Bundì Udin, mandi Friûl e buine zornade a dutis lis animis che cjaminin su cheste tiare. Ultime puntade par il Lunari Metropolitan che cheste volte nus contarâ il viaç tal profont Nord da la nestre ormai solidissime cubie di amîs rivats, nuje che mancul, a lis puartis da la antighe capitâl dal imperi Rus par saludani. Mantignint la lor frescjece, clarametri. Ancje parcè che il lôc lu proviôt, a dispiet dai dubits di Odillo: «Guerrino tu tu às un bon ce fâ a dimi che a San Pieriburc nol fâs cussì frêt. Ma astu mai vuidût il dottor Zivago? Astu prisint trope nêf che a ere ta chel film? Jo mi soi partât dople razion di mudantis lungjs e il mê solit, inconfondibil e sincer plumin. Ros, claramentri. Sin in Russie». Guerrino al continuave a bati la sô: «Prin di dut, Russie o no Russie, cà jù il ros nol fâs plui il stes efiet di cualchi timp fa. E po, scolte: la vuide mi dîs che lis temperaduris medis a San Pieriburc a genâr, che al è il mes plui frêt, a son di macul 8 e dome raramentri a rivin a mancul 15. Par cui nô cumò o sin a puest. No sin a Vladivostock dulà che a rivin dispes a mancul 50. Sin in Europe ca. E ce Europe: San Pieriburc a mantignût la mior espression dal ‘700: pense che dut il centri storic al è sot la tutele da l’Unesco come patrimoni che al aparten a l’umanitât». «Ben, benon» al diseve Odillo «O sin dacuardi che come al solit tu mi partarâs a viodi cuissà ce momuments, adiriture cà o sin rivâts a une citât che a è, dute interie, un monument. Ma a ti, ti parie che mancul 15 nol sedi un fret bec, rût, di chei che ti segnin la muse?». Guerrino al veve cjalât perpless il sô amî, rivant cuasi a fâi crodi di no vê rispuestis. E al incuintri une rispueste la veve: «Viodistu il probleme no l’è trop frêt che al fasi. Trop che o sin sot zero o sin sot zero. Il probleme vêr al è che cà il soreli si lu viôt par pucis oris in dì». Odillo par che pôc che si podeve viodi al ere sblancjât: «Come si lu viôt par pucis oris? Ce vustu dimi che o sin come al polo nord che d’unvier a è simpri gnot e d’estât al è simpri dì?». Guerrino al riduçave sot da lis mostacjs che nol veve: «Eh si. No propite come al polo nord ma insome. Il fat al è che insome praticamentri o sin cà in plen inviêr e come che ti disevi la gnot a sarà lungje. D’estât, par chel che si pues dî estât un periodo lì che il termometro al massim al rive a 20°, il soreli nol va mai jù e la int di San Pieriburc a stà su dute la gnot a viodi films, spetacui, balets, concerts, a bevi e mangjâ». A Odillo a i erin colats i braçs. «Scolte Guerrino, sino in estât cumò?». «No» ai veve rispuindt che altri. «Alore dome gnot». «Eh, già» ai veve dite Guerrino, zontânt subite: «Ma il piês al è che cà al tire simpri un vintat pies da la bore. Astu la barete? Nooo? E alore simpri taponât in albierc devant dal televisor a viodi films svedes doplâs in rus». «Tu as di ritegniti fortunât – ai diseve Guerrino a Odillo – no tu sâs ce maravèe che al è il cîl di gnot ca vie». Odillo cul morâl sot dai tacs nol veve chê di rispuindi. Al ere mogjo nancje che lu vessin condannat ai lavôrs fuarçats a vite. «Se tu strissinis ancjemò i pits in cheste maniere tu mi sameis propite il condanât che Dostoevskij al descrîf ta Delit e cjastic». Ma il sô soci nol ere in grat di rispuindi a chestis peraulis. Inmusunît al cjalave bas, pensânt a ce dal diaul che lu veve partât a pessecà i claps di cheste citât di mar, vulude di un zar di Russie che, stant a chel che ai veve contât Guerrino, come mimino al ere mat come un cjaval, e che al veve vulût tirâ su dal nuie la gnove capital dal sô imperi suiant paluts, scavant canai e fossai, doprant come se fos cjar di macel al di plui di 30.000 personis che a erin muartis par dai concretece al sun di un mat. «San Pieriburc, la Vignesie dal Nord, a è fondade su plui di 110 isulis tacadis une cun che altre di plui di 700 puints. Ti rinditu cont, Odillo, di ce lavôr mostro che a an fat chei ca par tirâ su dal nuje, di une palût savoltante une da lis plui bielis citâts d’Europe. Pense trop che al gjoldeve il zar a viodi la maravèe stampade su la muse dai ambasciatôrs stranîrs cuant che a vignivin a cjatalu ta cheste bilisie di piere che a ere la sô capitâl. E pense che lui migo al ere architet, o gjeometra o costrutôr: fin di piçul al veve vut a cûr dome il mar. Al passave lis zornadis a fâ su modelins di nafs». Odillo però cumò al ere cence peraulis par altris motifs: fevelant dal plui e dal mancul Guerrino lu veve menât sot la colone di Lissandri tal mieç da la Plaçe dal Palaç, la maestose place devant dal palac dai Zar che al è fat nuje che mancul di 4 immens palaç un tacât di chel altri. «Orpo» al veve savût a dî Odillo. Dome chel: «Orpo». E po al veve tacât a zirâ sui tacs a 360 grats cjalant ator di sé cheste maestositât. «O savevi che tu varessis finît di lamentati devant di chest spetacul: chest al è il Palaç d’Invîer, di dulà che par 200 agns il grant imperi rus al fô governat. Une plaçe lungje mieç chilometro che a è une da lis plui grandis di Europe, se no la plui grande. Ator ator palaç colorâts e monuments che a recuardin la vitorie dai rus du Napoleon. Cà o sin tal cûr da l’Europe, tal cûr dal pensêr illuministic, da la ete da la reson che a à fat la difarence fra la nestre Europe e il rest dal mont». Odillo al cjalave Guerrino che al ere tal plen di un deliri mistic-illuministic «Scolte soci – al veve infin rivât a dì impirantsi tal mieç di chel sglavin di flât inglassat e fonemas dal caposocietât – A mi mi va ben dut. Sai che chest palac ca, grandonon lu ai viudut ancje ta un film che tu mi as fat viodi a cjase tô la gnot da l’ultin da l’an. Biel, eh! Blanc e neri. Plen di int che rive ca par copâ il zar. Ma cumò: viudût che no stin sudânt a Atene e nancje sborfant di cjalt a Tunisi: mi menistu drenti che il vint al tae come une britule?». Odillo e Guerrino, viodût i lor timps strets no podevin di sigur rivâ a viodi dut il mueseu che al cjate bon acet drenti ta lis plui di mil stanzis dal Palaç d’Inviêr. Stant a chêl che a diseve la vuide di Guerrino par rivâ a cjaminâ ducj i 24 chilometros di curidors da l’Ermitage, cussì a si clame chest mostro di museu, ai vûl une setemane intere. E stant al fat che la nestre cubie di amîs a è fate di furlans, si pues capî imediatamentri che ta chê setemane lor a varessin montât e dimontât cuissà tropis fieris. Cussì, dade une voglade all’ingres da l’Ermitage e lis fantasîs barochis dal Palaç d’Inviêr a vevin vût mior cjaminâ dilunc lis stradis di cheste citât plene da lis çatadis dai miôr architets talians da l’epoche. Une citât che, però a manten ancje dai primâts mancul edificants: se, come che o vin dite, al timp di Pieri il Grant che a l’à tirade su, a àn fat murî 30.000 sclafs par plantâ fondis e tirâ su murs, vuê San Pieriburc a conte alc come 16.000 fruts sbandonats che a vivin par lis stradis. E il 15% da la int residente a vîf ancjemò ta apartaments Kummunalka, come che a vegnnin clamats, dulà che bagn, cusine e cabinet a son doprats di plui fameis. Cun dolor di cûr lassin in bande chestis cifris dolorosis par sintî ce che si stavin disint Guerrino e Odillo tant che a cjaminavin cun fâ nobiliâr su la altretant nobile Prospettive Nevskij. «Ma si, tu às reson a dî che Pieri il Grant, il zar che al à vulude San Pieriburc al ere un pôc mat – ai contave Guerrino a Odillo – pense che lui stes al à vulût che la gnove capitâl dal sô imperi a vignis fate ca. Lui al è vignût a vivi tal mieç da lis paluts che une volte a la fevin di paronis su chestis tiaris ta une barache di 60 metros cuadris che ancjemò si pues viodi drenti da la fortece di San Pieri e Pauli». Come che o savin Odillo al ere interessât a la storie fin a un ciert pont. Il rest par lui lu fevin il mangjâ, il bevi e il torzeonâ. In ogni câs al veve domandât «Ta une barache? Chest ca al ere sclopât dal dut». Ma Guerrino no veve voe di replicâ: «Oh! – al veve dite – su chescj 4 chilometros di Prospettive Nevskji a son i plui elegants palaç di San Pieriburc, dulà che cumò a vîf la gnove borghesie russe. Ma pense che une volte, e no tant fa lis pieris dulà che tu cjaminis tu cumò a son stadis pestadis di Gogol, Cjaikosvkij, Turgenev, Nijinskij, Rimskij-Korsakov, Dostoevskij. I granc inteletuai e artiscj dal Votcent rus e european». Odillo si ere fermât juste su l’entrade da la catedrâl di Kazan: «Tu vuelis dimi che dal MileVotcent in cà il comun di cheste citât no l’à mai tornât a fâ i marcepits? Ah benon po!». E al incuintri i marcepîts a son altro che stâts tornâts a fâ. La citât ai tegn nevore a la sô bieleçe e al sô patrimoni inestimabil di architeture. Il contrari al sarès di mats: San Pieriburc a rapresente di simpri la citât plui evolude e liberâl di dute la Russie, la citât dulà che i intelettuai a son simpri stats plui libars e avaguardiscj. Forsite ancje par cheste a son cussì tanc museus: di chel dai viaç spaziai, a chel da lis armis, di chel da la marine a l’Incrociadôr Aurore che al à sparât il colp che al à dat principi a la Rivoluzion dal ’17. Par rivâ, cence recuardà l’Ermitage e il Museu Nazional di Russie, fin al Museu dai Samovar che a son, in pratiche lis nestris machinis dal cafè. San Pieriburc a è une citât plene di parcs, di cjantôns incjantats che a scolpin dopo un puint, daur di un canal, tancj dai cuai a podin iessi navigats cui solis batei par turiscj.

Bundì Udin, mandi Friûl e buine zornade a dutis lis animis che cjaminin su cheste tiare mai plui di cheste volte o podin scuminçâ la puntade partânt la bandiere dal nestri sproc preferit: «E dal Manzanarre al Tiliment…» propite cussì parcè che cheste volte la nestre cubie di amîs a è rivade fin a Madrid, capital da la Spagne, citât industriose e oziose dulà che si daveulç ogni an, di cualchi timp in cà, il famos “madridfusion”, ven a stai la fiere internazionâl dal bon gustâ. E podevino mancjâ Guerrino e Odillo a chest apuntament cun la storie, a chest incuintri cul futur da la gastronomie, a cheste cunvigne cun la luminositât dal gust? Ma no! Come varessino fat a pierdi cheste ocasion! Tant di plui che Madrid no è propite, come che viodarin, une citât di buta vie. A è plene di monuments, di storie, di modernitât e di antigae. Ma, soredut, Madrid a è une citât vivarose, plene di voe di vivi, plene di int che a à voe di gjoldi e di no lassâ pierdi nancje une pussibilitât di tirâ matine. A no l’è un câs se i madrilens a son cugnussus in dute la Spagne e ancje plui in lâ par la lor passion par la gnot: al lâ jù dal soreli si impîin, si svein, si metin in moto par rinfrescjâ la “movida“ ven a stai la vite noturne. E no par nuie, disevin, in dute la Spagne cuant che diseis “i gatos”, i gjats, no fevelais di nemai ma di madrilens! «Secont te isal miôr se o cjôi ancjemò un di chescj “churros” ca? Cuissâ mai che mi vegni fan». O savin che Odillo, dal pont di viste dal stomi, al è nevore prevident. Ma Guerrino di chê altre bande, stant a lis sês vuidis, al è nevore informât, par cui ai veve imeditamentri fermade la man al sô soci. «Odillo no stin fasi cognossi» al veve dite «No satu che a Madrid si mangje a dutis lis oris. Cun di fat, come che o stin fasint, a matin si bêf il cafè cul lat e chest churro che ti è tant plasut». «Oh! Si, si» al veve rispuindut Odillo capint che il discors di Guerrino si faseve interessant. «Prin di gustà, viers la une – al veve continuât Guerrino – si rispiete il rituâl dai bars di tapas: si compagne une birute o un bon tai di vin cin stuzighes di bacalà frit, ûfs e patatis saltadis, paninuts, crostins cun lis aciughis, scais di formadi, olivis neris, gaspacho, chorizo, longaniza e boutifar». A Odillo si ere impiât il stomi. «Ma atenzion – al veve continuât Guerrino – che cà il gustà no l’è pront prin da lis dos. Cualchidun si sinte in taule ancje as cinc dopomisdì. Dopo dut prin das dîs di sere no si cene. Al è par chest che dopo lis siet si torne a fâ un zîr di tapas». Odillo al ere afamât ma ancje dubiôs: «Si ma cun dutis chestis oris passadis a parà jù, cui lavoriâl cà?» Su la Gran Via, la vie plui centrâl di Madrid, Guerrino e Odillo a cjaminevin cun il fâ di cui che al à tantis robis di digjerî, ancje se ator di lôr al ere dut un corisi daur di int in plen fermênt. «Viodistu ca – al diseve cun calme serafiche Guerrino – lis ostaris e tancj ristorants par di fûr a son ducj decorats cun piastrilutis coloradis: un mût par fâ capî a la int che lì si mangje, par atirâ l’atenzion». Odillo al ere dut intent a cjalâ lis targhis che al principi di ogni calle, come a Vignesie, a indichein il mister plui praticât ta chê strade: come Paradiso del Panecillo (ven a stai vie dal pancôr), o Calle de Botoneras, che a saressin lis, tradusint in maniere strampalade, la Cale da li botoneris, lis sioris che a tachin i botons. Ma la robe che di plui a steve cjapânt i nestris doi amîs a ere chê di scuviergi che Madrid, pur vin cualchi milion di abitants, a veve ancje cualchi biel milion di arbui: di chêl che si dîs la capitâl da la Spagne a à plui o mancul 2 arbui par ogni persone residente migo mâl. «Al è par chest – al veve continuât Guerrino – che si cjatin tanc “Paseos” come chel da De Recoletos che al è la continuazion dal Paseo de la Castellana: i paseo a son i cuintreviai par i pedons, plens di arbui e magari di aghe lì che i madrilens a cjaminin fevelant o cjalant mostris. E di vert t’un cjatis ancje tant tai zardins sparniças par la citât come i Jardines de Sabatini che a sono propite devant dal Palaç Real». «E cumò no sta rabiati» ai veve intimât Guerrino a un Odillo che subite al veve nasade puçe di tramai. «Chest ca denant – al continuave Guerrino – al è il Palacio de Oriente». «Nol vevie di iessi il Palaç Real?» lu veve subite interogât Odillo. «Praticamentri si: ma il Palaç real no si clame cussì ma si clame Palacio de Oriente. E cun di plui il re e la regjne no vivin plui chi ma a son a sta fûr di Madrid» al veve concludût Guerrino. «Alt. Stop. Ferme: no sta dì altri. No stâ vignimi fûr cun storis dal tipo che cumò cheste no è une Republiche ma une monarchie e che la Spagne no è la Spagne ma la Mongolie» Odillo al ere cuasi inferocît. Ma Guerrino, come il miôr domatôr dal circo Zamperla, nol veve dat timp al sô soci di pierdi i scarpez: «Chest palaç lu an tirât su doi architets talians, Sacchetti e Sabatini dopo che, tal 1734, un gran fûc al veve sdrumât il Cjscjel dal Alcazar. Come che tu viodis devant dal palaç a è la Plaza de la Armeria e daur invesite a son i Giardins di Sabatini di dulà che o sin rivâts nô». E lì dongje, zontin nô par necessitât di precision, a è ancje la Catedrâl di Almudena. «Ma scolte Guerrino – lu veve interot Odillo – chest Sabatini, Sabatini, no? Nol vevial un cognon un tic furlan». Il so soci cheste volte lu veve seat come la mediche il mês di lui: «Al ere di Palermo. E dopo l’à cjapade la citadinanze spagnole. Lasse pierdi». «Ciò Guerrino, ce che ai plasin che telis pituradis picjadis a lis parets ai spagnoi, eh?» Odillo al amireve la plui grande colezion al mont di arazzi che a fâs biele mostre di sé tal palaç daì re di Spagne. «E astu viodût la sale dal trono ce biele che a è cun dut chel ros a lis parets e chei cuatri leons d’aur che a fasin la vuardie ai tronos» al veve rispuindût Guerrino, repubblican di fiêr ma cheste volte un tic ingulusit dal sflandor da la regge madrilene. «Bon, jo no soi un espert di art – al veve sberlât Odillo tirant il cjâf indaur cuasi che al vês voe di fassâl colâ, ma chel la disore mi par di cognossilu. Il stîl, la man, la lûs: chest cà al è un furlan. No tu puedis neamâl». Guerrino, implacabil, no in lassave passà une: «Furlan? La borse! Che al sedi da lis nostri bandis o sin d’acuardi. E che tu lu vedis viodut a Udin no ai nue ce di. Ma chest cà al è l’ultin afresc che GiovanBattista Tiepolo al à fat prin di murî. E Tiepolo al ere di Vignesie. Amalteo al ere furlan. Il Pordenone. I Basandiele. Ma Tiepolo al è di Vignesie». Odillo al ere restât come al solit mâl par la sapience di chest sô soci operari cussì colt. «Ah bon – ai ere sbrissât di sugjerî a la fin – lis indicaziôns a disin che par di cà a sedi l’armerie. A mi mi plasin lis armaduris. Cuissà se an armaduris ancje par i cjavai. O magari lis alabardis. E lis spadis? Eh! No stin fevelâ da lis spadis po». «Ve cà ce bielece, eh, Guerrino». Chest al restave simpri sbalordît da la capacitât dal sô soci di iessi, tal stes timp un musan e un inteletuâl: cumò al ere come piardût vie devant da “Las Meninas o la familia de Felipe IV” la opare mestre di Velasquez che a è un dai cuadris di ponte dal Prado, il gran museu di Madrid. «E no tu as ancjemò viodût la maestrie gnotule e dramatiche dal Goya che al piture lis fusilasions dai patriotas spagnoi» ai veve fate eco Guerrino tant che ai spiegave che il Prado al ere stat pensât come un museu da la Science e che dome dal 1818 al ere deventât pinacoteche, ven a stai lûc dulà che si podin amirâ cuadris di artiscj famôs. «Sot la cupole che a da lûs al Prado tu podis cjatâ lis plui competis colezions dai grancj pitôrs spagnoi dal passat: Velazquez, Goya, Murillo, Ribera e Zurbaran. Nol mancje cualchi opare mestre di talians e di fiammingos». Odillo al cjaminave al pas cun Guerrino ma il sô pensîr al lave a passon su altri trois: «Ce ore isal, soci?», «Cinc dopo misdì barbe» ai veve rispuindût pront Guerrino cence capî dulâ che al voleve rivâ Odillo. «Eeee, no l’è che tal museu a sedi une ostarie che magari a sbreghe la regule e nus mole cualchi tapas di parâ jù?». Guerrino al ere indignât: «Tu ses un poç cence font: e par puniti cumò ti meni in Plaçe Colon a puartâ i flors sot il monument di Cristofar Colomp, e ti innei ta la fontane che a simbolegje l’Ocean». E dopo Plaçe Colon Guerrino al veve strapuartat Odillo a viodi la Stazion di Atocha, che a è restade stazion dai trenos come che la veve pensade l’architet Rafael Moneo, ma che a è ancje stade trasformade ta une serre di plantis tropicals. Cà i madrilens a vegnin, soredut d’inviêr, a partâ i fruts cuant che fûr al è brut timp: «Altro che là tai centros commerciâi: i madrilens a preferissin la culture, il vert, il fevelâ, il cognossisi» al veve dite Guerrino. «E cumò o lin a dâ une voglade a la Plaza de la Villa, un dai puescj plui romantics di Madrid, che a è la sede dal Municipi da la citât. Chest puest al mantegn intàt il spirt dal 1.600 cuant che al è stât tirât su». Dopo chest bagn tal passat prossin, Guerrino al veve partât Odillo a viodi une altre part di Madrid, che a è une citât di storie ma ancje une citât di modernitât. Vejù cà alore in Plaza de Espana a spietâ l’ore di tornâ a sintasi ta un bar di tapas propite sot il monument al plui cugnussût scritôr di lenghe spagnole: Miguel de Cervantes».

Bundì Udin, mandi Friûl e buine zornade a dutis lis animis che cjaminin su cheste tiare ancjemò une puntade a torzeon par il continent dai nestris doi operaris. Une puntade che a tache cunt un Odillo dal dut perples a zirâ par lis stanziis di un apartament di une capitâl europeane. Ce isal daur pensâ Odillo? Parcè chest apartament no i plasiâl? E si che, ta la citât dulà che al è cumò, a si mangje e si bêf come che ai plâs a lui: gulashsuppe, wursterl e bire a etolitros. E po a è une pâs, une calme, un ordin che si podarès cuasi definî imperiâl. «La smetitu di partati daur che muse lì, eh? Odillo » ai veve dite Guerrino tant che lu strissinave di stanzie in stanzie cjalânt i mil ravetolêts che a restin ta la cjase di cualcidun che a no l’è plui e che a formin part da la sô figure mitiche. «A mi chest cà no mi è mai plasût – al veve sentenziât Odillo – ma viôt tu ce che al scugnive tignisi in cjase. Ah!? Si viôt che al ere un miedi. Un miedi mat! Ma ti parie che di cuant che chêst cà si è mitût a mateâ cui suns cumò no si podedi plui passâ une gnôt serene? Che no si podedi plui sumiâ in pâs che subite tu as di sintiti in colpe parcè come minimo, ancje se tu ti sumîs di mangjâ un cuintâl di wurstel cun la senape disore e une bune bire in bande, come minim tu as chê di copâ to pari, se no tu as bielzà sasinade to mari. Chest cà nus à ruvinât ducj. Vie, vie di cà». E cun chestis peraulis Odillo al veve cjapât Guerrino sot il bras: miôr respirâ l’ajar fresc di Vienne che nò scjafoâ tal gabinet scientific di Freud. E alore Vienne! Eco dulà che i nestris amîs nus an menât cheste setemane: Vienne la dolce, Vienne la studiade, Vienne l’elegante. E, claramentri, Vienne l’imperiâl: che Vienne che ancjemò a à une biele part dal cûr di tancj furlâns che disore l’ùs di cjase no an la rame di ulîf o la copie dal crocifis di Cimabue ma l’imagjne sflandorose di Barbe Zef, ven a stai l’ultin imperadôr Franz Joseph, chel che par 68 agns al à tignude la man sul cjâf da l’Austrie e di mieçe Europe. Partanle ancje tal maçalizi da la Prime Vuere mondial ma chest al è un altri discors. E alore tornin a nô, a Barbe Zef e a la so mitiche Elisabete, l’imperatrice Sissi, da la cual ogni an nus fasin viodi dute la serie televisive dai films a jè dedicâts! E dulà vivevino chescj doi sflandorôrs parons di mieçe Europe, chescj inlumiânts sovrâns dal Imperi Austro ungaric? A Vienne, nus ven di rispuindi. Ma mior ancjemò tal palaç dal Hofburg, dulà che cumò Odillo e Guerrino a si stavin piardint a cjalâ i apartaments privâts lì che Zef e Sissi a vivevin la lôr vite di ogni dì: «Ohu, sastu – ai stave disint ta une orele Guerrino a Odillo cence fasi sintî da la vuide – Sissi, ta chei agns a veve scandalizzât i austriacs sastu parcè? Parcè che si faseve il bagn une volte in dì!». «L’Hofburg, ven a stai il palaç imperiâl – al conteve Guerrino a un Odillo no propite interessât – al è dut un fasi dongje di palaç e struturis che a àn tirât su tacânt dal 1.200 rivant fin ai prins agns dal Nûfcent, cuant che, par volontât di Franz Joseph a àn tirade su l’ale gnove». Il barcon central di cheste, zontin nô, finide tal 1913 cinc agns prin che l’Imperi Austro-ungaric al sdrumas jù come un cjscjel di cjartis, a è coventade ancje a un piçul austriac cui bafets, naturalizât todesc, par contâ a Vienne che di chel moment l’Austrie no sarès plui stade une nazion libare. «Di cheste bande – al continuave Guerrino – ta l’Ale Gnove dall’Hofburg, al è il museu dulà che si cjate dute l’argenterie e lis bilis da la cort imperiâl. Ma dongje a i serzivis par parecjâ lis taulis dai imperadôrs a si puês cjatâ ancje alc di mancul lizêr: come la corone dal Sacri Roman Imperi che a è stade fate prin dal Mil e la corone dal Imperadôr da l’Austrie dal 1.600. E dopo viodarin il tesaur dai Burgundi, chel dal Ordin dal Vello d’aur e, nuie che mancul, un claut da la cros di Crist e un dint di San Pieri». Maraveis su maraveis o disin nô. «E dopo, ce podino amirâ ta cheste stupende residenze imperiâl?» al veve domandât Odillo a un Guerrino veramentri in vene di impersonâ une vuide turistiche professionâl cun ombrenute e plere di amplificaziôn: «Ta la Ale Gnove dal Hofburg a si cjate il museo Etnologjc, il Museu di Efeso e la sale di leture da la Biblioteche Nazionâl. E po ancje la coleziôn di ritrats e l’archivi da lis imagjnis da la storie austriache, la sale da lis Armis, da lis armaduris e la coleziôn dai Struments Musicâi antics». «E chei monuments là par cui sono?» al veve domandât Odillo «Chel sul cjavâl al è un talian, Eugenio di Savoia che a à tant ben difindude Vienne cuntre i Turcs. Chel altri al è dedicât a Mozart. Dopo a ‘nd’è un dedicât a Francesc I e un a la sô femine Marie Tarese». Odillo però si ere fissât su l’ultin, chel di un vecjo che al burive fûr dute la malinconie da la fin che stave par rivâ e da la sô solitudin. «Chel vicjut cà, cussì inmalincunît, che al samèe propite a un puar vedul che al pense dome a la femine piardude che al à tai voi une robe che a samèe a la fin dal mont cui isal?». «Chel che tu as cussì ben savût contâ – ai veve rispuindût Guerrino – al è l’unic monument che l’Austrie al sô plui grant imperadôr: Franz Joseph. Fat viodi tal mût plui malinconic che si podes». «Cumò ti fasarai viodi une robe che a ti lassarâ cence flât» al veve dite Guerrino tirant Odillo par il plumin. «E ce saressie cheste maravèe, studiât di un operari torzeon?» al veve rispuindût Odillo. «Ma la Capele Imperiâl claramentri – al veve rispuindût Guerrino – tirade su in stil gotic, dulà che la domenie e ta lis fiestis comandadis l’orchestre di cort, la Cantorie dai Piçui e il Coro da l’Opare di Stât a sunin musichis di Mozart, Haydn e Schubert». «Oh-oh!» Al veve rispuindût Odillo zontânt «E come mai dute cheste sflandorie ta cheste glesie?». «Ma parcè che a è la capele imperiâl, ven a stai la Glesie Dai Agostinians tirade su dal 1.300 e plene di bielis robis di cjalâ: come l’imagine miracolose dal altâr maiôr, la capele dedicade a San Zorz e il monument a la grande imperadore Marie Tarese». Odillo al ere un tic perplès: «Dut cà?» al veve dite. «Scherzitu? – al veve ribatût subite Guerrino – ta cheste Glesie, che a à viodût lis gnocis di Napoleon cun Marie Luise e di Francesc Josef cun Elisabete di Baviere, il lôc plui impuartant al è la Cripte dulà che si conservin, ta podins di arint simpri lustris, 54 cûrs di imperadors e imperadoris dai Asburgs». A Odillo si ere savoltât il stomi. «Ancje i austriacs no l’è che a sedin tant a puest, eh?» al veve dite Odillo un tic stomeât dal vê viudût i podins lì che si conservin i cûrs dai imperadors «E dulà sono i rescj di cheste puare int?» al veve infin domandât a Guerrino che pront al veve la rispueste za in cane: «Ma ta la famose Glesie dai Capucins nevore cugnussude ancje par vie di cierts libris che su di jè a àn scrit. Cà a polsin i rescj di 146 nobii: 12 imperados e 19 imperadoris. Però volevi diti che se i cûrs dai imperadors a son ta la Glesie dai Agostinians, lis vissaris a si cjatin ta lis catacombis da la basiliche di San Stiefin». A Odillo ai ere passade dute la voe di gustâ cun fan une apetitose gulaschsuppe tocjânt drenti un cuintal di pan. «Bon – al veve dite infin Odillo – partimi a viodi alc di mancul terorizânt». Guerrino al veve imediatamentri viarte la vuide: «Cheste ca, di forme triangolâr, a vares di sedi place Freyung – al veve dite Guerrino – che a è plene di palaç dal Siet e dal Votcent: pense che propite su cheste place une volte a tiravin su la force». Odillo nol veve capide la peraule: «Ven a stai che ca al ere plen di cjamps e a partevin il fen par fâ cumieris?» «No Odillo – ai veve rispuindût il sô soci: la force, il patibul, chel che al covente a picjâ i condanats a muart». «Ossignor – al veve burt fûr Odillo - ma no mi stan tan simpatics chescj austriacs ca a mi!» Ma lassin pierdi lis fantasis macabris di Odillo: Vienne a è une citât luminose, nete e plene di gracie, dulà piardisi cun tal cûr ancje lis imagjnis dai film che, cun tante propagande, a fasevin deventâ mirabolante la vite di Sissi. Imagjnis che si podin tornâ a vivi lant a viodi il museu dedicât a la imperadore o cjaminânt ta la bieleçe dal Cjscjel di Schönbrunn. E alore piardinsi tal Belvedè di Vienne, tra lis bielecis da lis iechis fluridis dai sei grancj zardins, o fra il vert sclopetant dal Prater, dulà che a zire cence flacje la famose rode panoramiche che a cor a 75 cm al secont. Il vert al è protagonist ancje dal Parc sul Danubio dulà che, cui che nol sufris di vertigjnis, al pol montâ su la famose Tor dal Danubio, alte 252 metros, par vê sot di sé dute la citât. Cui che al vol inneasi ta la Vienne baroche al à di rivâ fin su la place di Carli dulà che claramentri a è la Glesie di San Carli tirade su par un vôt cuant che Vienne dal 1713 a ere martoriade da la peste. Cui che al vôl invesite butasi tal neo gotic al à di rivâ sot da lis guglis dal Gnûf Municipi, che tirât su a la fin dal Votcent a nus mostre da lis guglis altis cuasi dusinte metros. E voltânt il cjâf si cjatisi devant il Teatri da la Citât, vulût da la imperadore Marie Tarese e ispirât a Rinasciment Talian. Insome Vienne a è simpri Vienne: e nol covente Zico par sintisi a cjase.

Bundì Udin, mandi Friûl e buine zornade a dutis lis animis che cjaminin su cheste tiare pais che tu vâs usancis che tu cjatis. Un sproc che al è dut un program. E su chest program la nestre cubie di amîs a ere intente ta une furiose, si fâs par mût di dî, discussion. Un cuntindi la cuestion che nol partave di nissune bande. Ma di ce stavino fevelânt Guerrino e Odillo, in maniere cussì pengje, sintâts su la teraçe di un ristorânt? «Tu as di rivâ spiegami cheste robe, Guerrino – al diseve Odillo al sô soci – No tu puedis simpri lassami come suspindût su la ponte dal cjampanili di Mortean. Alore: Bacelone a è une capitâl, ma no è une capitâl parcè che la capitâl a è Madrid. Amsterdam la crodin ducj une capitâl ma la capitâl a è l’Aia. No stin fevelâ di Londre che a samèe une robe dute taliane: di mil agns i inglês a àn Londre come capitâl ma nissun al à mai scrit che a è, cun di fat, la capitâl. Che doman al rive un suizzar e al dîs: “cumò la capitâl a è Berne” e jù che ducj i ingles a fasi la cjarte d’identitât in svuizzare». Guerrino a si implenave la bocje di fueis di lidric cence dî nue tant che al sumiave cuatri fricis di rasse drenti la tirine. «Guerrino, e alore, ce mi distu?». Finalmentri Guerrino al veve capît che a ere l’ore di fevelâ di pulitiche: «Scolte Odillo: o sin a Atene. Scugnitu par fuarce stressami parcè che secont te la salate greche no a nuje a ce fa cun Atene cumo?». E tachin propite di ca la nestre conte su cheste capitâl da la gnove Europe che, cence miezis peraulis, par dirit di primogeniture, a è “La” capitâl d’Europe: la nestre storie, la nestre culture, i mits che nus an insegnât a scuele e che, secont cualchi teorie gastropsichiche, nus tormentin ancjemò lis gnots, no nassino ducj a Atene o no sono ducj fîs di Atene? Atene, Atinai la grande, la citât che, si dîs, in origjne a ere dut un cu la dee che le à generade, Atene dal non particolâr, forsit adiriture di origjne etrusche. E alore la storie si cor daur, a zue a platasi, a burî fûr dut e il contrari di dut. «Ce erial al principi? Contadins, pastors, vuerirs? Cui sae – al diseve Guerrino a Odillo – ti dîs pur, il non di Atene, secont i esperts, par chel sufis “–na” finâl dal non origjnari, al samearès che al fos etrusc». «E ce centrino i etrusc in Grece – al veve rispuindût Odillo – Ce sono vignûts a fâ cà, la spese?». Guerrino al saveve che il sô soci al ere cussì gnarvusìt par vie da la rispueste mancjante. Cun dut a chel al continuave ta la sô spiegaziôn: «Odillo! Atene, ca tu sês tal cûr di chê che a è le nestre storie, il passât, il mît. Pense che a disin che cheste citât a sedi stade fondade di Cecrope, mieç omp e mieç sarpint». A Odillo si erin sclarîts i voi: «E ce mangino i sarpints?». Guerrino si ere ciatât splazzât: «Ce mangjno i sarpints?» al veve ripitût mecanicamentri. Ben Odillo, i rispuindin nô: no savin ce che a mangjn i saprints, e tant di mancul i fenomenos mitics come Cecrope, mieç omp e mieç sarpint. Ben però o savin ce che a si mangje in Grece: e su chest Guerrino cu la sô infallibile vuide al ere nol podeve sbaliasi. «Scolte Odillo ta chei agns no sai ce che a mangjevin. Sao jo se il lidric dal poc al ere il plat principâl da la diete di Ulisse o di Pericle. No mi pâr che Platone al vedi scrit che Socrate pôc prin di mur al vedi mangjat lidric cu lis friçis». «Viot di iessi precîs» al veve specificât Odillo che al intuive che alc al stave par vignîi dongje. «Alore – al veve continuât Guerrino – a part il particolâr di mangjâ bivînt Ouzo, il licôr a l’anice, i grecs talis grandis ocasions a mangjn il brik, il famôs cavial ros. E lu compagnin cun la taramosalata, la salate di ûfs di pes. Se no ai metin dongje la melitzanosalata, il purè di melanzanis». Guerrino no l’ere rivât ancjemò a impiâi la tripe a Odillo «Ca si dopre tant il tzatziki – al continuave Guerrino – la creme di yogurt cun cadumars e ai. I Yemistà, pomodoros riplens di ris e cuets tal for cun lis patatis. Se no i Dolmandes, fueis di vît con ris e cjar. Ma i plui cugnussuts a son i souvlaki: i spiedins di cjar di agnel e purcit». «E la salate greche?» al veve domandât Odillo. «Chê – al veve rispuindût Guerrino – ma che tu la mangjs ancje in vie Cividât a Udin: la salata horiatiki a è fate cun pomodoros, zavole, pevarons, cadumars, feta e olivis neris». Nuje di fâ la discussion sul mangjâ e bevi in Grece no partive. E alore nol restave che dispicjasi di chel taulin di ristorânt par lâ a cognossi Atene: «Une da lis citâts plui incuinadis di Europe purtrop – al veve dite Guerrino – pense che une volte di Corinto, che al è di chê altre bande dal golf dal Pireo o vedevi dome une nule nere disore da la capitâl». E su chel Guerrino nol veve che rasôn: par trop che a sedi impuartante Atene a è sfluride tai ultins timps, passant di piçule capital di un regn margjnâl a capitâl di une republiche che vuê a è a plen titûl ta l’Europe. «Bon Guerrino – al veve dite Odillo - no soi convint che la tant cugnussude salate greche a vedi dome ches cuatri robis drenti. Se a fos cussì al podarès vele inventade un cualsisedi emigrant grec che al lavoreve ta un di chei puestaç che a ti fasin panins che san di simpri compain di Pechin a New York. A part chest ce vino di cjalasi ta cheste sflandorose capitâl da l’Ocident?» «Sastu cual che al è il probleme di Atene Odillo – ai veve domandât Guerrino – che pur iessin il model di capitâl e di stât democratic, la sô storie tal 377 prin di Crist a ere za diventade margjnâl». Odillo al ere restât di sal: «Tu mi stâs disint che o sin ta un puest che di 2.200 agns nol conte plui nuje. No l’è che vinars, cuant che o vin finît di montâ la fiere, a ni pain cun monede che a valeve prin di Crist, no?» E in efiets a Atene un ce al vegnie a fâ? «Ma a viodi l’Acropoli, no?» al veve rispuindût Guerrino cence iessi interpelât. «Ancjemò robe sdrumade?» al veve dite Odillo che fasinsi coragjo al veve tacade la salide a la vere scune da la civiltât e dal dirit democratic ocidentâl. «Viodistu Odillo – al continuave Guerrino – ca disore no l’è tant alt, a son dome 156 metros, ma come che tu viodis, se ti pensis che lis rampis par vignî su a lis an sistemadis tant timp dopo, cual esercit podevie pensâ di rivâ fin ca su?». Ta chei 140 metros di largjeçe e cuasi 300 di lungjeçe l’Acropoli, che a è cognussude ancje come Cecropie, in onôr dal famôs prin e legjendari re di Atene, a ten drenti di sé la storie da la Grece. «Viodistu – al diseve Guerrino a un Odillo plui impegnât a tignî bon dut l’ai dal tzatziki che al veve tal stomi che a la bieleçe che al veve ator – i prin rescj ca disore a son dal VII secul prin di Crist. Che volte a erin muris altis che la difindevin ma a fuerin demolidis dal 480 prin di Crist dai persians. Dopo lis an tornadis a fâ su Temistocle e Cimone dopo la vitorie sui persians, chê volte che Fidia al veve sculpît la Atena Promachos, la monumentâl statue dedicade a la dee che a dà il non a la citât». «Ah – al dite Odillo – ma alore la Grece a à invadût l’Iran». «Cuant?» al veve rispuindut Guerrino dut preocupât. «Ce sao jo. Tu tu as dite che a àn fat la vuere cui persians». «Ma no Odillo – al veve rispuindût Guerrino: i persians no i iranians: ti stoi fevelânt di cualchi secul prime di Crist, migo di Saddam Hussein!». Dopo ve cjalât in lunc e in larc l’Acropoli, fasint in mût che Odillo si sintîs un pôc Pericle e un pôc Achille, ancje se dai doi al cognosseve dome i nons, i nestris doi socios a vevin vût miôr visitâ il famôs cuarîr da la Plaka, un dai plui carateristics di Atene. «O sin propite sot da le Acropoli – al spiegave Guerrino a Odillo – e chest al è il cûr da la Atene commerciâl e moderne». «Turistiche» al veve proponût Odillo al cuâl il cuartîr da la Plaka nol faseve propite une biele impression. «Ce vino di viodi ca, Guerrino? A son dome ristorants, ostaries, e buteghis di robis par i turiscj». Guerrino si ere cjatât un tic splazzât di cheste osservazion dal sô soci. Efetivamentri nol ere tant ce viodi la in mieç: «Però, se tu vuelis – al veve propunût – di ca sot tu puedis gjoldi da lis smiciadis da la Acropoli migo mâl?». Declaraziôns che no vevin entusiasmât Odillo che, ormai abituât altro che ben, a si spietave simpri il miôr dai puescj dulâ che Guerrino lu menave. «Bon alore – al veve concludût Guerrino – se o vin chê di viodi alc di interessant o vin di rivâ fin tal Museu Archeologjc che al è un dai prins dîs grancj museus dal mont. E se chest nol baste a cueitâ la tô fan di culture podin ancje visitâ il Museu Benaki, che al ospitèe lis tetimoneancis storichis che a partissin da la preistorie e a rinvin fin al secul XVIII o se no lin tal museu bizantin, li che a son lis plui bielis iconis che si puedin cjatâ». Dopo la part plui tradizionâl da la citât, che a presente cuartîrs nevore carateristic, Odillo e Guerrino a vevin cjapade la metropolitane, un mieç di traspuart che a Atene al è stât potenziât dopo lis Olimpiadis dal 2004, e a erin rivâts fin tai cuartîrs plui modernos da la citât. La jù Platia Omonias e Platia Sintagmatos, leadis da la Vie Venizelou, a erin i doi centros plui impuartânts ator dai cuai a zire la vite da la citât intere. Ta chê zone da la citât si cjate la catedral catoliche di Atene, l’Academie da lis Siencis, l’Universitât e la biblioteche generâl: chescj ultins a stan ta dai palaç tirâts su in stîl gnûf-classic. Là dongje a vevin vût mût di visitâ ancje la Glesie Bizantine di Sant Teodoro. Dut chest prin di rivâ al Pireo, il puart di Atene, dal cual a vevin cjapât il traghet par rivâ fin a Egina par viodi un dai plui vecjos templis da la citât chel Atena Afaia, tirât su tal V secul prin di Crist.

Bundì Udin, mandi Friûl e buine zornade a dutis lis animis che cjaminin su cheste tiare, ma trop grande ise Londre, che nus è vulude une puntade intere dome par rivâ a contâ la vignude di Guerrino e Odillo fin tal l’albierg? E mancul mâl che a la fin Guerrino si è rindût a clamâ un taxi, se no cuissà dulà che o varessin cjatât Odillo: disfât ta une pocjare inglutide da lis fognis londinesis o direttamentri dal Thames. E viudût che tal Thames nancje i delfins a rivin a vivi, come che al dimostre il fat sussidût l’an passat, figurinsi un operari furlan ce fin che al varès cumbinât. Ma tornin a nô, anzi tornin a lôr, a la nestre cubie di operaris che, come al solit, prin di tacâ une lungje setemane di mateaments cun menevits eletrics e scjalis mussis, a si stave cjalânt ator, propite su la puarte da l’albierc, par capî dulâ la a mangjâ e bevi. «O vin dome di decidisi» al diseve Guerrino a Odillo che lustri e tirât a gnûf a si stave figotant la tripe cun l’idèe di rivâ a cjatâ alc che la partès a une felicitât passude. «Par me – al veve rispuindût a Guerrino – tu sâs che o mangj dut. Ma ancje se o sin ta une metropoli, lì che, come al solit, si pues mangjâ di dut, viudude dute la int che ai vîf, no podaressino provâ alc di ingleis?». Guerrino nol spietave altri, al ere dai timps da la morose triestine che al veve a la universitât che al spietave chest moment: «E alore fish and chips» al veve dite. «Ma ti ise plasude a ti cheste robe?» al veve domandât Odillo a un Guerrino suturni. «No, mi è restât nuje in bocje e tant di mancul tal stomi» al veve rispuindût chest preocupât no tant par la sô fan, cuant par la fan dal sô soci che, prin o dopo - e savin che al sarâ pluitost prin - a si sarès fate sintî. «Bon intant fin une cjaminade – al veve zontât Guerrino – di sigûr no par digjerî. Ma se nus torne fan ti promet che ti la farai passâ. Intant cjale ca ce cas! O sin propite sot la targhe che a recuarde la cjase di Sherlok Holmes!». Chest al ere il pat: une volte passudît, Odillo al sarès lât daur come un cuti al sô soci par cognossi lis citâts. Par cui, viodût che ancje se nol ere passut, mangjât al veve mangjât, cumò a ere l’ore di tacâ la seconde part dal zûc: «Scierlok cui?». «Holmes, Sherlock Holmes - al veve tornât a disi Guerrino – il famôs investigatôr inventât di Doyle bon di risolvi cualsisedi câs judiziari. Pense che ancjemò vuê ta cheste cjase il puestin al parte ogni dî no sai cetanc zeis di pueste cun richiestis che a rivin di dut il mont, par risolvi câs ingredeâs e inspiegabii». Odillo al veve i vôi fûr dal cjâf: «Vustu dimi che lis puliziis scientifichis a domandin a un muart di gjavaiu dai gerdeis? Osssignor: un’altre citât di sunats!». «No è cuestion di sunats e nancje di sunadôrs – al veve rispuindt Guerrino- . Londre a è stade, forsi plui di cualsisedi altre citât une citât leterarie, une citât fate di peraulis e da lis peraulis. Une citât contade e inventade da la leteradure, insome. Se al saressial il punt di Londre cence l’imagjne che di lui a ni rive da lis peraulis dal La Tiare Pustote di Elliot? O saressie une citât misteriose Londre se Doyle no i vês mitût lis atmosferis di Sherlock Holmes? Ce citât saressie la capitâl inglese cence vê l’imagjne che di jè nus à lassât Daniel Defoe cun Moll Flanders e ancjemò di plui cun Diari da l’an da la peste? E, cence contâ il polac Joseph Conrad che al à imparât l’ingles miôr dai sevidors da la regjne, la gnot a saressie cussì scure se Robert Louis Stevenson nol vês ambientât a Londre il Stran cas dal Dotor Jekyll e dal sior Hyde? Adiriture Londre, par lis generazions che no son lis nestris, a continue a vivi di leteradure preparansi za par il futûr: se a è vere che cheste a è, no stin dismintialu, la citât su la cual al svualeve e ancjemò al svole Peter Pan, se nus capitèe di rivâ fin a la stazion di King’s Cross, ti prei di tirâ su il cjâf viers il sofit cuant che passin tra il binari nûf e il dîs. Indalt, tra une colone e chê altre al è un cartel che al indichèe il binari numar 9/3 (nuf e trequatrs): il stès dal cual Harry Potter, tal sô prin libri, al à cjapât il tren par lâ a fâ scuele di mâc». La lungje sfuriade leterarie di Guerrino a veve scaturît no pôc Odillo che cumò al veve une preocupazion vere: «Guerrino, no l’è che, cence dimâl, tu mi às menât a Cinecittà, no?». Guerrino al ere sclopât ta une ridade che a veve fat voltâ dute la int dal vagon de metropolitane. Ciertis robis a Londre si fasin cun plui discrezion. «Ma no ve ca, tachin dal Tower Bridge, il puint da lis tors» al veve dite Guerrino apene fûr da la metropolitane e fasint di moto a Odillo di lâi daur. «Viodistu chest puint, ancje se di lontan al samèe cussì antic, al è stâ tirât su a la fin dal Votcent: al è un dai simbui da l’architeture vitoriane, ven a stai chê svilupade a partî dal sburt che la Regjne Vitorie, la sovrane che a à regnât miôr e par plui agns il Regn Unît, a veve dât a chel che, chê volte, al ere un imperi che al cjapave sot di se dut il mont. Cumò no lu viargjn tantis voltis parcè che no fasin passà nafs tant grandis sul Thames. Un timp invesite al ere dut un viarç e siere: ancje cinc voltis in dì par fâ passâ sot dal Tower Bridge lis nafs plui grandis». Odillo al cjalave il panorame: di une bande la Londre moderne, il municipi fat a coni e dut in veri, lontane la grande rode panoramiche dal Millennium, la ciminiere scure e al stes timp sflandorose da la Tate Modern Gallery. Di cualchi bande lì daur al ere ancje The globe: praticamentri une bufule, ven a stai il teatri di Shakesperare ricostruit par i turiscj. E di chê altre bande nuje che mancul il côr da la antiche monarchie «Ce isal chel cjscjel là» al veve domandât a Guerrino. «Ma la Tor di Londre, off corse». «Chê ca tal mieç a è la Tôr Blancje, che a an tirade su dal 1097. Par cui se tu fasis i conts di agns a ‘nd à nevore» al diseve Guerrino a Odillo dut intent a cjalasi ator e soredut a cjalâ lis vuardis da la regjne cul lôr inconfondibile custum ros e lis dôs letaris di Sô Maestât Elisebete ricamadis sul pet. «Ciò Guerrino a son stramps però i inglês, eh! Viôt ca: di une bande tu viodis chestis vuardis vistudis come ta no sai ce epoche. Di chê altre tu viodis i soldâts cul cjapiel di pêl di ors tal cjâf, vistûts ancje lôr come lis vuardis di Praghe ma no cun la scolpe di epoche ma cul mitra. Tu ti voltis ancjemò e al è un di chêi cà vistût model 1.600 che ai dà di mangjâ ai corvats. No biel chi, eh! Turistic, sigûr. Ma biel. Un presepi praticamentri. E po’ i gjoiei da la regjne ce splendôr. Dut a puest, sigûr ma a mi i inglês mi parin mats». Guerrino, cun nobiliâr fâ britannic al veve rispuindût a Odillo: «Viodistu: i inglês no son stramps, a son superstiziôsus. Chei vistûts di ros cun lis letaris dal non da la regjne ricamadis sul pet a son i Beefeaters vistîts come ta l’epoche Tudor, ven a stai di cuant che a son stâts incaricâs di tignî cont i corvats da la tor. Si dîs, cun di fat, che se a scjampassin la plui grande sforturne a colares su la monarchie e l’Inghiltere». «Viodût cheste, ce nus vanziâl?» al veve domandât Odillo a Guerrino tant che a vignivin fûr dal gran porticât stîl templi grec dal British Museum. «Ma come scuse – ai veve rispuindût Guerrino – ti ai menât ta un dai lûcs plui significatîfs dal mont, dulâ che tu viodis une colezion impresionante di bilisis egizianis, grechis, romanis e di ogni bande dal mont, dulà che dome la Grande Cort a gjave il flât e tu tu mi domandis ce nus vanziâl di viodi?». Odillo, cun estri altretant inglês al veve rispuindût: «Deh, Guerrino. Jo o soi un omp pratic, migo un omp di letaris. A mi, par trop bielis che a sedin, lis mumis egizianis mi fasin un cic. Par che chê mi rivuarde jo o ai miôr viodi la Cjase dal Parlament che si spiele – si fâ par mût di dì – sul Thames, il sô stîl neogotic vitorian, il fat che al sedi un dai parlaments plui vecjos dal mont viodût che lu an mitût adunt tor il 1.200. Eh, eh, un biel pieç dopo che tal Patriarcât di Aquilèe il Parlament al funzionave za, ma di chest i furlans no si impensin mai, par cui sierade parentesi. A mi mi plâs cjalami il Big Ben, la tor da l’orloi che a à il mecanisim compain di chêl da la tor da la preiere di Sarajevo. Mi plâs il museu da la science, dulà che o vin pôdût viodi une da lis navicellis che son ateradis par di bon su la lune. Chest mi plâs: la vite, al int, il comercio. Lis mumis lis lassi a ti e a Vençon». E alore viodût che a Odillo ai plaseve tant la int, cuasi par sfide Guerrino lu veve partât tal davoi di Camden town, il marcjât che al cjape un intîr cuartîr di Londre e dulà che si piardisi ma si cjate dut chel che di plui a la mode si pues cjatâ. E dopo, no content, lu veve menât ancje ta la sflandorose residence dal ingai di lus: i labirintics magazzins Harrods dulà che Odillo si ere ancje fermât in adorazion di chê pacchianade dal momument a Dodi e Diana. E par stracalu, viodût che di timp a ‘nd’ere ancjemò al veve cirût di stracai lis cjavilis fasinti girâ dut il mercjât di Portobello. Cun dut chest, di Londre no vevin rivât a viodi che une piçule part. Guerrino però al ere strac madûr e Odillo, al incuintri, al veve ancjemò flât di vendi. E par la prime volte volte al veve cjapade in man la vuide di Guerrino e voltant lis pagjnis a câs al ere colât su un argoment di sô interès: la regjne, la monarchie, il rispiet par l’istituzion, il stat. E alore, cun fâ di comandin, al veve cjapât sot il bras Guerrino strissinanlu «Ohu! Al veve dite chel. Dulà mi menistu?» al veve dite chel. «Ma a la mude da la vuardie. No vino di rindi onôr a un dai stâts plui democratis e ben acentants dal mont? Off Corse».

Bundì Udin, mandi Friûl e buine zornade a dutis lis animis che cjaminin su cheste tiare puntade nobiel chê che si svissine cheste volte, parcè che i nestris doi operaris a son rivâts ta la patrie dal dirit, da la democrazie e da la nobiltât ancjemò in vigôr, ven a stai l’isule di Albione. «Ce statu disint? » a si domande Odillo tant che al ten in man il biliet dal tren che al val plui di trente sterlins e che lu sta partânt viars la capitâl amade e odiose, dal bon acet ma ancje sustignude, nobie e popolâr, classiche e punk. No astu ancjemò capît, Odillo, dulà che il tren che da l’aeropuart di Stansed a ti sta partânt? Ma a Londre, off corse, dulà che metropolitane si dîs The Tube, ta la monarchie parlamentâr plui viarte a tutelâ i dirits di ducj, ta la citât dulà che, plui che in cualsisedi lôc in Europe tu puedis iessi ce che tu sês, vistiti ce mût che tu vuelis e nissun ti dîs nuje. Ma al di là di dute cheste liberalitât il nestri Odillo, che o savin che al à il vizi di picjâ il nâs ta cualsisedi finistrin ai capiti a tîr e, difati ancje cheste volte al stave là, cul sô nâs a patatone a cjalâ la campagne inglese che si sveave, Odillo disevin al veve une domande da lis sôs: «No, va ben che il viaç in aeroplan nus è costât praticamentri nue. Eh! Che an fossin di viaç cussì: no ocorarès nancje fa ricarics su lis oparis. Però, trente sterlinis par fâ sessante chilometros no ti parial masse, eh Guerrino?» Dismontâts ta une da lis stazions di Londre Guerrino e Odillo si erin subite sintûts come piarduts. A cjase, parce Londre a dà il ben acet a ducj. Ma in ogni câs piardûts: jhoi trope inte che a ere atôr di lôr! Une voglade a la plante de metropolitane, ops, sorry, une voglade al Tube e cheste sensazion a si ere amplificade ancjemò di plui. No che capì nol sedi pussibil, anzi! Dome che la prime cucade ai veve fat capî che cà si, plui che in ogni altre bande, a erin ta une metropoli. Une vastitât di citât che sameave no finî plui. Odillo al tacave a sudâ dentri dal sô solit plumin fûr misure. Cheste volte al veve lassât a cjase il colbac, riservât a lis citâts dal clime fret e soredut magari apartignintis al ex bloc da l’Est, e al veve vût miôr mettisi sul cjâf une scufe dute colorade model rasta. «Guerrino – al veve dite Odillo cunt un fâ un tic preocupât – capisitu alc?». Guerrino nol veve nancje voltât il cjâf: «Mai une volte che tu sedis tu a cirî di saltâ fûr di chest gherdei, eh? No vioditu ca tropis lineis di metropolitane che son. E no vioditu trop che a è grande le citât. E alore cuietiti. Cuant che o varai capît, savarai dulâ e come partati». Odillo si ere sistemade la scufe colorade sul cjâf. Al veve dade une sistemade a la valis dai menevits eletrics e ai si ere sintât disore. Che Odillo un pucje di raseon la vês, o vin di dai at: Londre, cumò come cumò a è une metropoli multietniche di nivel global, dulà che culture, comunicaziôn, politiche, economie e art e an une prisince determinante. E pò Londre a è la plui grande plaze borsistiche mondiâl: adiriture pluui di New York. Cui sei 5 aeropuarts internazionâi a è diventade il plui grant pont di trafic aereo mondiâl. Insome: che si vueli o mancul, cui che al viaze prin o dopo par Londre al a di passâ. «Benedet – al veve dite Guerrino tant che al cjapave note dai cambios a dal color e numar da lis lineis di Tube che a vevin di cjapâ – ta cheste citât ai vivin in 7 milions e mieç di personis. E se tu contis ancje lis periferis a son in 14 milions. Sastu ce che al ûl dî: che la citât a cor fin al mâr. E ca tu cjatis dutis lis razzis e lis culturis: pense che a Londre a si fevelin almancul 300 lenghis». Afermazions che, come al solit no vevin propite impiade la passion di Odillo che al continuave a sta sintât su lis valis dai menevits eletrics, cjalansi un pôc ator e un pôc scusantsi cun un furlanissim “sory” a ducj chei, e a erin tancj, che ai finivin intôr. Parcè che di bon batecul di periferie a si ere mitût tal mieç da la corsie. E cussì, tra un poc e chel altri al pensave: «14 milions di lôr, che a fevelin 300 lenghis. Orpo. E cui i dâe di mangjâ a dute cheste int? La regjne?». «Ma tu sastu la robe strane?» al veve dite Guerrino cjalant tai voi Odillo che intânt al cirive di no cjalâ in muse nissun come che lu veve virtît di fâ il so soci «Sarès?». «Sares – al veve continuât Guerrino – che Londre no è la capitâl dal Regn Unît». A Odillo a si ere impiade una lampadine, ma di chês bulintis: «Eh, no eh! No sta tacami ancje cheste volte cu la storie che cheste no è la capitâl da l’Inghiltere: ind’ai za vude avonde di Barcelone e di Amsterdam». «Cuietiti – al veve dite Guerrino reclamânt a l’ordin il sô soci che, come che si fâs di solit tai paîs dal sud al veve tindût a sberlâ – tu sâs che i sudits da la Sô Maestât a son un tic particolârs. E alore tal Regn Unit a son da lis leç no scritis che a valin come e plui di chês scritis. Cussì, in base a la betince Londre a ven considerade la capitâl di cheste nazion, ma in nissun at uficiâl al è scrit che lu sedi». «Ah-ha» al veve dite Odillo prin di tornâ a sbassâ il cjâf par no cjalâ tai voi cualchidun dai passegers dal vagon di metropolitane. «Ben ce dificil che a è cheste robe – al pensave l’operari taponât drenti il sô grant plumin e platât sot da la sô scufe colorade – ancje se ti cjali in muse, migo o invât il tô spazi, no di dôi migo un pataf o, piês, dal mone. Insome: cà, se no si cognossisi, no si cjalisi in muse, se no par câs. Se no si passe par coiar, malegraçios. Eh! Ingles: nobii, no?». «Orpo – al veve dite Odillo capint ta un lamp che ancje cheste volte a rango di vistiari a si ere sbaliât dal dut – ma cà no l’è frêt. E no podevistu dimâl?». Guerrino al riduçave tant che, cu la cjartine in man al cirive di orientasi, apene fûr de jessude de metropolitane, par cirî la strade che jù partâs al albierc. «Cuant che ti ai dite come vistiti – infin ai veve rispuindût Guerrino – tu mi âs acusât, par un invier intîr, di veti fât cjapâ il mal di schene. E dutis lis scjalis mussis a son stadis mês par i mes che tu no tu podevis montâi disore par vie da lis vertebris, dal cuel, da la spale e vien indenant. Par cui di chê volte no ti dîs e no ti disarai plui come vistiti». Odillo al ere sconcertât: ma lui il mal di schene lu veve vût. E propite parcè che no si ere vistît avonde. E cumò, a Londre? Osssiggnor tant umit, e lui al ere vistît masse, cuissà le schene. «In ogni câs - al veve continuât Guerrino – ca il timp al gambie dal dit al fat. Par cui a diti come vistiti ai volarês un mâc. E in ogni câs tu âs di savê che a Londre al plûf tant di mancul che a Rome o a Sydney. Dute colpe da la television che nus fâ crodi ancje chêl che nol è. Cà di neveadis a s’in pensin pucjutis e simpri une sblancjade e via. E po’ cun dut il riscjaldament che al vâ a manete ta cjasis e uficis, la temperature in citât a è ancje di 5 grats disore di chê reâl». «Bon apart dut chêl che tu sâs sul clime londines – al veve dite Odillo cunt un pôc sustât - astu capît di ce bande che al è l’albierc. O varès bisugne di rivâi di buride». Guerrino al continuave a cjalasi ator cence capî tant di ce bande là. A ere la prime volte che la sô infabile usme a faseve cileche. «Guerrino, no pensitu che se magari, par une volte, o cjapin un taxi, magari o rivin prin di gnot e, sore dut, prin che di me no resti che une poce?». A Guerrino a si erin un pôc impiats i voi: «Ma si, parcè no - al veve dite – par une volte. E po cuant che o tornin indaûr no vino di contâ che o sin stâts su un vêr taxi londinês? Di chei che a funzionin ancjemò cun lis regulis par il traspuart e la sigureçe dal passegêr scritis dal 1679? Chei taxi che, a motor, a Londre a àn tacât a zirâ za dal 1897 cul Bersey eletric e che dal 1903 a corin a gasolio. I Black cabs cun l’inconfondibile scrite sul tet, che ti menin pardut cence mai piardisi e ta un lamp? I famôs FX4 che cumò a sono stâts rimplazats dai TX1 ma che no an mai piardût il lôr stîl?» «Guerrino! – al veve sberlât Odillo – clamè un taxi che se no o innei Londre!». Iuste par vê une idèe alore, a ni è vulude dute une puntade par viodi Guerrino e Odillo, a la fin, cjapâ un taxi par rivâ in albierc. Chest tant par capisi trop che a samèe grande Londre. Dopo, se si vûl al è clâr che la grandeze di un lôc a si misure cul metro da la anime di ognidun e no cunt il metro che al è depositât ta no s’impensisi plui cual museu di Parigi. Par cui Londre a è grande, come che o vin dite, ma no masse par piardisi. A è plui grande di Parigi a cjaminale a pît, ma plui piçule di Berlin che a è sparniçade fra cjasis e bosc. E alore a ni volarâ une altre puntade intere par rivâ a cjatasi sot di cualchi monument da la grande capitâl dal Regn Unit. Intânt, juste par dâ une anticipazion di chê che a sarâ la prossime puntade scoltin ce che ai conte Guerrino a Odillo tant che a viazin dilunc il Tamigi su un batel, a la maniere di une volte «A son secui che i londines a doprin il Thames come linee di navigazion. Za dal 1555 il guviar al veve fondât la compagnie di navigazion par meti sot control il trafic fluviâl, compagnie che a esit ancjemò vuê. E dal 1997 a an mitut adun un consorzi par rindi ancjemò plui moderne e veloce la navigazion fluviâl».

Bundì Udin, mandi Friûl e buine zornade a dutis lis animis che cjaminin su cheste tiare, puntade particolâr cheste dal Lunari che dopo tant torzeonâ par l’est da l’Europe al torne viers territoris plui leats al mâr, al mediteranei, al sud, al cjalt. Cuasi simpri cjalt: clâr che l’invier al è invier par dut ma a Barcelone l’invier al è mancul invier che a Tarvis o a Spietar. Ve ca alore la mete da la nestre cubie di amîs: Barcelone, capitâl da la Generalidad de Catalunia, une da lis disisiet comunitats autonomis che formin la republiche di Spagne. E propite su cheste division amminsitrative Guerrino e Odillo a erin daur a pitufasi. Ben chestis a son peraulis grossis: a cirivin di vê une opinion disin cussì. «Ma, insome – al diseve Odillo tant che al parave jù sidonadis di bacalà, un dai plats plui tradizionai da la cusine catalane – tu vuelis dimi che cheste a è una capitâl, ancje se la capital da la Spagne a reste Madrid». «Orpo si – al veve rispuindût Guerrino che in cuant a sidonadis di bacalà nol ere di mancul – cheste a è la capitâl da la Regjon Autonome da la Catalogne. Che no è la stesse robe che iessi la capitâl di un stât disin cussì, sovran. Ma tal zîr da lis nestris citât plui impuartantis d’Europe o crôt che, viudût che ca o vevin une fiere impuartante, la nestre aziende no podeve mancjâ. E po, nô furlâns cui catalans o vin leamps a pacs di no sai trop timp». Gnove che a veve lassât un pel sturnît il nestri Odillo. «Ah, si?» al veve dite prin di imboconasi. «Eh, si» al veve rispuindût Guerrino. «Al è par vie dal bacalà, sastu». Ben passudis i nestris amîs a erin lats fûr dal ristorant cun l’idèe di fasi une biele cjaminade digjestive. «Astu bielzà fat il percors Guerrino?» al veve domandât Odillo tormentansi lis zanzivis cun t’un stechedincj. «’Ta atent, mo. Jo o crôt che viudût dulà che o sin la robe miôr a sedi che di tacâ dal monument plui cugnussût di Barcelone: La glesie da la Sagrada Famillia». Odillo al veve continuât il so misteràt cjalansi atôr prin di rivâ a burî fûr: «Bon, a son testimoneance dal passât, a fasin part da la nestre culture: ma o vino simpri di là par glesiis, basilichis e catedrâls?». Guerrino lu veve cjalât interdet: «Ma ce disitu! Si viôt che no ti sâs trope impuartance che a cheste costruzion, chest progjet, chest sium che al stâ impegnânt Barcelone di nossai trops agns. No ti imagjneis trope passion che l’architet che al à progjetade ai a mitût par parmeti a chei che vignivin dopo di rivâ a finile. E po – al veve dite Guerrino cirint une conclusion al sô discors – no è vere che ti meni dome a viodi glesiis. A Praghe ti ai ancje menât a viodi un cimiteri». Odillo al veve la muse di un che in bocje, se al fôs bon di dile, al varès dome une peraule. Chê stesse che i todescj di une volte, in feris a Lignan, a disevin cjalant lis cascadis di fûcs e faliscjes che si distudevin tal mâr il cuindis di avost: wunderbar! Ma sicome che Odillo no l’ere todescj e la lenghe di Kant nancje la fevelave, al stave lì imbacuchît devant da la fassade da la Passion di chê che, un doman, a sarà la glesie plui grande dal mont: el Temple Expiatori de la Sagrada Familia di Barcelone. «Pense – al diseve cun vôs cardinalizie Guerrino – che di cuant che i vevin dat di finì chest lavor bielzà scuminçât di Francesc del Villar, Antoni Gaudì a i à lavorât disore par 40 agns dai cuai i ultins 15 da la sô vite in maniere continuative. Al pensave che cence di lui la Glesie no sarès mai rivade a vignî su». Odillo al ere dut un cun l’inzirli che i veve cjapât il cjâf. «A vuê – al continuave Guerrino – la glesie a è rivade al al 55% da l’opare e a pensin di finile tor il 2020. Viudût che a è stade scuminçade dal 1884 in teorie ai saran vulûts 136 agns par meti il pont. E dut par ce che Gaudì al à vulût che si tiràs su propite come che a fasevin ta la Ete di Mieç». Lis cuatri tors fatis come chês dai cjscjei dai frutins in splaze a Lignan a an disore da lis pontis a forme gjeometriche, cuviartis di ceramiche sflandorose e colorade. «Cuant che la glesie sarà finide – al diseve Guerrino a un Odillo simpri plui intorgolât dentri i sei pensîrs – di tors an sarân 18: 12 par i apostui, 4 par i evangjeliscj, une par la madone e une par Gjesù Crist. E cheste ultime a sarâ la plui grande di dutis e varâ in ponte une crôs gjgantesche». Di chest progjet apocalitic dal architet catalan cumò a si viôd dome un grant progjet: ta chest moment a stan tirânt su lis navadis centrâl da la glesie che a àn da lis colonis che samèin a dai arbui e un sofit che al samèe fat di grancj zirasoi. «Al è dome dopo che varàn finide cheste part che a tacaran – al veve dite cun fâ di concludi Guerrino – a meti mans a la grande cupole centrâl e a la costruzion da lis fassadis che mancîn». La nestre cubie di operaris cumò a ere restade cence peraulis cul nas par aiar a cjalâ cheste folie di un omp che a è deventade folie di une citât intere e che a proviôt ancjemò cui sa trops agns par rivâ insomp. Guerrino e Odillo si erin cjalâts tai voi: «Eh, bon» a vevin dite cuasi insieme. Secont il lôr pensîr il pin che al veve di dai la rame par il licôf al veve ancjemò di iessi plantât. «Ma Barcelone no è dome glesiis – al stave disint Guerrino a Odillo dopo che si erin lassade daur lis spalis la sacralitât incjantade e fulminade da la Sagrada – no! Barcelone a è ancje sinagoghis e, in particolâr, la Sinagoghe Mayor, la grande sinagoghe come che o disaressîn nô». Odillo si sintive un pôc tormentât di cheste vene mistiche dal sô soci, ma viudût che il bacalà al feve fature a lassai il stomi in pâs a si ere rassegnât a lai daur. «Vele ca – al veve dite Guerrino – pense che cheste sinagoghe sefardite a à vude une storie dute particolâr: a Barcelone dal 1.200 a ere une comunitât di ebreos nevore numerose e cheste a ere la lôr sinagoghe plui impuartante. Dopo che Isabele di Castiglie e il sô omp Ferdinando di Aragone a vevin parât vie i ebreos da la Spagne, par cui ancje da la Catalogne, cheste sinagoghe a no ere stade plui doprade par secui come tale, cussì nissun nol saveve nancje plui dulà che a fos. Dome di cualchi an a cheste bande, fasint ricjerchis urbanistichis a le an tornade a cjatâ e fate tornâ al sô splendôr: pense che ta dut chest timp a è stade un magazin di material eletric, un bar e cuissà nuje ce altre robe». Insome un destin dal dut particolâr par il puest plui impuartant da la comunitât che, in chei timps a Barcelone, a rapresentave il 15% di dute la int che ai viveve. Ma la bieleçe di Barcelone, ancje se no si pues lassà pierdi chê dai sô museus e dai sei palaçs, a si cjate soredut ta…Barcelone stesse. A è la citât a iessi un gerdei di gnûf e vecjo, di modernitât e di antigae che a fas inamorâ cui che la cognôs. «E po – al veve dite Odillo – Barcelone no ise famose par la vite noturne?». Guerrino si spietave cheste domande dal sô amî: «Sigûr soci – al veve rispuindût – al è par chest che viudût che si stâ fasint scûr ti stoi menânt su les Rambles, i viai principâi da la citât, lì che si vîf dute la gnot fevelânt, cugnussint, bevint e mangjant tal mieç di tante, tante biele int». A Odillo a i ere bielzà plasude cheste citât che a diseve di sé di iessi la citât cun plui terazis par metro cuadri dal mont. Cussì come che ai ere plasût cjalale d’in d’alt dal Tibidabo, la culine da la cual si viôt dute Barcelone e su la cual al è un parc di divertiments che al à plui di cent agns. Cjalânt in bas dai sei 512 metros, nissun al sarès bon di neâ che la culine di Tibidabo a sedi la teraze plui biele di dute Barcelone. Ma par teraze i catalans a intindin ancje i taulins al viart che i bars, i ristorânts e lis ostaris a an simpri ta cheste citât che a dîs di vê un altri primât: chêl di iessi la citât al mont lì che a son plui puesç dedicats, apont, al bevi e al mangjâ. E ce fasino doi furlâns a Barcelone di domenie di sere? Come ta lis miôr tradiziôns da la furlanie, no fasin altri che piciasi a un bon bocâl di bire, misturasi tal mieç di un dai plui popolats locai da les Rambles, e fissasi al pari di un tassel par il ciment armât devant dal televisôr a cjalasi il derby plui impuartant da la stagjon, tal mieç di tancj fradis catalans: Barça-Real, une partide par la vite. E Guerrino e Odillo, passudis par vê zirade in lunc e in larc chê citât di mar cussì biele e cjalde, sturnits dai sei monuments a dai sei panoramas, a vevin decidût di concedisi cheste sbregadure da la regule par finî in glorie il lôr dì di ripos prin di une setemane intense di menevits eletrics e di martieladis tai dets. «Guerrino – al veve sberlât Odillo cirint di fasi sintî tal mieç di un infiâr di trombetis e uicadis dai tifos dal Barça - ma par tornâ in albierc ise la metropolitane?». «Benedet - al veve dite chel, tant che al rideve a la cameriere che ai veve puartât dos mantis di bire frescje e disgotante – chest al è un paîs civil: la metropolitane a è dal 1920 che a zire sot Barcelone. Ancje se no tu sês propite vistît come il plui avanguardistic dai frecuentadôrs da les Ramblas, o crôt che un biliet a ti lu dedin. Dome se al vinç il Barça però».

Bundì Udin, mandi Friûl e buine zornade a dutis lis animis che cjaminin su cheste tiare, puntade di contradiziôns cheste che i nestris doi operaris Guerrino e Odillo a stan par contanus: parcè che son rivâts, par fâ lis lôr oparis, ta une da lis citâts plui contraditoris dal continent european: Amsterdam! Citât da la cual dut si dîs e dut si conte, citât dal pelegrinagjo tossic di tante int che ancje di cà a rive ta al capitâl dai Pais Bas par sfogâ cualchi pulsion trasgressive. Ma Amsterdam a è ancje citât moderne, contemporanee, pur iessint un gjoiel architetonic che al mantên ancjemò vîfs i panoramas di cualchi secul indaûr. Ma buttînsi a pes ta cheste gnove aventure scoltânt ce che Odillo al steve domandânt a Guerrino su une cuestion che propite no i lave jù: «No, parce no – ai diseve Odillo al sô soci che al ere dut intent a la vuide da la sô familiar svedese rosse – o ai capît che il guvier al stâ di une altre bande. Ma tu vuelis dimi che, dut câs, cheste citât a è la capitâl dai Pais Bas. No fasino confusiôns i gnaolandês cun chest gherdei?». Cence molâ i voi da la strade Guerrino ai veve rispuindût: «Ma, cjale, a l’è dut un metisi: Amsterdam a la àn fondade dal 1.200 fasint cressi tant un pais di pescjadôrs che, di pont in blanc, a tacarin a mateâ cul cumierç. E bielzà dal 1275 Amestelledamme, come che a si clamave che volte, a veve otignût esenziôns dai Siôrs dal Aemstel. Par cui al è di un toc che chêi ca a an vût mût di cjalâ la vite cun voi difarents». «Chê dai spagnoi propite no ti la crôt» al veve declarât Odillo dopo vê gjavât dome par un moment il sô biel nâs a patatone dal finistrin da la machine. «Ma a è cussì, stele – ai veve rispuindût Guerrino – i Pais Bas a fuerin une colonie spagnole fin al 1.500 cuant che, cun la vuere d’indipendence a rivarin a liberasi: bielzà chê volte a proclamarin la libertât di religjon. Al è ancje par chest che tancj ebreo scjampâs da la spagne cuant che Isabele di Castiglie ai veve dat il sac, a vignirin a stâ cà ». Difati, zontin nô, tant che in Europe si copavin di ogni bande in vueris insanganadis, i Pais Bas a fuerin il ripâr par tante int che, ator par il continent, a ere perseguitade. «Al è ancje par chest – al continuave Guerrino – che il Diecisetim secul al fô il Timp d’Aur par Amsterdam: lis nâfs olandesis a partivin par il nord da l’Americhe, lis Indis, il Brasil e l’Afriche, la culture a sflurive, la citât a tacà a slargjasi ator dai canâi e chest al deventâ il puart plui impuartânt dal mont, centri di finanze internazionâl». Une stagjon d’aur, Guerrino al contave al sô amî e soci, che però a finì subit: par i doi secui dopo la citât a si ere fermade di cressi, fin rivade da la Rivoluzion industriâl che, in ogni câs, no rivarâ a dai il stes splendor dai agns prin. «Cuant che o eri piçul mi ere restade cheste peraule tal cjâf: Zuider Zee» al veve dite Guerrino spiegânt a Odillo come che i Olandes, tra la prime e la seconde vuere mondial a costruirin lis dighis par separâ il lago IJSEEL dal Mar dal nord, cussì lis aghis a est di Amsterdam a deventarin dolçis e vignirin a iessi dopradis da la int di chê citât. «Chest però al à causât ancje un probleme no di pôc al guviâr olandes: ta cheste nazion al è il plui grant numar di suicidis in Europe e sastu parcè? Parcè che no l’è facil vivi savint di vê, dì e gnot, il mâr a cualchi metro disore il cjâf». Odillo al veve dispiçiât il nas dal finestrin: «Isal par chest che cà a fumin dì e gnot come ciminieris. E no stin fevelant dal fun di peç tant bon par fumâ il speck di Sauris». Chest risvolt di moralitât dal sô soci al veve splazzât Guerrino: «Al è dai agns Sessante dal Nûfcent che Amsterdam a è cugnussude par vê une politiche di tolerance viers lis droghis lizeris. E par chest, di chê volte la capitâl dai Pais Bas a è deventade il lûc plui amât dai hippie di ogni gjenerazion. Chest moviment dopo si è leât a chel dai squatters, chei che ocupin lis cjasis lassadis vueitis rivânt ancje a moments di tension: pense che cuant che a àn incoronade la Regjne Beatrice fûr da la glesie erin no sai cetanç a sberlâ: nuie cjase nuje corone». «Bon ma no sarano migo dome hippie e squatters a Amsterdam no?» al veve dite Odillo cunt un pocje di preocupazion. «Ma no, ma no – lu steve sigurânt Guerrino -: la capitâl dai Pais Bas a è ancje il centro da la vite cultural da la nazion: cà teatri, danze, musiche e arts a àn simpri une grande visibilitât». Par esempli a Amsterdam si pues scoltâ la musiche tal Concertbouw dulà che a sune simpri la Royal Concertbouw Orchestra. Se no si pues lâ a scoltâ l’opare e o viodi il balet tal Muziktheater o tal De Nederlandse Opera o tal Carrè: ducj teatris che a fasin biele mostre di sé devant dal Amstel, un dai fluns che corin tal mieç da lis cjasis di Amsterdam. «Atenzion che Amsterdam – al continuave Guerrino - al dâ ancje tant spazi a l’art: un esempli al è il STEDELIJK MUSEUM che al è dedicât, propite a l’art contemporanee. Dopo tu puedis piarditi tal museu di storie, ta chel dal popul ebraic, tal museu da la marine o ta chel di Madame Tussaud, chel dulà che tu cjatis lis statuis di cere. E, par il tô orgoi operari, cà tu puedis ancje cjatâ l’Istitût Internazional di Storie Social, une da lis plui grandis istituzions di ricjerce su la storie dal moviment operari». Odillo al veve voltade la muse cun lentezze: «Ce ti fasial pensâ che mi interesi?». «Secont me a ti, ti interesse cheste cuestion chi» al veve dite Guerrino svintulant sot il nason ruan un sfuei là che erin elencats duç i puescj dulà che si podeve mancjâ e bevi a Amsterdam: «Viodistu – al diseve Guerrino – dongje da la stazion dai trenos si cjate il Zeedijk che al è plen di ristorants orientai dulà che tu cjatis kebab e shwarma in cuantitât. Tal Nieumarkt i cinês a la fasin di parons i cines, ancje se tu cjatis portoghes e messicans. A Leidsplein tu cjatis talians, argjentis e grecs». A Odillo ai tacave a bruntulâi il stomi. Però al veve une une cuestion di clarî: «O ai capît che cui che al vîf in Olande, lui stès o i sei parinç, a podin iessi rivâts di ogni bande dal mont. Ma un cualchi olandes, natîf di cà, cui cjavei bionts e i voi celescj, cun lis dalminis tai pîs ancje cuant che al è invier, e cun simpri une sgrampassade di tulipans sot il braç ancje cuant che al vâ in biciclete. Eco, chest ca, chest olandes che mitin che si clami Hubert, ce ‘l mangjâl. Dome kebab?». Guerrino al veve la rispueste pronte in cane: «Il plat tradizionâl da l’Olande a è la renghe crude, che si mangje cun cevole e giardiniere». A Odillo a si erin svaporâts ta un colp ducj i sugos gastris: «Va ben – al veve dite un pôc sustât – va ben. Par cheste sere kebab. Doman cines. E passan un panin. Oh! Ce biele setemane». «Ma no, ma no, no stâ inmusuniti – al preave Guerrino – no sin migo dome ta une citât di hippie, ocupadôrs di cjasis e venditôrs di kebab. Ti ai pur dite da la culture. La vite da la gnot in cheste citât a è simpri plene e ative e po, se dal 2004 la aministrazion di Amsterdam a si è dade un sproc impuartânt: I Amsterdam: a ûl dì che cui che al rive ca al si sint part da la vite da la citât». Guerrino al declarave chest partansi sot braç Odillo viers il centri storic da la citât, che al è circondât di cuatri granç canai sui cuai a dan mostre di sé i plui biei palaç di Amsterdam. Come il Singel, su lis aghis dal cual a si splielin cjasis dal 1.600, e dilunc il cual si puedin ancjemò viodi lis bovis che si sierin a man. O se no il Keizergracht che al à cjapât il non di Massimilian, e che vuei al è plen di apartaments un plui biel di chel altri. No si puedin dismenteâ lis cjasis galegjantis, tant di mode tai agns ’50 e che ancje vuei si puedi viodi se si fasisi partâ sul Prinzergracht. Su lis rivis dai canai si cjatin cafès e ristorants che a fasin part dal paesaç di Amsterdam: i BRUINE a son cafès cun lis parets scuridis dai agns e dal fun. Ta chescj cafès al ven naturâl sintasi a lei il gjornâl, fa cuatris peraulis cu la int di cà che a è simpri cordiâl e educade. «Ca o sin tal Dam – al diseve Guerrino a Odillo – il centri da la citât dulà che, come che tu viodis al è l’obelisco cun la statue di Raedecker, ven a stai il monument a la liberazion. Pôc lontan di ca al è il palaç real che al è stât tirât su dal 1.600 e la bielissime Nieuwe Kerk, la basiliche gotiche plui cugnussude dal centri di Amsterdam». «E cheste – al veve domandât Odillo – dulà menie?» «Cheste a è la Damrak la vie centrâl da la citât che a puarte ta la stazion centrâl e che a è plene di ristorants, bars e lûcs di incuintri. Ma se tu as miôr la pâs alore molin cà la Kalverstraat e lin dentri tal curtîl dal Beghijnhof, lì che lis Beghinis tal 1346 a fondarin la lôr comunitât. Ma se tu as chê di viodi confusion e int podin rivâ fin al Leidsplein dulà che al è plen di musicisj e artiscj di strade e che di gnot a radune dute la int che a frecuente lis plui cugnussudis discotechis da la citât». Odillo a si ere incuriost par une robe in particolâr ma prin che al rivâs a dile Guerrino ai veve taponade la bocje cunt une altre informazion: «E se no ti puedis fâ di mancul ti meni tal Red Light District o Rossebuurt, dulà che si concentre dute la prostituzion, che in Olande a è legal, da la citât». Gnove che no veve incuriosît plui che tant Odillo, che invesite ai brusave su la lenghe cheste cuestion: «Ma a Amsterdam nissun al ae lis tendis tai barcons?».