Buindì Udin, mandi Friûl e bune zornade a dutis lis animis che a cjaminin su cheste tiare. Come di abitudine tachin le puntade cul nestri lunari: Vuei joibe ai 27 (vincesiet) di avrîl il soreli al è ievât as 6.11 e al larâ a pognesi a 7.47 sot sere. Sicome che nus plâs cirî cualchi sproc interessant, vuei recuardin chel di martars 25 di avrîl che al conteve: Lune pelose, zornade ploiose. Come che si fedi a capî se la Lune e a il pêl chest no lu disin, par cui lin in fede. E a proposit di fede recuardin il sant, anzi le sante, che vuei nus ten une man sul cjâf: la beade Osanna di Kotor domenicane. Une sante nade sul finî dal 1400 in Montenegro che di zovine no a fat atri che partâ a passon il trop di pioris dai siei. A vincedoi ains si è fate murâ vive ta une celle li che jè restade par 51 ains a preâ par i pestei che intant il mont al cumbineve. A è muarte il 27 di avrîl dal 1565 e dome dal 1927 Pio XI le a nominade beade. Une vite in salide, insome. O vin dite le volte passade che, se avrîl al è il mês lì che si svèe la nature, a è ancje vere che cumò si svein dutis lis bestiutis bielis e brutis che da la nature e fan part. Provin a pensâ ai insets nocifs ma ancje a i fungos e a lis mufis che e tornin a dâ fûr cirînt le linfe vitâl des plantis. Par cui stait atenz cul bagnâ masse lis plantis: chest al è il prin môt par tegni sot contrôl propite mufis e fungos. Se viodês che il timp si è sistemât, e al è il câs di stâ ancjemò nevore atenz, podeis gjavâ i nailons e lis protezions invernals che tignivin al clip lis vuestris plantis. Se ves chê di partâ su le terace lis plantis che ô veis in cjase stait atenz ai sbalz di temperature: par cui meteilis fûr ma magari dome se ô veis la furtune di ve une terace parade dal ajâr plui fret che ogni tant ancjemò al tire. In chest periodo si puedin calmâ i vignâi, insedânt a spac lis plantis che, dopo, varês di cuviergj cul mastice a pueste. Si puedin ancje meti jù i risits gnûfs. Te cantine si puedin fâ lis colmaduris des botis e continuâ a imbutiliâ vint cure di mantignînt lis butilis in posizion orizontal. Se voleis in chest periodo, sore dut tal ultin cuart di lune, podeis meti in butilie i ros che voleis tignî par cualchi an. Ma viodût che tai dîs passats cualchidun l’a esagerât cul vin e cul mangjâ lassin in bande chest conseis par disledrosâ lis aventuris da la famèe Martarut. Eco le nestre storie. Si sa che cul pes no si scherze. E l’ere stât propite lui a tirâ fûr le idèe. «Dai molin la cjâr! Se l’è biel timp tirin fûr le gardele, cjolin un puc di pes e via che ô fasin une mangjade di chês che tirin un ton prin di rivâ a sere!». Ere nade cussì l’ativitiât frenetiche di chês zornadis. Telefonadis e telefonadis da l’ufici par a tornâ a meti in pît relatsions vecjs si ains, int che no ‘l sintive di timp e timp par rivâ a cjatâ un maranês che, di lunis, i partâs il pes. E vie il lunis prime dal 25 a cori par il Friûl a cirî chel camion che al veve lis sos cassetis di saradelis, sepis e calamârs ma che al ere masse impegnât a fa consegnis e a vuadagnasi il just ripos par fermasi a spietâ la dislessie gjeografiche di Fedele. E po dopo il camion l’ere stât cjatât, e la consegne e jere avignude. E Fedele al veve glutît cun muse di ridi i 200 euros di pes che il maranes ai veve tirât fûr: «Seiso in trops vuatris? Eh, no! Ca ti volin chilos, no sardons!». Si sa. Chei de companie lu savevin: mai mandâ Fedele a fâ spese. Parce che e finive che e vanseve une montagne di robe o che si scugnive incoconasi come pursits parce che la robe no si pol trai vie o meti in congelator. Come tal câs di siart pes fresc che no si pol congjelâ: sardelis in primis. «E no! Ai veve dite il maranês: o ves di magjâ dut parce che la sardele congjelade e jè come trate vie. Co ti la tiris fur de celle e tu la metis te padiele e va in pastele: une porcarie. Ma vuatris seis in tancj, no? Par chest no sta ve pore rivarês a parâ jù dut e a ve ancje spazi par un bon gjelato». Cussì chel 25 di avrîl l’Everest al jere stât trasformât ta une frigjtorie al aperto, ta une pessarie di prime cualitât. Claramentri l’invît no l’ere stât pandût ai cuatri svints: dome int selezionade. Ermes e la femine che e jerin i parons di cjase, Fedele e Marta, Artemio di bessol parce che o savin lis dificoltâts che al a cjatasi une sgrisignide di femenute, Gaspare l’architet cu la femine, Matteo, il grafic, cun la so siore, e Giovanni cun Alice. Gramulis di prime categorie. Cui che al veve partât il vin, cui il rîs frêt, cui il gjelato. Cui, come Fedele, che lis veve ancje sintudis parce che al veve spindût masse e cjolt masse robe, che al veve partât il pes. E lì, par dut il dì, di misdì fin a ore di lâ a pognesi al jere stât dut un messedâ di mosselis, un intorgolasi di lenghis, un lâ su e jù di materie par il gargat. E un lavorâ di fîat e di polmons: di fiât par il blanc che al coreve come Mennea tai dusinte e di polmons tal trai vie flât a discori dal dut e dal nuje. A le fin dut un lassasi cun bussadis e promessis: «Ah! Lunis l’è il prin di mai, no vino di cjatasi! No vino di mangjâ ûfs e sparcs: finalmentri al è rivât un puc di soreli e tu as di viodi come che parin vie e ce boins che e son». Un invît, chel di Fedele, al cual, par vie di une siarte pasudese che e infoschive il sentiment, dinissun al veve vût il coragjo di dî di no. Ma si sa come che e van a finî chês robis lì, no? Dut cas le compagnie si ere lassade ben. Le citât, come simpri, e jere serene. A part lis fameis che vevin fîs te scuelis superiôr lì che, simpri di plui, al sameave che il Bronx si fos trasferint de nestris bandis. Ta cualchi scuele superiôr il numar dai suspindûts par vie da lor comportamênt al sameave a un boletin di vuere. Pocs, robaris, estorsion: insome, se come che al insegneve un sproc latin tant di mode cualchi an fa e che al diseve “o imparin par la vite e no par la scuele”, chescj zovins si preparevin a jentrâ ta une societât che no jere dal dut apuest e che e veve come riferiments positifs Provenzano e Luciano Liggio pluitost che Einaudi e Mattei e Olivetti. Par il rest dut al lave ben. Plui o mancul. Insome i presins da lis cjasis e stevin par trasformasi ta une valanghe che e varès partat daûr di se dut il sistema da la speculazion edilizie di chescj ains. Le pulizie e burive fûr ogni fin setemane la cjarte di dulâ che jerin i autovelox e la int e feve apueste a corigj devant par viodi se ere vere cul risultât di desinis di patentis ritiradis. Lis eletsions e tachevin a deventâ une realtât oniriche che, planc a planc, si disfanteve. E tra faturis falsis, assegnos scuvierts e camarelis che fevin lis furbis, il mont al continueve a lâ indenant par il so fat. Ma a 2.09 di gnot, puntûal come un treno suizzar che al va in Gjermanie, il fiât di Fedele al veve tacât a lavorâ. Dut un intorgolasi di sugos gastrics e di trasfusions biliars che e fevin montâ no si sa cual mefitic efièt sul sun dal nestri impiegât che no si rindeve cont di no ve plui vinc ains e che al continueve a bevi e a mangjâ come un gavanel. E il sun di Fedele al jere evolût subit ta un ingos di chei penc, di chei di fâ vignî i scrisulons. Sudôrs frets e corevin par la schene in bore di che ominut, tant che Marta e sborfeve vie le zornade cun t’ un ronseâ se no altri cuiet. E tal sun Fedele si ere tornât a cjatâ tal saliso dal Everest, ta la stesse situaziôn dal dopomisdì, cun ducj i sei amis atôr. E cun ‘t un camion di saradelis di finî prin che al rivas il scur. E Ermes al rideve come un mat tant che al tignive alte la flame da la gardele sul la cual al sameave che il pes nol finis mai di moltiplicasi. Al jere dut un mesedasi di sensatsions e di rumors, dut un lâ e tornâ di lusignis e maraveis, di peraulis e di lusôrs. Insome Fedele e la so compagnie e stevin vivint suspindus su un sugo al pomodoro e ton che al subulive sot e atôr di lôr. Le uniche robe strane e jere la lûs dal soreli. Che no jere chê di simpri. Il cîl al veve un colôr sclopon, come se un mestri dal cine gjaponês al ves fat un contrât cul comun par trasformâ il cîl furlân ta une stampe di Hokkusai. E ta chel cîl al jere dut un rondolasi di nui, ancje lôr di un colôr vuelin di ulif, boins di ingrumasi e disfantasi ta un nuje e di tornâ a resurî dal nuje che jù veve inglutis. Fedele al cjaleve le companie e al cjaleve il cîl e alc ai diseve che nuje di bon si steve preparant. Di lontan al toneve, un ton plui stramp dal solit, se un solit al esist tal jessi stramp dai tons. Un rumôr che ai sameave al passâ dal treno su la linie no lontane da la scuele dai predis. Un sentiment di rumôr che ai parteve vie il flât pur no jessint nuje di cussì stramp. Fedele al cjaleve il cîl imbande di Ermes che, molade le gardele, al fumave il so spagnolet cjalant il cîl tant che Artemio si cjaleve lis scarpis parce che al tacave ancje lui a ve pore di alc che al jere za lì ma no si feve viodi. Atôr cumò dut al jere un cidin cence peraule: no fevin rumôr lis fueis dai platanos tal svint, no si sintive il passâ da lis machinis su l’asfalt. La citât interie e jere cidine. Ancje se e continuave a movisi come un bisat tal gej prime di jessi pognet su la belance. Ecco, si moveve come un che al sa di iessi condanât e a si mûf cun fa letargic drenti ta la seste come inebetît e strac di vivi ma cence pusibilitât di molâ il so movisi. Fedele, Artemio e Ermes e cjalavin il cîl. Nui color vueli e cîl color sclopon. Nuje altri. Dome une radio impiade no si sa di cui, come che dispes al sucet tai suns, e tacave a fevelâ di un nul colôr dal vuelin sot dal cual no l’jere propite il câs di cjapâ le ploe. I voi di Fedele, Ermes e Artemio no si stachevin di chel nûl, propite di chel nûl che e vevin disore dal cjâf e dal cual e tacheve a colâ une pluiute lizere lizere che e colorave dut di un colôr di vuelin di ulif. E dut al cjapave la consistence dal vuelin di ulif. Dut al restave ce che al jere ma al gambiave consistence, cambiânt colôr, intant che la radio e continuave a di «No stait a cjapâ le ploe, no stait a cjapâ le ploe…». Ma, come che e sucet tai suns, e jerin passats za cinc dîs e le ploe e jere za colade tant che Artemio Fedele e Ermes le cjalevin colâ. Inneat ta un mar di sudôr, cul pes che ai feve mandi mandi cu la manute dal gaselot tant che no si decideve se la su o jù, Fedele si ere sveât imbande di Marta che ancjemò e durmive, cumò però di un sun lizer. Al veve cjalât fûr de persiane: il cîl no ‘l jere colôr dal vuelin o dal sclopon. Al jere un cîl colôr dal cîl as cinc di matine. In avrîl. Il 26 di avrîl. Gjavansi une gote di sudôr che ai coreve dal sorneli a la ponte dal nâs, Fedele al veve tornât a siarâ i voi. «Bon complean, Chernobil» al veve dite prin di lassasi lâ a le ultime ore di sun.