Buindì Udin, mandi Friûl e bune zornade a dutis lis animis che a cjaminin su cheste tiare. Come di abitudine tachin le puntade cul nestri lunari: Vuei joibe al 1 di zuin il soreli, se o seis rivâts a viodilu daûr dai nui, al è jevât as 5,34 e al larà a pognesi tor 8,29. Il dut, claramentri, tal mieç di un frêt bec e di tante ploe. Ma cuisà, magari no dute la regjon e jè compagne. Vuei o vin un pucje di dificoltât cui sant dal paradis che nus tegnin companie: a ‘n d’è tanc, ma tanc, e un miôr di chel atri. Par cui, vuei joibe 1 di zuin dal 2006 o felarin di tre sante: cun buine pâs da la cuncurince. Il prin al fu San Caprasio di Lérins Abate, che al jere franceis, e che al à molât lis sôs richezis par ritirasi ta un eremo su une isole da le Coste Azzurre. Ciò! Là, a Lerins, Caprasio al à mitût adun une comunitât che e funzione ancjemò e che tai secui e a inflluenzât no dome le France ma ancje le Britannie e l’Irlande. Il secont sant di vuei al jè Sant' Annibale Maria Di Francia predi, che al à fondât l’ordin dai rogazioniscj e da lis fiis dal Divinno Zelo: al jè cugnussût in Europe, Asie e Oceanie e considerât l’apostul da le priere par lis vocaziôns e il pari dai puars e dai vuarfin par i cuai al a ancje fondât i Vuarfinârs Antonians. E, par finile cui sants, cumò fevelin di San Vistano Re di Mercia e martîr, che al vignive di Wystan, ossie Wiston e al jere propite un Re ingleis che par deventâ sant al à fermât il trist Brifard che al ambive al trono e che par paialu lu a copât dongje Wistanstow tal Leichestershire. Une liende e dîs che, sicome cuant che lu an copât i an sbgregât vie i cjavei, ogni an, il lôc dal so martiri al vignive inluminât di une lûs sante e lì e cressevin dai cjavêi. Podopo e an cjatât che a cressi e jerin nome dai foncs, ma intânt ancje il famôs arcivescul di Canterbury Balduin al veve fat indagâ su chescj events straordinaris. Vuei o vin fevelât di dute chest par no tocjâ l’argoment timp, primevere e plantis: se no seis apasionâs di unviâr no vin nuje ce disi. E viodût che i lunaris e disin che zuin al è il mês dal cjalt e cence ploe al è miôr che ô tasedin. Viodût che par che volte no sarîn le uniche robe che ô podin recuardâ al è il sant dal 15 di zuin, San Vît, che al dîs: Se a San Vît al è bagnât, par le ùe no l’è un an fortunât. Le ai inventade jo ma e funzione. Ma lassin piardi dutis chestis santerîs par tornâ su le tiare e cjapâ in man, par le ultime volte, lis aventuris da le famèe Martarut. Eco le nestre storie. «Fatto bene! Ciò! Chei son sorestânts. No monadis: abbiamo priorità più importanti. Ai ûl dat lavôr a le int, fats i marcepîts, organizade le racuelte da le imondizie, capît ce mût che o varin di comportasi cu l’ambiênt di chi a cualchi an. Cun dut il rispiet e cence gjavâi nue ai siors che e svualin, ma in chest moment a no l’è il câs di spindi. O sin dacuart. Cumò o vin di lavorâ. Dopo tornarin a spindi par divertisi». Ermes lu cjalave di stuart. Ma tant di stuart. E jere cualchi setemante che la vite ai feve cuintri: prin le indagjinis su le Juventus, po la ploe tal dì de adunade alpine, e cumò lis Frecis tricolôrs, simbul dal Friûl. E no! Cumò le vite le veve cun lui: si capive benon. E Fedele di cheste situazion no ‘l voleve rindisi cont e al steve zuiant cul fûc, sticjant Ermes cu lis decisions cjapadis de gjunte provincial di Triest. «Chest al jè un atentât contre la furlanetât. Sastu par ce che no li volin? Par ce che e rinvin dal Friûl. Eco parce. E dut ce che al jè furlân ai triestins no i va ben. Se vignissin di Monfalcon lis Frecis no li varessin gjavadis dal program. Tant plui che e jerin za stadis anuncjadis». Ermes al veve dite dut cence tirà nancje flât. Disin che, par doprà cualchi peraule fine, al veve propite la lune no stuarte, di plui. Savoltade! Ma Fedele no ‘l voleve molai i ùes e al pritindeve di vele vinte: «Scolte Ermes, le gnove presidente de provincie di Triest jè stade clare: “se ô vessin di domandami se li ûl o mancul jò no varess problemas a rispuindigi che no li voi. E in plui a è une cuestion di bês. No si rive. Ancje se l’esibizion dai aparechios a è gratis ai lin tancj bês par meti adun le organizazion”. Eeeh, Oh! Ermes: cun cul che a côr le benzine, cu la vite che coste simpri di plui, cul guviar di Rome che cumò nus dîs che i conts no son apuest, son fastidis sastu a cjavasi vie cualchi spisse par dai di ridi a le int. Ai vol stâts atents». Il discors di Fedele no’l veve cunvincjût Ermes che al zireve e volteve il spagnolet fra i dets tormentant il filtro cu l’ongule, sbassant il cjâf e po’ tornânt a cjalâ lontân, tal vueit. «Di Triest nus rivin dome brutis notizis». A le fin al veve dite il barist. «Tu pues ben dilu – al veve subite replicât Fedele che ai displaseve di viodi l’amic cussì bastonât – tu pues ben dilu. Ma astu sintude che notizie di cheiu canais fats deventâ sclafs e costrès a fâ le piês vite. Ohu! Ma chestis e son robis di medioevo». Le rivade di Artemio il puestin a veve cjatade la companie mogje mogje, con Ermes che al impiave un spagnolet cun chel atri continuânt a cjalâ mò lis scarpis e mò cuissà dolâ e cun Fedele che al cjalave a voi siarâts che glain di soreli che il cîl ai regaleve che matine. «Vitoria!» al veve dite cun ‘t un fa di grant condotiêr Artemio tant che al meteve il muturin su tal cavalet. «Vitoria! E che a no ‘n si feveli plui». Chei altris doi lu vevin cjalât come se al fos un marzian. A vevin altris pensîrs par il cjâf. E chest ca, cumò, al vignive fûr cun ‘t un cjant di batae… «Ce ti passial par il cjâf - ai veve domandât Fedele cun arie sturnide – no viodistu che no sin legris par nue. Ti sotu fat canis par dute le gnot che tu sês cussì luminôs?». «Ce, ce, ce. Ce ventu fûr. Ô vin vint, cheste e jè le uniche veretât. Vitoria. Il Sunsplash a si farâ e si farâ a Osôf. Capiso. Jè stade le int che e a dite che ô vin di restâ» al veve dite Artemio radiôs come il soreli su la bandiere da l’Argjentine. «Pete, pete, pete – lu veve interot Ermes che al podeve cussì cjavasi da so gerdei triestin-rivoltês – No è che ô veis vincjût nue. No vi an ancjemò parâts vie, vuatris scjavelons. Ma jè dome cuestion di timp. Tal parco e an di lâ i fruts cu lis bicicletis no i sdrondenâts». Artemio si ere impetit come un gjâl tal pulinâr cuant che a rive la massarie cu lis fuarpis par taiai lis alis a lis gjalinis. «Sarin scjavelôns, ma nun ô vin une culture di pâs, di amicizie e… e… si une culture. E po’ fin che a son i comercjants a dinus di restâ nun ô restin. Se dopo cualchi comercjant nol vent cotulis cuant che al è il Sunsplash a nun a ni displâs. Ma se invesite di vendi grumâi al vendês mautis di Sua Santità Robert Nesta Marley Rastafari, tu viodaressis che al sares content ancje lui». Stran a disi ma che matine Josh il fì di Fedele no ‘l ere lât a scuele. E sicome che ô sin a le fin da l’an a si ere beatamentri fât cucà di so pari tant che al lave in marine. Cucà e jè une peraule grosse. Passant no lontân di Chiavris al veve viudût so pari e le so combriccule come al solit, a dîs e miegje di matine, sul marcepit a fumâ, feveluçâ, piardi l’ore, insome. E cul cavalôt fin cuasit a lis canolis, lis mudantis ben in viste, une cjadene che a sameave che dal Titanic a tignìi il tacunin ta la sachete par daûr dai jeans, Josh a si ere presentât devânt di sô pari. «Deh! Vecjo. Ô varès bisugne di une firme». «Sasin! Nencje vuei a scuele?» «Iiih, ohu! Ceeee. Sin par finî, ce ao di lâ a fâ. Ô sai za dut. Scolte vecjo mi covente une firme. Ancje che di Ermes e Artemio se vuelin». Come al solit so pari, devant di che catastrofe di so fi al jere restât cence peraulis. Par cui al jere stât Ermes a rispuindi. «Une firme par ce, nini?». «Ô vin savût che i organizatôrs di Tentazioni e games, fieste da l’erotisim, e an domandât di vignî a fale tal camping, chêl siarât che e vevin tirât su par i mondiâi. Eco. Cui mei amîs ô vin decidût di tirâ su un pucîs di firmîs par cunvinci il comun a diî di sì». Ermes al veve fate une ridade che lu veve tirât su di morâl e i veve fat passâ cualsisedi maluserie acrobatiche. Fedele al veve cjapade in man, come se al fos un automa, le pene che so fi ai veve dat e cu la muse di un che al sta par vaî su dutis lis disgacjs che i son capitâdis te vite al veve firmât. Artemio invesite al veve firmât cu le muse di chel che al crodeve che chest al sarès stât il so an fortunât: no dome il Sunsplash a si sarès fat, e no dome forsite a si sarès fat ancjemò par cuissà trops ains. Ma a Udin e sarès rivade ancje le sagre da l’erotisim: cheste e jè furtune altro che un sîs al superenalotto. Ermes che, ô savin che ta situaziôns dal gjenâr al tetâve, al veve clamât fûr ducj i clients da l’Everest par firmâ e al steve ancje fermânt le int che e passeve par strade. «Chest e ulîn i zovins, Fedele – ai diseve intant Ermes al so amic impiegât – chest e ulin. Dopo dut, cuale ise le dote dal Friûl, come che al conte un famôs ritornêl? Panse, tetis e… Nooo? Eco! E cumò no sta dimi che a Tarcint no an reson a ulî fa une discoteche tal puest di une biblioteche. Chest e ûl le int. Firmate gente, firmate». Marta viudint che devânt da l’Everest e jere un pucje di marete, ven a stai masse inte e fra che int masse famèe, e veve continuade le so strade di che altre bande dal marcepît lant a cjâf bas, ma planc a planc, piartude tai soi pensîrs viârs le buteghe dai alimentârs. E tant che in man e tormentâve le sporte de Coop, e pensave e so zoventût «Johi! Ce seradis. Ce gnots, o ai passade le zoventût ta chel puest. Ta che piste, su chei divanos. Lis primis bussadis, lis primis strussadis cui murusuts. E balâ, balâ, balâ fin che a ‘n dere. Cence mai fermâsi. E jere le vite che rivave e za si capive che steve curint plui di nô. E alore al coventave ribelasi, sdrondenasi, cirî di capî che ô vevin al ce disi tal mont. E cirivin di capilû cun chel dum-dum-dum di undopumisdì intîr. Cul partî di cjase miegjs discrotadis sot dal capot par no fasì viodi de mame e po, co rivavin lì vie dut e andale: balâ, rondolasi, bevi. Vivi. Sigûr, ô erin int di pais, ma la modernitât e passave par là. Che discoteche e jere il leamp fra il mont contadin e New York, fra l’eletroniche e le code di volp tacade su l’antene da la A 112 abart. Di sigûr dut là drenti a si misturave a creâ une gnove realtât, impure, margjnâl, di seconde man. Ma al jere il nestri mont par dì al mont che ô erin ancje nun, par dì al mont che nol veve lui un centro, o almancul no ‘l veve nome un centro. Nun là drenti ô erin il centro dal mont, il bugnigul da la realtât. Mi displâs che me mari che volte no le ves capide, ma se ô fos stade jò al sô puest no sares rivade instes a capì. Come che jò cumò no rivi a jentrà ta chel salvadi cui bregons che an il cavalot fin tai genoi. Ancje se, si scugne dilu, se no vessin tacade nun le code di volp su le A112 Abarth, tant che dal mangjecassetis e vignive fûr a manete le prime “disco” plui pengje, vuei lui e ducj chei altris come lui e laressin atôr vistus a la marinare. Nun o vin fate une rivolutsion. Al jè che dinissun a si è inecuart». E cun chestis peraulis Marta, che intant e iere rivade devânt dal becjâr de coop e veve tirade su le muse e cjalanlu tai voi cun tante tristezze e veve dite: «Dami un eto di cuet, Berto. Un cuart di latarie e une scae di grana».