Bundì Udin, mandi Friûl e buine zornade a dutis lis animis che cjaminin su cheste tiare. Se o veîs scoltât la puntade da la setemane stade, si impensarês che Guerrino e Odillo, i nestris dôi operaris specializats, a son a Parigi che si preparin par lavorâ ta la fiere da la plui grande citât francese. Ma sicome che a son rivats di domenie di sere a si la stan gjoldînt cjalânt vitrinis e biele int sui Champs Elisèe, ven a stai la strade plui importante da la citât. Une sorte di vie dai Fori Imperiali a Rome. Sta di fat che propite su che vie a fasin dutis lis sfiladis uficiâi, su che strade il president da la Republiche al salude la int e l’esercit cuant che a si mostre in public. Lì a si erin cjatâs almancul un milion di frances la sere dal nûf di lui par fa la fieste a une cope dal mont che invesite a jè lade in altris mans. Insome: se Parigi al è il cor da la France, i Cjamps da l’Eliseo a son il cûr dal cûr da la capitâl dai nestris cusins di là da lis Alpis. Ma sino sino propite sigûrs che chêl plui uficiâl al sedi ancje il lûc veramentri plui rapresentatîf dal cûr da la France? Al è clâr che come dutis lis citâts che si ripietin Parigi e à une muse viarte, che a mostre a ducj, biei e bruts che a vegnin a viodile. Ma and’à ancje une muse platade, claramentri. O, podaressin dì, recuardant chel che o vin dite ta la prime puntade dedicade a cheste citât, se a jè vere che dentri une grande capitâl no sta dome une citât ma tantis, cussì come che and’è citât sot, disore e imbande di dutis lis grandis citâts, o puedaressin dì alore che Parigi a mostre a ognidun la muse che chest al ûl fasi mostrâ. Si vae a Parigi par viodi la Tor dal sior Eiffel? Alore la plui biele muse a sarâ chê: e a è une muse tirade su in doi agns (tra il 1887 e il 1889) su progjet dal ingenîr Gustave Eiffel che a veve di deventâ la puarte di ingrès a la Esposizion Universal dal 1889 (an tal cual a colevin ancje i prins 100 agns da la Rivoluzion Francese: migo monadis!). La tôr a è state tirade su di 300 carpentîrs metalmeccanics, che an zontât un cun chêl atri alc come 18.000 tocs di fiêr, doprant mie milion di bulons. «Ohu!» Al veve zigât Guerrino ta lis orelis di Odillo che siarânt il so spolvarin a l’ajâr friscjut di Parigi lu cjaleve un fâ impressionât ma ancje plen di fan «Odillo, sint ca. Chestis a son robis che ti fasin capî trop che une nazion a è indenânt: par tirâ su la Tôr Eiffel, ancje se a jerin a la fin dal ‘Votcent e no vevin dutis lis normis di sigureçe che o vin cumò, al è muart dome un operari, colât jù tant che a metevin adun i ascensôrs». E cun che Guerrino al veve tornât a inneâ il nâs ta la guide di Parigi che Wanda, la sô femine, ai veve comprât par l’ocasion, parceche Guerrino al sarà ancje un operari, ma al è pur simpri un laureât in filosofie. E al lui ai plâs tignisi agjornât. Tornânt a cjapâ il discôrs da la Tôr Eiffel, podin recuardâ che il simbul da la France, che sul principi no l’jere plasût a nissun e che, adiriture, a veve di jessi disfade une volte finude l’Esposiziôn Universâl, al rive a plui di 300 metros di tiare, se no si contin chei atris 20 metros di antenis che ai fan di ponte e a pese in dut 10.000 toneladis. Su di jè, ogni an a montin cinc milions di personis par cjalâ Parigi da l’alt e, crodemi, al fâs simpri un biel efiet. A part lis vicendis personals par piturâ chest mostro di aciâr a coventin ogni 7 agns, 50 toneladis di vernis. E cumò une piçule particolaritât: lis misuris che o vin dât a restin simpri vaghis par ce che, tant par dinsint une, cul cjâlt la tôr a si slungje ancje di 15 centrimetros! Par il rest la domande che cuant che si cjale di sot a cheste bestie di robonone jè: ma a ce conventiâl? E la rispueste plui precise a jè: a nuje. La Tôr no covente a nuje: a la fin dal ‘Votcent ta l’ultin plan da la tôr a vevin fate une pissule ciamare lì che a fevin esperiments di radiotelegrafie cence fii. Cumò che cjamare a è restade come un piçul museo che si pues cjalâ dome stant di fûr e smiciant drenti da lis barconetis dai pipinots in cere che fasin finte di fâ esperiments. Podopo i militars a vevin capît che la Tôr a podeve jessi doprade, viudût che a jere cussì alte, par mandâ messaç a lis nafs e ai dirigibii. Par il rest nuje altri. Se no il fat che tal 1925, Victor Lustig, un artist plui che un lari, al è rivât par dos voltis a vendi la tôr. E ca no si disi mâl dai româns cuant che a vendin Fontana di Trevi. Guerrino e Odillo a continuevin a cjaminâ par Parigj, smicjânt vitrinis, biele int sintade tai bistrò sui Cjamps da l’Eliseo, e lant viars l’arc di Trionf, che i franceis a an tirât su par dai la juste glorie a lis armadis di Napoleon. Difati se o laìs sot da l’arc o pedeis viodi dutis li targhis che recuardin lis grandis batais e concuistis dal piçul cors, e no tal sens di vie ma tal sens dal piçul gjeneral che si nominò imperadôr e che al jere nât in Corsiche, ta chel di Ajaccio. «Cà a scrivin che Napoleon a lu vevin soterât propite ca sot» al diseve Guerrino a Odillo stringjnt ta lis mans la so inseparabile vuide. «Ma dopo lu an partât a l’Hotel des Invalides, che no l’è par nuje un albergo, se croditu» e cun chês peraulis Guerrino al cjaleve cun fa di sfide il so compain: ancje parce che chel al veve di sigûr fat frances a lis medis e alc a si impensave come che al diseve lui, ma Guerrino al jere fì di emigrants e par une sorte di proprietât transitive al crodeve di cognossi dutis lis lenghis dai pais lì che so pari al jere stât a vore. «Ah, no? Mi pareve strani che metessin un imperadôr… ben si insome un ex imperadôr in mostre ta une casse mitude tal mieç da l’ingres di un albergo». A Guerrino ai vignive di ridi: une laurèe no faseve di sigûr il cjâf di une persone. E pur jessint laureat ancje Odillo, ogni tant al colave par tiare come un piruç. «Odillo! L’hotel des Invalides al jè une glesie laiche che li che i franceis a meti a polsâ par l’eternitât i lor plui granç omis». «Ah!» al veve riuspuindût pûc convînt chel atri. Tornât a l’arc di trionf: la tombe di Napoleon a jè state cambiade cun che dal soldât scugnussût, e chest al jè deventât un dai lûcs plui impuartânts da la patrie. Su di lui a bruse une flame eterne a recuart da la storie di France. La sacralitât dal lûc dut câs no è ricugnussude di duç: famose a jè stade che volte che un siôr plui par ridi che par malizie a si è presentât sot da l’arc di trionf cun une farsore, le spongje e i ûfs e al à fate une buine fartâe fasinle cuei sul fûc da la flame dal soldât scugnussût. Ancjemò plui famose a jè l’imprese di Cherles Godeffroy che tal 1919 cul so avion al jè passât par sot da l’arc a dute velocitât: al voleve protestâ par la pucje atenziôn che l’esercit dal timp al dave a la aviaziôn. Juste par jessi precîs al veve dome tre metros di ajâr tra la ale e il mûr. Ce podino di? Bulo! Prin di passâ a altri podin recuardâ che tal puest lì che cumò al jè l’arc di trionf i cualchidun al veve progjetât di tirâ su un grant elefant in muradure. Ma grant eh! Almancul 50 metros di altece. Drenti a varessin cjatât puest salis di riunion e di concert e lis orelis da l’elefant a varessin vût di fâ di altoparlante par fâ scoltâ la musiche a dute la citât. Plui tart invesite, cuant che par un periodo i lavôrs di costruzion da l’arc a jerin restâs suspindûts, un architet al veve pensât di trasformâ il dut ta une grande fontane che a podeve dai aghe a un flun che al varès vût di cori di lun su duç i Cjamps da l’Eliseo. Insome la fantasie no je mai mancjade ai nestris cusins de France. O vin dite che un dai nestris doi protagonisç al jè famôs par la fan e par la sêt. Nomo? Difati, pur vint bivût in avion prin di dismontâ a Parigi e pur no vint dismintiâde la sô sêt epocâl dilun su la strade, Odillo cumò al tacave a sintî il stomi e il fiât che a devin segnâi di maravèe. «Guerrino! Ce si mangjal di bon a Parigi?» «Tu m’al as za domandât Odillo. Tu m’al as za domandât. Fan e nini?» «Dome fan? Ancje sêt! Ce croditu che no fasi lis robis par ben» al veve rispuindût Odillo. E alore Guerrino orientansi cul jutori de sô meraveose vuide lu veve partât ta un dai plui biei puesç di Parigi: il Marais. Chest ca al è il cuartier da la capitâl francese lì che si cjatin i zovins, i artisc, i sdrondenâts e chei che ai plâs, di une citât, no viodi lis stradis segnadis par i turisç ma lis stradutis mancul cugnussudis e plui platadis. A dì il ver il Marais no l’è propite tant scundt ancje parce che al jè tal cûr da la citât, tacât da Louvre, di Notre Dame, ven a stai il domo di Parigi che al jè biel di gjavâ il flât, e dongje a tantis robis bielis. Ma se o ves chê di lâ ta la capitâl francese, il puest lì che rivares a scoltâ l’anime plui fonde da la citât, ben, chest rivarês a falu propite al Marais, cjaminant par lis stradis che ancjemò a san di medievâl, tal mieç dal cuartier ebraic che cumò al jè vivût da la plui discrete comunitât cinese di Parigi, cjaminant fra locai di tendence lì che, però, nissun al tire su il nâs se no tu sês vistût di tendence. E, se propite voles savè une robe, cence nancje cori tant ator, rivares a bevi un bon tai di neri, pajantlu come se fossis ta une ostarie di vie Marsala a Udin. Rinfrancjât il stomi cun lis specialitâts ebraichis dal Marais, Guerrino e Odillo che sere a deciderin di concedisi ancjemò cualchi pas par cognossi miôr la citât. Cun il dì dopo a varessin viudût dome avitatôrs, moquettes, vits, e tante robe di cjariâ e scjariâ tal mieç di un davoi di int e rumor. Il dut ta la fiere di Parigi, s’intint. Alore: viudût che a jere sere e che no vevin che di lâ a viodi cualchi museu, ancje par ce che par viodi il Louvre a ti vol une zornade interie dome par cjalalu curint, e il Beaubourg ti vol avonde e no stin fevelâ dal Museu d’Orsai, alore disevin a Guerrino e Odillo no i vanzeve che fasi une cjaminade su l’isule da la Citât passant par il Puint Gnûf claramentri. «Deh! Guerrino. – ai veve dite Odillo cun malizie – scolte o ai capit che ancje se si clame Puint Gnûf chest cà al jè il puint plui vecjo da la citât. Ma cjale che o ai viudût ancje jò il film di Carax lì che une zovine e impressionante Juliette Binoche a fâs la strassone e vîf sul puint e dopo si inamore». «Eh! Nini. No ao migo che di bussati jo. Sastu. Cjavitâl dal cjâf. Plui tost vioditu la jù a la fin dal puint: ta che ostarie là a si bevin i miôr vins franceis e l’ostêr al à une passion par i vins furlans». Podevie no finî cussì. Sigûr. A podeve finì in maniere difarente e al fo cussì: dopo une fevelade cu l’oster su l’anade vinicule Guerrino e Odillo, che no jerin propite di glesie, a finirin la lôr serade in cidin, cjalânt cun rispiet la fassade di Notre Dame de Paris, lì che secui di storie a si ingrumin cjalanti drets tai voi cu la severitât di un pari.