Bundì Udin, mandi Friûl e buine zornade a dutis lis animis che cjaminin su cheste tiare, puntade particolâr cheste dal Lunari che dopo tant torzeonâ par l’est da l’Europe al torne viers territoris plui leats al mâr, al mediteranei, al sud, al cjalt. Cuasi simpri cjalt: clâr che l’invier al è invier par dut ma a Barcelone l’invier al è mancul invier che a Tarvis o a Spietar. Ve ca alore la mete da la nestre cubie di amîs: Barcelone, capitâl da la Generalidad de Catalunia, une da lis disisiet comunitats autonomis che formin la republiche di Spagne. E propite su cheste division amminsitrative Guerrino e Odillo a erin daur a pitufasi. Ben chestis a son peraulis grossis: a cirivin di vê une opinion disin cussì. «Ma, insome – al diseve Odillo tant che al parave jù sidonadis di bacalà, un dai plats plui tradizionai da la cusine catalane – tu vuelis dimi che cheste a è una capitâl, ancje se la capital da la Spagne a reste Madrid». «Orpo si – al veve rispuindût Guerrino che in cuant a sidonadis di bacalà nol ere di mancul – cheste a è la capitâl da la Regjon Autonome da la Catalogne. Che no è la stesse robe che iessi la capitâl di un stât disin cussì, sovran. Ma tal zîr da lis nestris citât plui impuartantis d’Europe o crôt che, viudût che ca o vevin une fiere impuartante, la nestre aziende no podeve mancjâ. E po, nô furlâns cui catalans o vin leamps a pacs di no sai trop timp». Gnove che a veve lassât un pel sturnît il nestri Odillo. «Ah, si?» al veve dite prin di imboconasi. «Eh, si» al veve rispuindût Guerrino. «Al è par vie dal bacalà, sastu». Ben passudis i nestris amîs a erin lats fûr dal ristorant cun l’idèe di fasi une biele cjaminade digjestive. «Astu bielzà fat il percors Guerrino?» al veve domandât Odillo tormentansi lis zanzivis cun t’un stechedincj. «’Ta atent, mo. Jo o crôt che viudût dulà che o sin la robe miôr a sedi che di tacâ dal monument plui cugnussût di Barcelone: La glesie da la Sagrada Famillia». Odillo al veve continuât il so misteràt cjalansi atôr prin di rivâ a burî fûr: «Bon, a son testimoneance dal passât, a fasin part da la nestre culture: ma o vino simpri di là par glesiis, basilichis e catedrâls?». Guerrino lu veve cjalât interdet: «Ma ce disitu! Si viôt che no ti sâs trope impuartance che a cheste costruzion, chest progjet, chest sium che al stâ impegnânt Barcelone di nossai trops agns. No ti imagjneis trope passion che l’architet che al à progjetade ai a mitût par parmeti a chei che vignivin dopo di rivâ a finile. E po – al veve dite Guerrino cirint une conclusion al sô discors – no è vere che ti meni dome a viodi glesiis. A Praghe ti ai ancje menât a viodi un cimiteri». Odillo al veve la muse di un che in bocje, se al fôs bon di dile, al varès dome une peraule. Chê stesse che i todescj di une volte, in feris a Lignan, a disevin cjalant lis cascadis di fûcs e faliscjes che si distudevin tal mâr il cuindis di avost: wunderbar! Ma sicome che Odillo no l’ere todescj e la lenghe di Kant nancje la fevelave, al stave lì imbacuchît devant da la fassade da la Passion di chê che, un doman, a sarà la glesie plui grande dal mont: el Temple Expiatori de la Sagrada Familia di Barcelone. «Pense – al diseve cun vôs cardinalizie Guerrino – che di cuant che i vevin dat di finì chest lavor bielzà scuminçât di Francesc del Villar, Antoni Gaudì a i à lavorât disore par 40 agns dai cuai i ultins 15 da la sô vite in maniere continuative. Al pensave che cence di lui la Glesie no sarès mai rivade a vignî su». Odillo al ere dut un cun l’inzirli che i veve cjapât il cjâf. «A vuê – al continuave Guerrino – la glesie a è rivade al al 55% da l’opare e a pensin di finile tor il 2020. Viudût che a è stade scuminçade dal 1884 in teorie ai saran vulûts 136 agns par meti il pont. E dut par ce che Gaudì al à vulût che si tiràs su propite come che a fasevin ta la Ete di Mieç». Lis cuatri tors fatis come chês dai cjscjei dai frutins in splaze a Lignan a an disore da lis pontis a forme gjeometriche, cuviartis di ceramiche sflandorose e colorade. «Cuant che la glesie sarà finide – al diseve Guerrino a un Odillo simpri plui intorgolât dentri i sei pensîrs – di tors an sarân 18: 12 par i apostui, 4 par i evangjeliscj, une par la madone e une par Gjesù Crist. E cheste ultime a sarâ la plui grande di dutis e varâ in ponte une crôs gjgantesche». Di chest progjet apocalitic dal architet catalan cumò a si viôd dome un grant progjet: ta chest moment a stan tirânt su lis navadis centrâl da la glesie che a àn da lis colonis che samèin a dai arbui e un sofit che al samèe fat di grancj zirasoi. «Al è dome dopo che varàn finide cheste part che a tacaran – al veve dite cun fâ di concludi Guerrino – a meti mans a la grande cupole centrâl e a la costruzion da lis fassadis che mancîn». La nestre cubie di operaris cumò a ere restade cence peraulis cul nas par aiar a cjalâ cheste folie di un omp che a è deventade folie di une citât intere e che a proviôt ancjemò cui sa trops agns par rivâ insomp. Guerrino e Odillo si erin cjalâts tai voi: «Eh, bon» a vevin dite cuasi insieme. Secont il lôr pensîr il pin che al veve di dai la rame par il licôf al veve ancjemò di iessi plantât. «Ma Barcelone no è dome glesiis – al stave disint Guerrino a Odillo dopo che si erin lassade daur lis spalis la sacralitât incjantade e fulminade da la Sagrada – no! Barcelone a è ancje sinagoghis e, in particolâr, la Sinagoghe Mayor, la grande sinagoghe come che o disaressîn nô». Odillo si sintive un pôc tormentât di cheste vene mistiche dal sô soci, ma viudût che il bacalà al feve fature a lassai il stomi in pâs a si ere rassegnât a lai daur. «Vele ca – al veve dite Guerrino – pense che cheste sinagoghe sefardite a à vude une storie dute particolâr: a Barcelone dal 1.200 a ere une comunitât di ebreos nevore numerose e cheste a ere la lôr sinagoghe plui impuartante. Dopo che Isabele di Castiglie e il sô omp Ferdinando di Aragone a vevin parât vie i ebreos da la Spagne, par cui ancje da la Catalogne, cheste sinagoghe a no ere stade plui doprade par secui come tale, cussì nissun nol saveve nancje plui dulà che a fos. Dome di cualchi an a cheste bande, fasint ricjerchis urbanistichis a le an tornade a cjatâ e fate tornâ al sô splendôr: pense che ta dut chest timp a è stade un magazin di material eletric, un bar e cuissà nuje ce altre robe». Insome un destin dal dut particolâr par il puest plui impuartant da la comunitât che, in chei timps a Barcelone, a rapresentave il 15% di dute la int che ai viveve. Ma la bieleçe di Barcelone, ancje se no si pues lassà pierdi chê dai sô museus e dai sei palaçs, a si cjate soredut ta…Barcelone stesse. A è la citât a iessi un gerdei di gnûf e vecjo, di modernitât e di antigae che a fas inamorâ cui che la cognôs. «E po – al veve dite Odillo – Barcelone no ise famose par la vite noturne?». Guerrino si spietave cheste domande dal sô amî: «Sigûr soci – al veve rispuindût – al è par chest che viudût che si stâ fasint scûr ti stoi menânt su les Rambles, i viai principâi da la citât, lì che si vîf dute la gnot fevelânt, cugnussint, bevint e mangjant tal mieç di tante, tante biele int». A Odillo a i ere bielzà plasude cheste citât che a diseve di sé di iessi la citât cun plui terazis par metro cuadri dal mont. Cussì come che ai ere plasût cjalale d’in d’alt dal Tibidabo, la culine da la cual si viôt dute Barcelone e su la cual al è un parc di divertiments che al à plui di cent agns. Cjalânt in bas dai sei 512 metros, nissun al sarès bon di neâ che la culine di Tibidabo a sedi la teraze plui biele di dute Barcelone. Ma par teraze i catalans a intindin ancje i taulins al viart che i bars, i ristorânts e lis ostaris a an simpri ta cheste citât che a dîs di vê un altri primât: chêl di iessi la citât al mont lì che a son plui puesç dedicats, apont, al bevi e al mangjâ. E ce fasino doi furlâns a Barcelone di domenie di sere? Come ta lis miôr tradiziôns da la furlanie, no fasin altri che piciasi a un bon bocâl di bire, misturasi tal mieç di un dai plui popolats locai da les Rambles, e fissasi al pari di un tassel par il ciment armât devant dal televisôr a cjalasi il derby plui impuartant da la stagjon, tal mieç di tancj fradis catalans: Barça-Real, une partide par la vite. E Guerrino e Odillo, passudis par vê zirade in lunc e in larc chê citât di mar cussì biele e cjalde, sturnits dai sei monuments a dai sei panoramas, a vevin decidût di concedisi cheste sbregadure da la regule par finî in glorie il lôr dì di ripos prin di une setemane intense di menevits eletrics e di martieladis tai dets. «Guerrino – al veve sberlât Odillo cirint di fasi sintî tal mieç di un infiâr di trombetis e uicadis dai tifos dal Barça - ma par tornâ in albierc ise la metropolitane?». «Benedet - al veve dite chel, tant che al rideve a la cameriere che ai veve puartât dos mantis di bire frescje e disgotante – chest al è un paîs civil: la metropolitane a è dal 1920 che a zire sot Barcelone. Ancje se no tu sês propite vistît come il plui avanguardistic dai frecuentadôrs da les Ramblas, o crôt che un biliet a ti lu dedin. Dome se al vinç il Barça però».