Bundì Udin, mandi Friûl e buine zornade a dutis lis animis che cjaminin su cheste tiare. Ultime puntade par il Lunari Metropolitan che cheste volte nus contarâ il viaç tal profont Nord da la nestre ormai solidissime cubie di amîs rivats, nuje che mancul, a lis puartis da la antighe capitâl dal imperi Rus par saludani. Mantignint la lor frescjece, clarametri. Ancje parcè che il lôc lu proviôt, a dispiet dai dubits di Odillo: «Guerrino tu tu às un bon ce fâ a dimi che a San Pieriburc nol fâs cussì frêt. Ma astu mai vuidût il dottor Zivago? Astu prisint trope nêf che a ere ta chel film? Jo mi soi partât dople razion di mudantis lungjs e il mê solit, inconfondibil e sincer plumin. Ros, claramentri. Sin in Russie». Guerrino al continuave a bati la sô: «Prin di dut, Russie o no Russie, cà jù il ros nol fâs plui il stes efiet di cualchi timp fa. E po, scolte: la vuide mi dîs che lis temperaduris medis a San Pieriburc a genâr, che al è il mes plui frêt, a son di macul 8 e dome raramentri a rivin a mancul 15. Par cui nô cumò o sin a puest. No sin a Vladivostock dulà che a rivin dispes a mancul 50. Sin in Europe ca. E ce Europe: San Pieriburc a mantignût la mior espression dal ‘700: pense che dut il centri storic al è sot la tutele da l’Unesco come patrimoni che al aparten a l’umanitât». «Ben, benon» al diseve Odillo «O sin dacuardi che come al solit tu mi partarâs a viodi cuissà ce momuments, adiriture cà o sin rivâts a une citât che a è, dute interie, un monument. Ma a ti, ti parie che mancul 15 nol sedi un fret bec, rût, di chei che ti segnin la muse?». Guerrino al veve cjalât perpless il sô amî, rivant cuasi a fâi crodi di no vê rispuestis. E al incuintri une rispueste la veve: «Viodistu il probleme no l’è trop frêt che al fasi. Trop che o sin sot zero o sin sot zero. Il probleme vêr al è che cà il soreli si lu viôt par pucis oris in dì». Odillo par che pôc che si podeve viodi al ere sblancjât: «Come si lu viôt par pucis oris? Ce vustu dimi che o sin come al polo nord che d’unvier a è simpri gnot e d’estât al è simpri dì?». Guerrino al riduçave sot da lis mostacjs che nol veve: «Eh si. No propite come al polo nord ma insome. Il fat al è che insome praticamentri o sin cà in plen inviêr e come che ti disevi la gnot a sarà lungje. D’estât, par chel che si pues dî estât un periodo lì che il termometro al massim al rive a 20°, il soreli nol va mai jù e la int di San Pieriburc a stà su dute la gnot a viodi films, spetacui, balets, concerts, a bevi e mangjâ». A Odillo a i erin colats i braçs. «Scolte Guerrino, sino in estât cumò?». «No» ai veve rispuindt che altri. «Alore dome gnot». «Eh, già» ai veve dite Guerrino, zontânt subite: «Ma il piês al è che cà al tire simpri un vintat pies da la bore. Astu la barete? Nooo? E alore simpri taponât in albierc devant dal televisor a viodi films svedes doplâs in rus». «Tu as di ritegniti fortunât – ai diseve Guerrino a Odillo – no tu sâs ce maravèe che al è il cîl di gnot ca vie». Odillo cul morâl sot dai tacs nol veve chê di rispuindi. Al ere mogjo nancje che lu vessin condannat ai lavôrs fuarçats a vite. «Se tu strissinis ancjemò i pits in cheste maniere tu mi sameis propite il condanât che Dostoevskij al descrîf ta Delit e cjastic». Ma il sô soci nol ere in grat di rispuindi a chestis peraulis. Inmusunît al cjalave bas, pensânt a ce dal diaul che lu veve partât a pessecà i claps di cheste citât di mar, vulude di un zar di Russie che, stant a chel che ai veve contât Guerrino, come mimino al ere mat come un cjaval, e che al veve vulût tirâ su dal nuie la gnove capital dal sô imperi suiant paluts, scavant canai e fossai, doprant come se fos cjar di macel al di plui di 30.000 personis che a erin muartis par dai concretece al sun di un mat. «San Pieriburc, la Vignesie dal Nord, a è fondade su plui di 110 isulis tacadis une cun che altre di plui di 700 puints. Ti rinditu cont, Odillo, di ce lavôr mostro che a an fat chei ca par tirâ su dal nuje, di une palût savoltante une da lis plui bielis citâts d’Europe. Pense trop che al gjoldeve il zar a viodi la maravèe stampade su la muse dai ambasciatôrs stranîrs cuant che a vignivin a cjatalu ta cheste bilisie di piere che a ere la sô capitâl. E pense che lui migo al ere architet, o gjeometra o costrutôr: fin di piçul al veve vut a cûr dome il mar. Al passave lis zornadis a fâ su modelins di nafs». Odillo però cumò al ere cence peraulis par altris motifs: fevelant dal plui e dal mancul Guerrino lu veve menât sot la colone di Lissandri tal mieç da la Plaçe dal Palaç, la maestose place devant dal palac dai Zar che al è fat nuje che mancul di 4 immens palaç un tacât di chel altri. «Orpo» al veve savût a dî Odillo. Dome chel: «Orpo». E po al veve tacât a zirâ sui tacs a 360 grats cjalant ator di sé cheste maestositât. «O savevi che tu varessis finît di lamentati devant di chest spetacul: chest al è il Palaç d’Invîer, di dulà che par 200 agns il grant imperi rus al fô governat. Une plaçe lungje mieç chilometro che a è une da lis plui grandis di Europe, se no la plui grande. Ator ator palaç colorâts e monuments che a recuardin la vitorie dai rus du Napoleon. Cà o sin tal cûr da l’Europe, tal cûr dal pensêr illuministic, da la ete da la reson che a à fat la difarence fra la nestre Europe e il rest dal mont». Odillo al cjalave Guerrino che al ere tal plen di un deliri mistic-illuministic «Scolte soci – al veve infin rivât a dì impirantsi tal mieç di chel sglavin di flât inglassat e fonemas dal caposocietât – A mi mi va ben dut. Sai che chest palac ca, grandonon lu ai viudut ancje ta un film che tu mi as fat viodi a cjase tô la gnot da l’ultin da l’an. Biel, eh! Blanc e neri. Plen di int che rive ca par copâ il zar. Ma cumò: viudût che no stin sudânt a Atene e nancje sborfant di cjalt a Tunisi: mi menistu drenti che il vint al tae come une britule?». Odillo e Guerrino, viodût i lor timps strets no podevin di sigur rivâ a viodi dut il mueseu che al cjate bon acet drenti ta lis plui di mil stanzis dal Palaç d’Inviêr. Stant a chêl che a diseve la vuide di Guerrino par rivâ a cjaminâ ducj i 24 chilometros di curidors da l’Ermitage, cussì a si clame chest mostro di museu, ai vûl une setemane intere. E stant al fat che la nestre cubie di amîs a è fate di furlans, si pues capî imediatamentri che ta chê setemane lor a varessin montât e dimontât cuissà tropis fieris. Cussì, dade une voglade all’ingres da l’Ermitage e lis fantasîs barochis dal Palaç d’Inviêr a vevin vût mior cjaminâ dilunc lis stradis di cheste citât plene da lis çatadis dai miôr architets talians da l’epoche. Une citât che, però a manten ancje dai primâts mancul edificants: se, come che o vin dite, al timp di Pieri il Grant che a l’à tirade su, a àn fat murî 30.000 sclafs par plantâ fondis e tirâ su murs, vuê San Pieriburc a conte alc come 16.000 fruts sbandonats che a vivin par lis stradis. E il 15% da la int residente a vîf ancjemò ta apartaments Kummunalka, come che a vegnnin clamats, dulà che bagn, cusine e cabinet a son doprats di plui fameis. Cun dolor di cûr lassin in bande chestis cifris dolorosis par sintî ce che si stavin disint Guerrino e Odillo tant che a cjaminavin cun fâ nobiliâr su la altretant nobile Prospettive Nevskij. «Ma si, tu às reson a dî che Pieri il Grant, il zar che al à vulude San Pieriburc al ere un pôc mat – ai contave Guerrino a Odillo – pense che lui stes al à vulût che la gnove capitâl dal sô imperi a vignis fate ca. Lui al è vignût a vivi tal mieç da lis paluts che une volte a la fevin di paronis su chestis tiaris ta une barache di 60 metros cuadris che ancjemò si pues viodi drenti da la fortece di San Pieri e Pauli». Come che o savin Odillo al ere interessât a la storie fin a un ciert pont. Il rest par lui lu fevin il mangjâ, il bevi e il torzeonâ. In ogni câs al veve domandât «Ta une barache? Chest ca al ere sclopât dal dut». Ma Guerrino no veve voe di replicâ: «Oh! – al veve dite – su chescj 4 chilometros di Prospettive Nevskji a son i plui elegants palaç di San Pieriburc, dulà che cumò a vîf la gnove borghesie russe. Ma pense che une volte, e no tant fa lis pieris dulà che tu cjaminis tu cumò a son stadis pestadis di Gogol, Cjaikosvkij, Turgenev, Nijinskij, Rimskij-Korsakov, Dostoevskij. I granc inteletuai e artiscj dal Votcent rus e european». Odillo si ere fermât juste su l’entrade da la catedrâl di Kazan: «Tu vuelis dimi che dal MileVotcent in cà il comun di cheste citât no l’à mai tornât a fâ i marcepits? Ah benon po!». E al incuintri i marcepîts a son altro che stâts tornâts a fâ. La citât ai tegn nevore a la sô bieleçe e al sô patrimoni inestimabil di architeture. Il contrari al sarès di mats: San Pieriburc a rapresente di simpri la citât plui evolude e liberâl di dute la Russie, la citât dulà che i intelettuai a son simpri stats plui libars e avaguardiscj. Forsite ancje par cheste a son cussì tanc museus: di chel dai viaç spaziai, a chel da lis armis, di chel da la marine a l’Incrociadôr Aurore che al à sparât il colp che al à dat principi a la Rivoluzion dal ’17. Par rivâ, cence recuardà l’Ermitage e il Museu Nazional di Russie, fin al Museu dai Samovar che a son, in pratiche lis nestris machinis dal cafè. San Pieriburc a è une citât plene di parcs, di cjantôns incjantats che a scolpin dopo un puint, daur di un canal, tancj dai cuai a podin iessi navigats cui solis batei par turiscj.