rino… Guerrrrrino… ma parcè l’ae une muse cussì rabiose chest ca?» Odillo di sot il so colbac nol cjalâve nancje Guerrino. Al jere come deventât di piere sot da la maestose statue di bronz che a mostrave il condotîr da l’epoche socialcomuniste sovietiche. «Chest ca? Come chest ca. Lui chi a l’è Lenin, il cjâf da la Rivoluzion di otobre in Russie. E il prin cjâf di guviêr da la Union da lis Republichis Socialistis Sovietichis. Come chest ca!» Guerrino al cirive di insegnai un pôc di rispiet storic al sô inscalfibîl amî. «Eh dì ce ce tu vuelis tu. Par me al à muse di rabiôs. E cui che al è simpri rabiôs nol va lontan. Prin o dopo ai cjape un colp». Preveggenze post-storiche da la post-classe operarie! Ma insome, che a sedi come che a sedi, che a chel là, a un ciert moment ai sedi rivât, come che di fat al è stat, un colp o mancul, ben no stin cjapà malegraziis e partìn il viaç da la nestre cubie operarie ta une da lis plui bilis citâts di Europe. Afermazion che ormai o vin dite plui e plui voltis: parcè che se no vês capît l’Europe a è propite biele: e se son bielis lis sôs capitâl figurasi il rest. A proposit, ma no vino di saludasi come che si devi? E alore: bundì Udin, mandi Friûl e buine zornade a dutis lis animis che cjaminin su cheste tiare, e benrivâts a Budapest! Guerrino e Odillo a stevin cjaminant, cui in serene contemplazion da la storie cui cunt une perplessitât che metât a basteve par emplâ une nâf, tal Parc da lis Statuis di Budapest, dulâ che si cjate l’esposizion plui particolâr di Europe, almancul stant a chel che nus conte la vuide che Wanda, la femine di Guerrino a i à regalât al sô omp «Tacât al Lenin zigant al è l’operari che al cor» al leeve Guerrino tant che odillo al cjaleve la statue dal operari di corse. «E dulâ coriâl?» a veve domandât une vôs esistante di sot un grant colbac neri che al sameave al cjapiel da la vuardie reâl danese. «Come dulà corial? Al va incuintri al avignì, no? Odillo». Chest ca al veve ingrumât ancjemò di plui il cjâf ta lis spalis rivant a fâ, di spalis e colbac dute une robe. «E dopo i monuments ai militars e ai erois di dutis lis batais, eco che o rivin ai ogjets plui particolârs». E ca Odillo no dome nol rivave plui a capì né ce che al steve viodînt e nancje la legre sigurece di Guerrino: «Scolte barbe – al ere ad un ciert moment rivât a dì tirant fûr che pocje di umanitât da la cual al jere ancjemò bon – scolte: va ben che a ti ti plâs la storie e che ogni volte che o cjatin une statue tu scugnis contamile. Va ben che ca a an vut il comunisim fin chel altri îr e cumò no volin plui saventin. Però. E torni a dì però: spieghimi. Dulà corial l’operari che al côr. Aial di timbrà, aial di cjapâ il tram parcè che al à finît il turni? E po, scolte ca. Lassin pierdi lis statuis: ma parcè varessial di iessi biele la Trabant, la machine fate di carton pressât, o la cabine telefoniche che no funzione o pies ancjemò une machinete par impiâ i spagnolets fate a falcet e martiel?» Guerrino al veve capît, e no di vuê, che i argoments che ai interessavin a Odillo a erin ben altris. Par cui, lassât imediatamentri il Parc da lis Statuis, a si ere indreçat viers altris metis da la capitâl da l’Ongiarie. «E… sastu che Budapest a è nevore cugnussude par i bagns e, soredut par lis termis. Praticamentri in nissune altre bande di Europe tu puedis cjatâ cussì tantis termis come ta cheste citât. No dome: di chest an Budapest a dâ ancje a lis feminis la pussiblitât di ientrâ tai bagns turcs e ta lis pissinis. Adiriture, dal mês di giugn passât un dì par setemane al è completamentri dedicât a lis feminis» A Odillo si erin impiats i voi. Dos robis tal mont a rivavin a impiâi i voi: il mangjà e bevi e il fat di podè viodi cualchi biele stangje passai dongje. Migo par fâ nuje. Dome par passudî il voli, dopo vê passudide la panze. «Ehi! Semaforo! Viodin di no piardi i scarpez! Almancul sastu ce che ûl dì SPA?». A Odillo no i tornave cheste cuistion. Ce centravie cumò l’economie, la finanze, la borse, i bissins? «No sai Guerrino. O ai capît che cumò di cuant che a è colade l’Union Sovietiche i pais da l’est à an cjapade la vie dal capitalisim e, cuindi, dut al puce di bêçs di chestis bandis, però, si, ce uliâl di SPA: societât par azions, no?». Guerrino al veve fate la muse plui furbe che al saveve: «Cjastron, o stin fevelânt di termis, di aghe, di benstâ. SPA in chest câs al ûl dì Sanus per Aquam e lu doprin dutis lis stazions termâl che a fasin terapîs cu le aghe». Tant che a erin in muel ta une pissine in stil gnuf-classic Guerrino e Odillo a continuavin la lôr discussion su lis bielecis da la capitâl da l’Ongiarie che, come che forsi a no si sa, sot di jè a à plui di 200 grotis drenti da li cuals si rindisi cont, cjalânt l’imobilitât da la geologje, di trop curte che a è la vite di un omp in confront da l’eternitât. «Dome sot dal cjscjel di Budapest – al contave Guerrino a Odillo che al veve tal cjâf une ridicule scufe a flôrs rose e zâi – al è un sisteme di grotis lunc plui di 10 chilometros. Là drenti a an cjatadis olmis dai primitîfs che ai vivevin drenti e drenti là a cjaçavin. Tal periodi da la dominazion dai turc lis grotis a vignirin colegadis cun lis cantinis dal cjscjel creant un labirint ta lis vissaris dal cjscjel stes. Ma no dome: pense che tal 1930 a tacarin lis voris par creâ trois e leamps fra lis cavernis rivant a fâ su un sisteme di ricovero che al fo doprat ta la seconde vuere mondiâl par dai acêt a plui di 10.000 personins». Odillo lu cjalave cui vio viarts. Ma efetivamentri al jere di une altre bande. Cuviart da la so scufute rose, al stave in muel come une ranute, beat ta chel cliput agôs da la pissine, tal mieç di tante biele int che fevelave cun discrezion. Tant che a si fevin niçulâ dal cori dal tram numar 2, il plui famôs da la citât che ti parte tal mieç di dutis lis maraveis architetonichis e urbanistichis di Budapest, Odillo cidin cidin, polsât da la biele ore passade in muel ta l’aghe da lis termis, al scoltave Guerrino che al continuave a fevelâ di grotis e cavernis. «Pensa che sot di cheste citât, che a ere cugnussude ben prin dai romans, a l’è plen di cavernis. E plui di cualchi volte al è capitât di scuviergint cualchidune parcè che, di pont in blanc a si ere viarte une spacadore ta la tiare. Come che volte che a Janos Bagyura ai ere colade une piore ta une buse e lui par salvale al a scuviert la Grote PALVOLGYI, tant cugnussude par lis sôs stalagmitis. O che volte che a an scuviert la SZEMLOHEGY fasint i lavôrs di une strade». Guerrino al jere dut cjapât da lis sôs grotis. Odillo al incuintri al cjalave fûr dal tram, la biele citât che deve mostre di sé curint come un film sui finestrins. Ta pôc plui di vinç minûts il tram numar doi ti fâs viodi la plui biele muse di Budapest: la place Jaszai Mari, il puint di Margarite, il Grant Vial, la Cjase Blancje, di dulà che par plui di trente agns a è stade governade l’Ongiarie e che vuei a è la cjase dai parlamentars. Viodût che il sô soci no lu badeve plui che tant ancje Guerrino al veve ingrumât il nâs cuintri il finestrin dal tram e al cjalave passâ devant dai voi il panorame da la citât magjare: la plaçe Kossuth, dedicade al tant cugnussût eroi ongjarês, dulà che al si poe il palaç dal Parlament che al è lunc 268 metros. Praticamentri un monument a sé stes: a disin che i ongjarès lu vedin fat cussì par impressionâ i politics foresç che vignivin a Budapest. Pôc dopo il tram al passe denant dal palaç da l’academie da lis sciencis e ancjemò dopo dongje al Puint da lis Cjadenis, il puint che par prin al à tacadis lis dôs citâts di Buda e di Pest, fasinlis deventâ une sole robe. Cuasi a la fin dal percors a si cjate la Plaçe Marcius 15 da la cual si viôt il Mont di Gerart sul cuâl a è stade tirade su la fortece da la citât: lûc che ducj i turiscj a bramin di viodi di dongje, parcè che al è une da lis atrazions plui cugnussudis di Budapest. Ma il tram si ferme a place Fovam, ta une stazion sot tiare che a è il lûc che chêi che piturin i mûrs cun disens e scritis a amin di plui. «A proposit di stazions sot tiare: ma tu – al veve dite Guerrino cuasi sveansi dal sun invernal come che al fâs l’ors a primevere – sastu che a Budapest a an costruide la prime linee di ferovie sotcrostâl? Si, la vevin clamade propite cussì: sotcrostâl parcè che a coreve sot la croste terrestre». Propite cussì: se o vês voe di dismontâ ta une stazion e nasâ le atmosfere di plui di 130 agns fa, no vês di fâ altri che cjapâ la metropolitane di Budapest. Se invesite o vês chê di là par robis santis vi scugne dai un cûc a la Basiliche di Sant Stiefin il sant plui venerât da la capital e da l’Ongjarie intere. Drenti ta la basiliche i ongjarês a son tant orgoliôs di mantegni il braç e la man dal sant a disposizion di cui che al ûl cjatassile devant dai voi. Se, al incuintri, o vês miôr imbraça dute la citât cunt une sole voglade alore o vês di montâ su la cupole da la Basiliche che a rive a tignî, la glesie no la cupole, fin a 8500 fedêi drenti di se. Da la balaustre esterne di San Stiefin, a 65 metros di altece, podarês vê dute Budapest ai vostris pîs, dai une voglade di lontan a la Sinagoghe di Vie Dohany che a è la plui grande d’Europe e in grât di tegni drenti 3.000 personis. O podarès cjalâ l’imponence dal cjscjel cu lis sôs tre glesis, il Palaç dal Re e il cjanôr dal Bastion dai pescjadôrs. Se dut chest, lassant Budapest, vi lu partarês par simpri tal cûr, no stait a dismintiâ, come che i nestris amîs a no dismintiarân, che no si puês vignì vie da la capitâl ongjarese cence iessisi partâs vie tal stomi almancul un plat di gulash scoltânt une tzarde ta un locâl tipic. Ancje il stomi al ûl la sô part.